Bo Bolɛ 19 - NYANMIƐN NDƐ'N 1998

Lɔt i ti nyanlɛ

¹ Anz nnyɔn'm be juli Sodɔm lɔ nnɔsua nun. Kɛ be ´ju lɔ'n, wuun Lɔt ti Sodɔm klɔ i anuan'n nun lɛ. Kɛ Lɔt wunnin be'n yɛ ɔ jaso ko kpali be atin-ɔn, yɛ ɔ kotoli be bo yɛ ɔ kplɛnnin i ti ase-ɔ.

² Ɔ seli be kɛ: «Nannan mun, amun `yaci, an `ju min awlo lɔ. An `ko wunnzin amun ja wun nan e la. Ainman nglɛmun wuun amu'an `wɔ kan an ´kɔ'n.» Be tɛli i su kɛ: «Cɛcɛ, man e la gua'n su.»

³ Nan Lɔt ɔ'a kpata be lele nan b'a ju i awlo lɔ. Ɔ tɔnnin aliɛ mannin be. Ɔ tɔnnin kpaun nga be gua-man nun kpaun ayre'n mannin be nan b'a di.

⁴ Be nian ɔ-man lalɛ kpɛkuun Sodɔm klɔ'n su yasua mun, i gbanflɛn mun o, i kpɛnngbɛn mun o, ɔ lɛ-man be nun kun, be kwlakwla'n b'a a bo b'a sin b'a yia sua'n.

⁵ Yɛ be flɛli Lɔt-ɔ, be usɛli i kɛ: «?Sran nga be bali wɔ awlo wa kɔnguɛ'n, be o nin? Fa be fite wa man e nin be e la.»

⁶ Yɛ Lɔt ´fite jran i sua'n i anuan'n nun-ɔn. Ɔ nyinnin anuan'n i sin

⁷ nan ɔ'a se be kɛ: «Nja mun, nán an bo tete nga.

⁸ N wa talua nnyɔn be o wa, be nin yasua nian si-man sua le. Man n fa be n fite wa nan nga amun waan amun ´yo'n amun nin be yo. Nan sran nga an kan be ndɛ lɛ liɛ'n, kɛ bɔ b'a sike min awlo'n, nán amun nin be yo.»

⁹ Yɛ be tɛli i su kɛ: «Fɛ i li sɔ'n jaso lɛ.» Wie waan: «Nin i li i aofuɛ'n, ɔ cici-mɛn i wun atin nuan, ɔ'a yo i wun jɔlɛ difuɛ. Jran ke, nyrɛnnɛn nga e wa kle wɔ'n, ɔ ´tra be liɛ'n.» Kɛ e ijɔ wa-a, b'a su Lɔt bo be su wa bu anuan'n.

¹⁰ Yɛ sran nnyɔn'm be toli bé sa be trali Lɔt-ɔ, be fɛ i wluli be sin lɔ nan b'a nyin anuan'n.

¹¹ Be sili sran nga be o anuan'n nun'n be nyinma'n, i gbanflɛn o, i kpɛnngbɛn o, ɔ man b'a kwla wun-man anuan'n kun.

¹² Sran nnyɔn'm be usali Lɔt kɛ: «?Ɔ wan yɛ ɔ o wa ekun-ɔn? Ɔ sran kwlaa nga be o wa'n, sɛ ɔ sia o, sɛ ɔ́ wa yasua o, sɛ ɔ́ wa bla o, fa be kwlaa sɔ'n klɔ'n nun fite.

¹³ E wa nunnun i. Sa nga klɔ'n sufuɛ'm be yo bɔ Anannganman ti'n, ɔ ti-man blɛblɛ. I sɔ'n ti, ɔ sunmannin e kɛ e wa nunnun klɔ'n.»

¹⁴ Yɛ Lɔt fiteli-ɔ, ɔ ko toli i wa bla'm bé wun mun nan ɔ'a se be kɛ: «Anannganman su wa nunnun klɔ'n, an `jaso su ndɛndɛ.» Sanngɛ ng'ɔ ´kɛn i lɛ'n ti be nyrun ndɛ finfin.

¹⁵ Kɛ lika'n ´yo muaan'n, anz'm be jin Lɔt wun, be waan: «Jaso, a nin ɔ́ yi yɛ ɔ́ wa bla nnyɔn mun, an `fite. Sɛ ɔ'a yo-man sɔ-ɔ, kɛ klɔ'n ´saci'n, amun ´wu wie.»

¹⁶ Be ´nian-an, ɔ tɛ kpɛkpɛ i wun, sanngɛ kɛ Anannganman waan ɔ fite nun'n ti man be trɛli i ɔ nin i yi nin i mma mun bé sa nan b'a fa be b'a ko sie be klɔ'n i sin lɔ.

¹⁷ Kɛ be fali be ko sieli i lɔ'n, kun seli Lɔt kɛ: «Wanndi kɔ nan w'a nyan ɔ́ ti. Ɔ kɔlɛ su'n, nán nian ɔ sin, nán jran lika fi wa asa'n su. Wanndi kɔ oka'n bo lɔ nan w'a wu-man.»

