Bo Bolɛ 27 - NYANMIƐN NDƐ'N 1998

Izaak yacili Ezau lɛ yrali Zakɔb nguan

¹ Izaak yoli oke. I ase wunlɛ'n kpɛli su lele siɛn'n ɔ wun-man ase kun mlɔnmlɔn. Yɛ le kun ɔ flɛli i wa kpɛnngbɛn Ezau, ɔ seli kɛ: «Mín wa.» Yɛ Ezau waan: «M'an sro.»

² Izaak waan: «M'an yo kpɛnngbɛn, yɛ ɔ bɔbɔ a wun i yɛ. N si-man cɛn bɔ n ´wu-ɔ.

³ I ti fa ɔ koniɛn ninnge mun, ɔ ta'n nin ɔ ta mma mun. Kɔ bo'n nun lɔ ko kun nnɛn,

⁴ fa tɔn aliɛ nga n klo i kpa'n blɛ min man n di nan n `yra ɔ nguan nan m'an wu.»

⁵ Yɛ Ezau ´kɔ blo i si i nnɛn'n i kunndɛlɛ-ɔ. Kannzu kɛ Izaak ´kan ndɛ sɔ'n ´kle Ezau'n, Rebeka sieli i su tili.

⁶ Yɛ i kusu ko seli Zakɔb kɛ: «Ɔ si flɛli ɔ niaan bian Ezau icra'n, ɔ seli i kɛ:

⁷ ‹Ko kun blo nnɛn fa tɔn aliɛ fɛfɛ man n di nan n `yra ɔ nguan Anannganman nyrun nan m'an wu.›

⁸ Nan i ti mín wa, nian ndɛ nga n wa kan kle wɔ'n su yo i cɛ.

⁹ Kɔ nnɛn'm be tuin'n nun lɔ, nan tra boli nga b'a kpɛ cro'n i so nglanman nglanman nnyɔn blɛ min nan n `fa tɔn aliɛ fɛfɛ nga ɔ́ si klo i'n

¹⁰ nan fa ko mɛn i man ɔ di nan ɔ `yra ɔ nguan nan ɔ'a wu.»

¹¹ Zakɔb seli i nin kɛ: «Ezau lɛ ndrɛ kpanngban, n kusu n lɛ-man wie.

¹² Sɛ baba fɛ i sa fua min wun nan ɔ wun kɛ gblɛ yɛ n kpɛ'n, ɔ ´yaci min nguan yralɛ'n, ɔ ´bo min sannzan.»

¹³ Yɛ i nin waan: «Man i sɔ sannzan liɛ'n tɔ n su. Ɔ li n se wɔ kɛ, ko tra boli mun bla.»

¹⁴ Yɛ Zakɔb ɔli ko trali be blɛli i-ɔ. Nan i nin ɔ'a fa tɔn aliɛ nga Izaak klo i'n.

¹⁵ Kpɛkuun ɔ fɛli i wa kpɛnngbɛn Ezau i tralɛ nga be o awlo lɛ'n be nun klanman kpa'n wlali Zakɔb i wun.

¹⁶ Ɔ fali boli'm bé kplo'n katali Zakɔb i sa'n su. Ɔ fali wie katali i kɔmin'n wun.

¹⁷ Yɛ ɔ fali aliɛ'n nin kpaun mɛnnin i kɛ ɔ fa ɔ.

¹⁸ Zakɔb ko toli i si nan ɔ'a flɛ i, i waan: «Baba.» Izaak waan: «?M'an sro, mín wa, wan li-ɔ?»

¹⁹ Zakɔb waan: «M bɔbɔ min Ezau, ɔ́ wa kpɛnngbɛn nin-ɔn, m'an fa like nga ɔ waan n tɔn'n, m'an ba. Jaso, bla nan tran ase di min blo nnɛn'n nan yra min nguan.»

²⁰ Izaak seli Zakɔb kɛ: «Ee, mín wa, a nyannin nnɛn'n ndɛ o.» Yɛ Zakɔb waan: «Ɔ yoli min Nyanmiɛn sa. Kɛ n fɛ i wa n ´kɔ cɛ'n, yɛ sa yɛ e nin nnɛn kun e yiali nun-ɔn.»

²¹ Izaak waan: «Mín wa, wunnge wa man n kan wɔ n nian sɛ mín wa Ezau yɛlɛ wɔ sakpa o.»

²² Yɛ Zakɔb ´wunnge i si i wun lɔ yɛ i si ´fɛ i sa fuɛ i wun-ɔn. Ɔ seli kɛ: «Ɔ nɛn'n fa Zakɔb liɛ'n, sanngɛ ɔ́ sa'n ti kɛ Ezau liɛ'n sa.»

²³ Ɔ'a wun-man Zakɔb wlɛ yɛlɛ kɛ ndrɛ o i sa'm be wun kɛ i niaan bian Ezau liɛ'n sa. I sin nan ɔ'a yrɛ i nguan'n,

²⁴ ɔ usɛli i kɛ: «?Mín wa Ezau yɛlɛ wɔ sakpa?» Zakɔb waan: «Ɛɛn, min-ɔn.»

²⁵ Yɛ Izaak waan: «Man min ɔ blo nnɛn nga a sɔkɔli'n wie man n di nan n yra ɔ nguan.» Yɛ Zakɔb tili aliɛ'n wie mɛnnin i-ɔ, ɔ dili, ɔ suli i nzan'n, ɔ nɔnnin.

²⁶ Yɛ Izaak waan: «Mín wa, wunnge wa tɔ min nun.»

