Bo Bolɛ 2 - NYANMIƐN NDƐ'N 1998

¹ Kɛ nglo nin asiɛ'n, ɔ nin be su ninnge'm be yilɛ'n yoli sa.

² Kɛ cɛn nso'n ´ju'n, wuun Nyanmiɛn ɔ'a wie junman'n kwlakwla di. Ɔ man cɛn nso su'n ɔ deli wunmiɛn .

³ Nyanmiɛn fali cɛn sɔ'n yoli wunmiɛn-delɛ-cɛn, ɔ sieli i ngunmin. Afin cɛn sɔ'n nun yɛ ɔ yacili mɛn'n i yilɛ junman'n dilɛ yɛ ɔ deli wunmiɛn-ɔn .

⁴ Nglo nin asiɛ'n be yilɛ'n i wun ndɛ yɛ ɔ o lɛ-ɔ. Kɛ Anannganman Nyanmiɛn ´yi nglo nin asiɛ'n,

Edɛni fie'n

⁵ wuun waka nun-man lɛ'n, wuun nnya-nnya fi nian fifi-man. Afin i blɛ sɔ nun'n, wuun Anannganman Nyanmiɛn nian tɔ-man nzue asiɛ'n su. Yɛ sran fi kusu nun-man lɛ b'ɔ ´di fie-ɔ.

⁶ Nzue'n fin asiɛ'n bo, ɔ nyrɛn yɛ ɔ lualua asiɛ nin-ɔn.

⁷ Kpɛkuun Anannganman Nyanmiɛn fali fa nan ɔ'a fa yi sran kun, yɛ ɔ fitali sran'n i bue'n nun yɛ sran'n deli wunmiɛn-ɔn , yɛ ɔ nyannin nguan-an.

⁸ Kpɛkuun Anannganman Nyanmiɛn dili fie Edɛni wia afiliɛ lɔ lika'n nun, nan ɔ'a fa sran b'ɔ yili'n ɔ'a sie i lɔ.

⁹ Anannganman Nyanmiɛn yoli man waka nga be wun be-ɔ, be ko klo be'n, bɔ kusu be mma'm be yo fɛ'n, be fifili lɔ. Nguan waka'n, ɔ nin sa tɛ nin sa kpa'n be silɛ waka'n be o fie'n i afiɛn .

¹⁰ Nzue ba kun fin Edɛni sonji sin fie'n nun. Kɛ ɔ fɛ i lɛ'n, ɔ kpacikpaci sama nnan.

¹¹ I sama klikli'n, be flɛ i Pisɔn, i yɛ ɔ sin yia Avila mɛn'n bɔ sika ɔkwlɛ o lɔ nin-ɔn.

¹² Sika ɔkwlɛ sɔ'n i kpa liɛ'n lɛ-man wunsu. Waka bue nzue kun b'ɔ bɔn fannin kpa'n, ɔ nin yɛbuɛ kpakpa kun be o mɛn sɔ'n nun lɔ.

¹³ Nzue sɔ'n i sama nnyɔn su'n yɛlɛ Giɔn, ɔ sin yia Kis mɛn'n.

¹⁴ I nsan su'n yɛlɛ Idekɛl, ɔ sin Azir klɔ'n i bue ng'ɔ kpɛ wia afiliɛ lɔ'n su. I nnan su'n yɛlɛ Efrat.

¹⁵ Yɛ Anannganman Nyanmiɛn fali sran'n sieli Edɛni fie'n nun kɛ ɔ `di nun junman nan ɔ nian su.

¹⁶ Anannganman Nyanmiɛn wlali sran'n i su nun kɛ: «Fie'n nun waka mun yɛ be o lɛ-ɔ, be mma kwlaa nga ɔ waan a ´di'n, di.

¹⁷ Sanngɛ sa kpa'n nin sa tɛ'n be silɛ waka'n i mma liɛ'n, nán di i li. Sɛ a di'n, san wulɛ cɛ yɛ a ´wu-ɔ.»

¹⁸ Kpɛkuun Anannganman Nyanmiɛn'n waan: «Ɔ ti-man kpa kɛ sran ngunmin tran. N wa yo i ukafuɛ kun b'ɔ nin i be ´kwla tran.»

¹⁹ Yɛ Anannganman Nyanmiɛn'n fali blo nnɛn nin anunman ng'ɔ fali asiɛ yili be'n be kwlaa bali sran'n i wun lɛ kɛ ɔ tɔn be dunman nan ɔ nian. Dunman kwlaa nga sran'n ko tɔn nnɛn kun'n, i yɛ ɔ ti i dunman-an.

²⁰ Sran'n tɔnnin klɔ nnɛn nin anunman, ɔ nin blo nnɛn'm be dunman. Sanngɛ ɔ'a nyan-man ukafuɛ kun b'ɔ nin i kwla tran-an.

²¹ Yɛ Anannganman Nyanmiɛn yoli man sran'n ɔ wa lafili kpa sa pɔɔ nan ɔ'a yi i nvɛnma kun. I sin ɔ fɛ i lɛ nnɛn'n sieli i osu'n nun.

²² Yɛ Anannganman Nyanmiɛn fɛli i nvɛnma kun sɔ'n fa yili bla nan ɔ'a fɛ i ɔ'a ɔ yasua'n wun lɔ.

²³ Kpɛkuun yasua'n waan: «Ɛn-ɛɛn! Nga li ti kɛ m bɔbɔ min sa. Min nin i e wunnɛn'n ti kun. Man be flɛ i bla, afin ɔ fin yasua'n nun.»

²⁴ I sɔ'n ti yɛ ɔ fata kɛ yasua kpaci i si nin i nin, yɛ ɔ fɛ i wun mɛntɛn i yi nan be nnyɔn'n be kaci sran wunmuan nin-ɔn .

²⁵ Yasua'n nin bla'n bé wun ti kplɛn, sanngɛ nyannzuɛn kaan sa kun-man be.