Bo Bolɛ 3 - NYANMIƐN NDƐ'N 1998

Yasua'n nin bla'n be Edɛni fie'n nun lɔ fuanlɛ

¹ Laa, wuo'n i gblɛ liɛ'n tra bo'n nun nnɛn nga Anannganman Nyanmiɛn yili be'n be kwlaa. Le kun ɔ wa usali bla'n kɛ: «?Nan Nyanmiɛn seli amun sakpa kɛ: ‹Nán amun di fie'n su waka'm be mma'n wie fi?› »

² Yɛ bla'n tɛli wuo'n su kɛ: «E di fie'n su waka'm be mma mun o!

³ Sanngɛ waka ng'ɔ jin fie'n i afiɛn'n, i su mma liɛ'n yɛ Nyanmiɛn'n seli e kɛ nán e di-ɔ. I kpa'n bɔ ɔ seli e kɛ nán e kɛn i. Sɛ ɔ yo sɔ-ɔ, e ´wu.»

⁴ Yɛ wuo'n seli bla'n kɛ: «Amun su wu-man.

⁵ Nyanmiɛn bɔbɔ si kɛ cɛn nga amun di'n, amún nyin ´ti. Amun ´yo kɛ i bɔbɔ sa, amun ´si sa kpa'n nin sa tɛ'n.»

⁶ Kɛ bla'n nian waka nin-ɔn, i mma'm be yo nyɛnmɛn. Ɔ wun kɛ be wa yo fɛ nan be man sran ngwlɛlɛ-ɔ ɔ yo ye, yɛ ɔ ´ti wie di-ɔ, yɛ ɔ ´fa wie mɛn i wun b'ɔ o i wun lɛ nin-ɔn, yɛ i kusu ɔ ´di wie-ɔ.

⁷ Kpɛkuun be nnyɔn'n b'a wun sa wlɛ. Be wunnin kɛ bé wun ti kplɛn, nan b'a kpɛ figie nnya b'a fa yo be bo tannin.

⁸ Kɛ nnɔsua aunngban'n ´fita'n bɔ Anannganman Nyanmiɛn bali wlan-wlanlɛ fie'n nun lɛ'n, kpɛkuun b'a ti i ngan nan b'a fiɛ i nyrun fie'n nun waka'm bé sin.

⁹ Yɛ Anannganman Nyanmiɛn ´flɛ yasua nin-ɔn, ɔ usɛli i kɛ: «?A o nin?»

¹⁰ Yasua'n tɛli i su kɛ: «N tili ɔ ngan fie'n nun, srɛ kunnin min, afin mín wun ti kplɛn, ɔ man m bali fialɛ.»

¹¹ Nyanmiɛn usɛli i kɛ: «?Wan yɛ ɔ kan kleli wɔ kɛ ɔ́ wun ti kplɛn-ɔn? Kɛlɛ w'a di waka mma bɔ n seli wɔ kɛ nán a di'n!»

¹² Yasua'n tɛli i su kɛ: «Bla bɔ a fa sieli min wun wa'n, i yɛ ɔ mannin min wie yɛ n dili-ɔ.»

¹³ Yɛ Anannganman Nyanmiɛn usali bla'n kɛ: «?Ɔ yo sɛ ti yɛ a yoli sɔ-ɔ?» Bla'n waan: «Wuo yɛ ɔ lakali min yɛ man n dili-ɔ .»

¹⁴ Anannganman Nyanmiɛn seli wuo'n kɛ: «Like nga a yoli i lɛ'n ti, nán yo kpa klɔ nnɛn nin blo nnɛn'm be nun le. A wa cuɛn ɔ wun ase, yɛ a ´di ndutre lele a ´fa ju ɔ wie cɛn.

¹⁵ N ´fa kpɔlɛ n wla a nin bla'n be afiɛn, n ´fa wla ɔ osu'n nin bla'n i osu liɛ'n be afiɛn. Bla'n i osufuɛ'm be kpɔtɔ ɔ́ ti'n, yɛ ɔ kusu a ´ka bé ja sin .»

¹⁶ Yɛ ɔ se bla'n kɛ: «N ´yo man ɔ wunnzɛlɛ nun afɛ'n wa yo dan. Kɛ a ´wu ba'n, a ´wun nyrɛnnɛn kpa. Wɔ anwlɛn'n wa tran ɔ́ wun su, sanngɛ ɔ ´sie wɔ.»

¹⁷ Yɛ ɔ seli yasua'n kusu kɛ: «Sa ti bɔ ɔ́ yi i aniɛn liɛ'n yɛ a tili'n, bɔ a dili waka mma nga n seli wɔ kɛ: ‹Nán di'n,› i ti asiɛ'n ´saci. A ´fɛ kpa nan w'a nyan ɔ́ nuan nun aliɛ. Ɔ ´yo sɔ lele yɛ a ´fa wu-ɔ.

¹⁸ Owie-owie mun nin flɔn mun yɛ be ´fu asiɛ'n su-ɔ. A wa di bo'n nun nnya-nnya mun.

¹⁹ Nvufle ´tu wɔ kpa nan w'a nyan ɔ́ nuan nun aliɛ w'a di. Ɔ ´yo sɔ lele nan w'a fa sa ɔ sin a kaci fa ekun, afin fa yɛ n fa yili wɔ-ɔ. A ti fa yɛ a wa sa ɔ sin a ´kaci fa ekun.»

²⁰ Be flɛ yasua'n kɛ Adam yɛ ɔ tɔnnin i yi'n i dunman kɛ Ɛv, afin ɔ ti sran'm be kwlaa nga be wu be'n bé nin.

²¹ Anannganman Nyanmiɛn yoli kplo tralɛ fa wlali yasua'n nin bla'n bé wun.

²² Anannganman Nyanmiɛn seli kɛ: «Sran yɛ ɔ'a yo kɛ e sa yɛ afin ɔ si sa tɛ'n nin sa kpa'n. Nán e mɛn i atin kɛ ɔ ti nguan waka'n i mma'n wie di, ɔ yo sɔ-ɔ, ɔ ko tran nguan nun titi .»

²³ Nan Anannganman Nyanmiɛn ɔ'a fuan sran'n Edɛni fie'n nun kɛ ɔ `ko di asiɛ bɔ i nun yɛ ɔ fin'n i su junman.

²⁴ Kɛ Nyanmiɛn fuannin sran'n, ɔ fali anz nga be niɛn i ninnge'm be su mun fa sieli i Edɛni fie'n i wia afiliɛ lɔ. Kue sunman sin taaman o bé sa nun yɛ be fa sasa nguan waka nin-ɔn.