Bo Bolɛ 23 - NYANMIƐN NDƐ'N 1998

Abraam i Sara i asieliɛ'n i tolɛ

¹ Sara dili afuɛ ya kun afuɛ ablaɔn-nin-nso yɛ ɔ wuli-ɔ.

² Ɔ wuli Kanaan mɛn'n nun Kirzat-Arba lɔ. Kirzat-Arba'n i kunngba'n yɛlɛ Ebrɔn. Abraam i yi'n i wie ndɛ'n ɔ wluli i wun dan, ɔ sunnin i,

³ kpɛkuun ɔ yacili saka'n lɛ ɔ ɔli kɛ ɔ ´ko kan ndɛ kle Ɛt i anunman mun.

⁴ I waan: «N ti aofuɛ yɛ m'an sike amun wun wa yɛ. I ti n ´srɛ amun, an `man min asiɛ nan n sie mín yi i saka'n.»

⁵ Yɛ Ɛt i anunman'm be tɛli i su kɛ:

⁶ «Nannan, man ɔ́ su ti o, kɛ a nin ye o wa'n, a ti e kpɛnngbɛn kun yɛ a o lɛ-ɔ. Nyanmiɛn nin wɔ o nun, ɔ man asieliɛ nga a wun i bɔ a klo i'n, sie ɔ́ yi fuɛn'n nun. E wie fi su ko se-man kɛ ɔ fɛ-mɛn i asieliɛ b'ɔ kpɛli'n ɔ man-man wɔ.»

⁷ Yɛ Abraam jaso lali klɔfuɛ'm be ase-ɔ.

⁸ Kpɛkuun ɔ seli be kɛ: «Sɛ sakpa amun waan n `sie mín yi Sara'n wa'n, an `yaci, an `srɛ Zosar i wa Efrɔn be man min.

⁹ Man ɔ fa Makpela yɛbuɛ buɛ b'ɔ o i lika'n i nuan su lɔ'n ɔ man min. Ɔ `bo i gua kpa'n amun nyrun wa.»

¹⁰ Kɛ ɔ ´yo sɔ'n, wuun Efrɔn nin i niaan Ɛtfuɛ'm be titi lɛ. Efrɔn tɛli Abraam su Ɛtfuɛ nga be bali klɔ'n i anuan'n nun ndɛ kanwlɛ lɛ'n be nyrun lɛ kɛ:

¹¹ «Nannan, nán man ɔ yo sɔ, sie ɔ́ yi'n. Lika'n nin yɛbuɛ buɛ'n n fa mannin wɔ. N fa cɛli wɔ e nvle'n nunfuɛ'm be kwlakwla be nyrun, sie ɔ saka'n nun.»

¹² Yɛ Abraam kotoli nan ɔ'a la ɔnvuɛ'm be ase ekun.

¹³ Nan ɔnvuɛ'm be kwlaa be nyrun lɛ ɔ'a kan kle Efrɔn kɛ: «Srɛlɛ yɛ n ´srɛ wɔ-ɔ, man n tannin lika'n i kalɛ. Ɔ li sɔ sika'n nun man n sie min saka'n.»

¹⁴ Efrɔn tɛli Abraam su kɛ:

¹⁵ «?Nannan, kaflɛ o, jɛtɛ ufue ya nnan lika nin-ɔn, nguɛ yɛ man ndɛnngan ´tran ye afiɛn-ɔn? Sie ɔ́ yi i saka'n.»

¹⁶ Abraam tili Efrɔn i ndɛ'n nan ɔ'a sunnzun sika ng'ɔ boli'n ɔ'a mɛn i Ɛtfuɛ'm be nyrun. Ɔ mɛnnin i jɛtɛ ufue ya nnan, jɛtɛ nga aata difuɛ'm be di su blɛ sɔ'n nun'n, i wie yɛ ɔ fa mɛnnin i-ɔ.

¹⁷ Ɔ man Efrɔn i lika ng'ɔ o Makpela lɔ Mamre ndɛnman'n lɛ'n, ɔ nin yɛbuɛ buɛ nin waka nga be o lika sɔ nun'n kwlaa,

¹⁸ be kacili Abraam liɛ. Ɔ yoli Ɛtfuɛ nga be bali klɔ'n i anuan'n nun lɛ'n be kwlaa be nyrun.

¹⁹ Yɛ Abraam ko sieli i yi Sara i fuɛn'n Makpela lika'n nun yɛbuɛ buɛ ng'ɔ o Mamre ndɛnman'n nun-ɔn. Lika sɔ'n wo Ebrɔn lɔ Kanaan mɛn'n nun.

²⁰ Lika sɔ'n ɔ nin yɛbuɛ buɛ ng'ɔ o nun'n be kacili Abraam i asieliɛ titi.