Bo Bolɛ 21 - NYANMIƐN NDƐ'N 1998

Izaak i awuliɛ

¹ Anannganman sili Sara i aunnvuɛ. Ɔ yiali ndɛ ng'ɔ kan kleli i'n i nuan mɛnnin i.

² Ɔ nin Abraam bɔ ɔ'a yo oke'n be wunnzɛli nan ɔ'a wu ba yasua kun ɔ'a mɛn i blɛ nga Nyanmiɛn kleli'n nun.

³ Abraam tɔnnin ba nga Sara wuli i'n i dunman kɛ Izaak.

⁴ Kɛ ba'n dili le mɔcuɛ'n, ɔ wlɛli i klɛn kɛ Nyanmiɛn waan ɔ yo'n sa.

⁵ Kɛ be ´wu Izaak'n, wuun Abraam lɛ afuɛ ya.

⁶ Sara seli kɛ: «Ee! Min yɛ Nyanmiɛn man m'an kwla sri yɛ. Sran kwlaa ng'ɔ ti ndɛ nga'n ɔ ´kle i srilɛ.»

⁷ Ɔ seli kɛ: «?Laa'n, wan yɛ ɔ se Abraam kɛ Sara ´man ba nyɔnflɛn le-ɔ ɔ ´fa su-ɔ? Sanngɛ ɔ nin kpɛnngbɛn nga ɔ'a yo lɛ'n bɔbɔ, m'an wu ba yasua kun m'an mɛn i.»

Agar nin Ismaɛl be fuanlɛ

⁸ Ba'n yoli kpa, be kpɛli i nyɔnflɛn. I nyɔnflɛn kpɛlɛ nun'n, Abraam man be dili cɛn dan kpa.

⁹ Le kun Sara ´nian-an, Agar b'ɔ fin Ezipt'n i wa ng'ɔ nin Abraam be wuli i'n ɔ su to i wa Izaak i mma.

¹⁰ Yɛ ɔ seli Abraam kɛ: «Kan afanniɛn bla ng'ɔ o lɛ'n ɔ nin i wa'n be bo wa! Nán ɔ nin mín wa Izaak yɛ be ´di aja nin-ɔn .»

¹¹ Ndɛ sɔ'n ɔ'a yo-man Abraam fɛ mlɔnmlɔn, afin i wa yɛlɛ Ismaɛl.

¹² Sanngɛ Nyanmiɛn seli i kɛ: «Wɔ afanniɛn bla'n nin i wa yasua'n be ti nán koko. Ndɛ nga Sara kɛnnin i lɛ'n yɛ yo-ɔ. Afin osu nga n kɛnnin i kɛ m ´man wɔ'n ɔ fin Izaak.

¹³ Sanngɛ wɔ afanniɛn bla'n i wa'n i osu liɛ'n kusu ɔ wa trɛ wie, ɔ ´kaci nvle kun, afin ɔ wa wie-ɔ.»

¹⁴ Yɛ Abraam jasoli nglɛmun tutu kpa'n, ɔ fali like diwa nin nzue kplo kun mannin Agar, ɔ fali ba'n sieli i sin nan ɔ'a se i kɛ be wɔ. Agar toli i ti Beɛr-Seba aawlɛ flɛnnɛn'n nun lɔ.

¹⁵ Kɛ nzue'n wieli kplo'n nun'n, ɔ lali ba'n waka kaan wie bo.

¹⁶ Kpɛkuun ɔ ko trannin klɛ nun. Ɔ nin ba'n be afiɛn'n ti kɛ ta nga be to'n i juwlɛ kun sa, afin i waan: «Nán mín wa'n wu min nyrun,» ɔ ko trannin klɛ nun yɛ ɔ sun-ɔn.

¹⁷ Nyanmiɛn tili ba'n i sunlɛ'n. Nyanmiɛn i anz'n wo nyanmiɛn su lɔ ɔ flɛli Agar. Ɔ usɛli i kɛ: «?Agar, nguɛ sa-a? Nán srɛ kun wɔ. Nyanmiɛn tili ba'n i sunlɛ'n kan i bɔbɔ o lɔ'n.

¹⁸ Jaso ko man ba'n su nan trɛ i sa. N ´yo man i osu'n ɔ ´trɛ ɔ ´kaci nvle dan.»

¹⁹ Yɛ Nyanmiɛn tikeli Agar i nyinma kpɛkuun ɔ ´nian-an, gbo yɛ, nzue o nun. Nan ɔ'a fa kplo'n ɔ'a ko sa wie nan ba'n ɔ'a nɔn.

²⁰ Nyanmiɛn man ba'n nyinnin. Ba'n trannin Paran aawlɛ flɛnnɛn'n nun lɔ. Ɔ yoli ta tofuɛ.

²¹ Ɔ trannin Paran aawlɛ flɛnnɛn'n nun lɔ. I nin kunndɛli Ezipt bla mɛnnin i.

Abraam nin Abimelɛk be aenguɛ tralɛ

²² I blɛ sɔ nun'n, Abimelɛk nin i sonja'm be su kpɛnngbɛn Pikɔl be bali Abraam i wun wunlɛ. Abimelɛk seli Abraam kɛ: «Like kwlaa nga a yo'n, Nyanmiɛn jin ɔ sin.

²³ I sɔ'n ti, fa Nyanmiɛn dunman'n fua kle min ndɛ kɛ a su yo-man m bɔbɔ annzɛ min mma mun, annzɛ min anunman mun e tɛ, nan kpa nga n fa yoli wɔ'n, a ´nian su yo min nin mín mɛn nga a o nun yɛ'n e wie.»

²⁴ Abraam seli i kɛ: «N kan Nyanmiɛn.»

²⁵ Sanngɛ gbo wie bɔ Abimelɛk i sufuɛ'm be deli i be wue kekle su bɔ ɔ'a yo-mɛn i fɛ'n, ɔ kɛnnin i ndɛ kleli i.

²⁶ Yɛ Abimelɛk waan: «M'an ti-mɛn i mlɔnmlɔn. Ɔ kusu a nian kan kle-man min le, san ndɛkɛn.»

²⁷ Yɛ Abraam fali bua mun nin boli mun, ɔ nin nannin mun ɔ fa mannin Abimelɛk nan be sran nnyɔn'm b'a tra aenguɛ.

²⁸ I sin'n, Abraam fali bua bla nso sieli be ngunmin.

²⁹ Yɛ Abimelɛk usɛli i kɛ: «?A ´fa bua bla nso nga a ´sie be ngunmin yo i sɛ?»

³⁰ Nan Abraam ɔ'a tɛ i su kɛ: «N waan n ´fa man wɔ. Ɔ ti nzɔliɛ kun b'ɔ kle kɛ min yɛ n kpɛli gbo nga-a.»

³¹ I sɔ'n ti yɛ be flɛli lika sɔ'n kɛ Beɛr-Seba nin-ɔn, afin lɛ yɛ be sran nnyɔn'm be tatali be wun nda nin-ɔn.

³² Be trali aenguɛ Beɛr-Seba lɛ, nan Abimelɛk nin i sonja'm be su kpɛnngbɛn'n Pikɔl b'a jaso, nan b'a sa be sin Filistifuɛ'm bé mɛn'n nun lɔ.

³³ Abraam tali tamaris waka kun Beɛr-Seba lɛ nan ɔ'a bo Anannganman b'ɔ ti adudua'n i dunman ɔ'a srɛ i.

³⁴ Abraam trannin Filistifuɛ'm bé mɛn'n nun lɛ cɛli.