¹⁸ Lɔt usɛli i kɛ: «?Nannan n ju lɔ sɛ yɛ ɔ yo ye-ɔ?

¹⁹ A sili min aunnvuɛ, a yoli min ye dan. Ɔ waan n ka nguan nun. Sanngɛ kusu, n su kwla wanndi ju-man oka'n bo lɔ nan nyrɛnnɛn sa'n ɔ'a ju. San n ´wu.

²⁰ Klɔ kaan kun yɛ ɔ o lɔ lɛ-ɔ, ɔ nun-man mmua ngboko, n wanndi n ju lɔ-ɔ ɔ yo ye. Ɔ ti kaan sɔ, sanngɛ n fia lɔ-ɔ ɔ yo ye.»

²¹ Yɛ anz'n seli i kɛ: «N tili, n ´si wɔ aunnvuɛ ekun, n su nunnun-man klɔ nga a ´kɛn i ndɛ lɛ sɔ'n.

²² Sanngɛ kɔ ndɛndɛ ko fia lɔ. Sɛ a nian ju-man lɔ'n, like nga n waan n ´yo'n n nian yo-man.» I ti yɛ be flɛli klɔ sɔ'n kɛ Zɔar nin-ɔn.

²³ Kɛ Lɔt ´ju Zɔar lɔ'n, wuun wia'n ɔ'a man su.

²⁴ Yɛ Anannganman yoli man Sufru fin nglo lɔ jue guali Sodɔm klɔ'n nin Gomɔr klɔ'n be su. Ɔ guali be su dan.

²⁵ Ɔ nunnunnin klɔ sɔ mun nin be asa'n kwlaa su sran mun, ɔ nin be bo'm be kwlakwla .

²⁶ Lɔt i yi'n niɛnnin i sin, kpɛkuun ɔ kacili njin yɛbuɛ.

²⁷ Nglɛmun tutu kpa'n, Abraam ɔli kan ɔ nin Anannganman be jrannin lɔ'n.

²⁸ Ɔ ´nian Sodɔm nin Gomɔr be asa'n su lɔ'n, sin wɛnsrɛn su fite lɔ kɛ lika wie yɛ ɔ su yra sa.

²⁹ Kɛ Nyanmiɛn ´nunnun lika sɔ'm be nun klɔ mun'n, i nyin ɔ'a tra-man Abraam su. Ɔ yili Lɔt klɔ sɔ bɔ i waan ɔ ´nunnun be'n be nun fiteli.

Lɔt nin i mma mmla mun

³⁰ Kɛ Lɔt o Zɔar lɛ'n, srɛ b'ɔ kun i'n ti ɔ nin i wa bla nnyɔn'm be tuli lɛ be ko trannin oka'n bo lɔ. Be ko trannin yɛbuɛ buɛ wie nun.

³¹ Yɛ i wa bla kpɛnngbɛn'n seli i sinma'n kɛ: «E si yɛ ɔ'a yo kpɛnngbɛn yɛ, kusu yasua nun-man wa nan ɔ'a ja e kɛ be fa yo i lika'n kwlaa'n sa.

³² I sɔ'n ti, man e mɛn i nzan nan ɔ bo, i liɛ'n, ɔ nin e la yɛ i osu'n ɔ su nunnun-man.»

³³ Yɛ be ´man bé si i nzan kɔnguɛ sɔ'n yɛ ɔ ´bo-ɔ, nan ba bla kpɛnngbɛn'n nin i b'a la. Kɛ talua'n wa la o, kɛ ɔ ´jaso o, bian'n ɔ'a wun-man nun.

³⁴ Kɛ aliɛ'n cɛnnin'n, kpɛnngbɛn'n seli i sinma'n kɛ: «Anunman e nin baba e lali. E `mɛn i nzan ekun ndɛ kɔnguɛ man ɔ bo nan a nin i be ko la nan i osu'n ɔ'a nunnun-man.»

³⁵ Yɛ kɔnguɛ sɔ'n be ´man bé si'n i nzan ɔ ´bo yɛ ba bla kasiɛn'n nin i be ´ko la-a. Kɛ talua'n wa la o, kɛ ɔ ´jaso o, bian'n ɔ'a wun-man nun.

³⁶ Ɔ fa yoli Lɔt wa bla nnyɔn'm be wunnzɛlɛ.

³⁷ Kpɛnngbɛn'n wuli ba yasua kun nan ɔ'a tɔn i dunman kɛ Moab. I yɛ ɔ ti Moabfuɛ nga be o lɛ ndɛ yɛ'n be nannan nin-ɔn.

³⁸ Kaan'n kusu wuli ba yasua kun nan ɔ'a tɔn i dunman kɛ Bɛn-Ami. I yɛ ɔ ti Amɔnfuɛ nga be o lɛ ndɛ yɛ'n be nannan nin-ɔn.