²⁷ Yɛ Zakɔb wunngeli lɔ yɛ ɔ tɔli i nun-ɔn. Izaak tili i tralɛ'n i bɔnlɛ'n nan ɔ'a yrɛ i nguan ɔ'a se kɛ: «Ee! Mín wa'n i wun bɔn klanman kɛ fie wie bɔ Anannganman man ɔ'a yo ye'n sa.»

²⁸ Nyanmiɛn man bɔlɛ ufue `gua man wɔ, nan ɔ fie su ninnge'm be `yo ye. Man ɔ ble fie'n yo ye kpa, man ɔ nzan'n sɔn.

²⁹ Man nvle wie'm be nunfuɛ'm be su wɔ, man mɛn wie'm be nunfuɛ'm be koto ɔ bo. Sie ɔ niaan mun. Man ɔ́ nin i mma'm be koto ɔ bo. Sran ng'ɔ bo wɔ sannzan'n, man nyrɛnnɛn tɔ i su. Sran ng'ɔ yra wɔ nguan'n, Nyanmiɛn man i wun sa `yo ye.

³⁰ Kɛ Izaak wieli Zakɔb i nguan yra'n, b'ɔ Zakɔb fin wun lɔ fiteli cɛ'n, yɛ Ezau fin i koniɛn'n bali-ɔ.

³¹ Yɛ i kusu ko tɔnnin i aliɛ fɛfɛ liɛ ko mɛnnin i si-ɔ. Ɔ seli i kɛ: «Baba, jaso di blo nnɛn bɔ ɔ waan n tɔn blɛ wɔ'n nan yra min nguan.»

³² I si Izaak usɛli i kɛ: «?Ɔ waan-an?» Yɛ i waan: «Ɔ wa kpɛnngbɛn Ezau-ɔ.»

³³ Izaak kpitili kpli, ɔ usali kɛ: «?Yɛ wan yɛ ɔ kunnin blo nnɛn blɛli min nin-ɔn? M'an di ɔ'a wie, yɛ w'a ba yɛ. M'an yrɛ i nguan, n kaci i-ɔ ɔ yo-man ye kun san ɔ ´nyan muae.»

³⁴ Ezau waan nán ɔ ti ndɛ nga Izaak kannin'n, ɔ wluwluli i wun nan ɔ'a kpan fiaan . Ɔ seli i si kɛ: «Baba, yra min nguan wie.»

³⁵ Izaak waan: «Ɔ niaan'n fali gblɛ ɔ wa deli ɔ muae nga a ko nyɛn i'n.»

³⁶ Ezau waan: «?Yoo i ti yɛ be flɛ i Zakɔb nin-ɔn? Min lakalɛ'n i kpɛ nnyɔn b'ɔ ´laka min yɛ. Ɔ deli kpɛnngbɛn'n ń sa nun, kpɛkuun ɔ'a de min muae mín sa mun ekun. ?Nan i ti a su yra-man ɔ́ nuan klanman bɔ kaan sa man-man min?»

³⁷ Izaak seli Ezau kɛ: «?Ɔ bɔbɔ nian, n seli kɛ i yɛ ɔ ´sie wɔ-ɔ, n fɛli i niaan'm be kwlaa n yoli i sufuɛ. N fali ble'n nin nzan'n, m mɛnnin i. ?Nguɛ cɛ yɛ n ´yo man wɔ ekun b'ɔ ´yo ye-ɔ, mín wa?»

³⁸ Ezau usɛli i si kɛ: «?Be nuan yralɛ kunngba ng'ɔ o ɔ́ sa nun'n yɛ ɔ o lɛ-ɔ, baba? Yra ɔ́ nuan man min wie, baba.» Ezau mɛnnin i nɛn'n su, ɔ sunnin

³⁹ yɛ i si Izaak waan: «A su nyan-man asiɛ kpa tran-man su, kɛ a tran lɛ bɔlɛ su gua-man lɛ.

⁴⁰ Sɛ a ´nyan like di'n, ɔ fin ɔ tokofi'n. A ´su ɔ niaan'n, sanngɛ kɛ a kpli lele'n, a ´yi ɔ́ ti i bo cɛn wie.»

Zakɔb i wanndilɛ'n

⁴¹ Bé si i nuan b'ɔ yrali mannin Zakɔb'n ti, Ezau i nyin cili Zakɔb. Ɔ seli i klun lɔ kɛ: «Baba su cɛ-man kun. Sɛ ɔ wu'n, n ´kun Zakɔb.»

⁴² Rebeka tili i kɛ Ezau ɔ'a gugu kɛ ɔ ´yo Zakɔb like, yɛ ɔ flɛli Zakɔb-ɔ, ɔ seli i kɛ: «Ɔ niaan Ezau waan ɔ ´kun wɔ ´fa tu i klunngbɔ.

⁴³ I ti mín wa, jaso wa ko fia min niaan bian Laban sin Aran lɔ.

⁴⁴ Cɛ i wun lɔ kan man ɔ niaan'n i ya'n go nun ka.

⁴⁵ Sɛ n ´nian nan ɔ fua-man ɔ ti kɛ siɛn'n sa kun'n, nan i wla ɔ'a fi sa nga a yoli i'n su'n, n ko to wɔ ngaliɛ nan a ko ba. Kɛ be se kɛ amun nnyɔn'n amu'an fi min sa kpɛ kunngba'n, n su kwlɛ-mɛn i bo suan.»

⁴⁶ Yɛ Rebeka seli Izaak kɛ: «Ɛt bla'm be liɛ'n ɔ'a flan min. Sɛ Zakɔb ja Ɛt bla kɛ nga be o yɛ'm be sa'n, wuun be flɛ kɛ n liɛ'n a wie.»