Bo Bolɛ 18 - NYANMIƐN NDƐ'N 1998

Nyanmiɛn fiteli Abraam nyrun ekun

¹ Anannganman fiteli Abraam i nyrun Mamre i sɛni waka'm be bo lɛ wia fiaan kpa'n nun. Kɛ ɔ ´yo sɔ'n, wuun Abraam ti i tannin sua'n i anuan'n nun lɛ.

² Kɛ ɔ ´mɛn i nyin su nian-an sran nsan be jinjin lɛ, nan ɔ'a wanndi ɔ'a ko kpa be atin. Kɛ ɔ nin be yiali'n, ɔ kotoli be bo

³ nan ɔ'a se kɛ: «Nannan, yaci, ju min awlo lɔ nan w'a ɔ.

^4-5 Kɛ bɔ amu'an to mín wa'n, man be fa nzue be wunnzin amún ja wun nan an de wunmiɛn waka yɛ'n i bo. Man m blɛ amun like kan nan an fa tra amun anwlɛn nan amu'an wɔ be nyrun.» Yɛ be tɛli i su kɛ: «E tili.»

⁶ Yɛ Abraam ´kɔ tannin sua'n nun lɔ ndɛndɛ ´ko se Sara kɛ: «Kan ɔ wun fɔtɔ sanmlɛn mlɛnnɛnnɛn'n i sunnzunliɛ nsan, fa yo kpaun nga be gua-man nun kpaun ayre'n.»

⁷ Yɛ ɔ wanndi ɔli nnɛn'm be tuin'n nun lɔ ko fali nannin bɔ b'a kpɛ cro bɔ be nnɛn'n nian tin-man'n be nun kun, nan ɔ'a fa mɛn i gbanflɛn'n kun nan ɔ'a yo i ndɛndɛ.

⁸ Kpɛkuun ɔ fali nɔnnɔn nga ɔ'a lafi'n nin nɔnnɔn mɔnnɛn, ɔ nin nnɛn bɔ be tɔnnin'n, nan ɔ'a fa man be. Abraam bɔbɔ jin bé wun waka'n bo lɛ. Yɛ be dili-ɔ.

⁹ Nan b'a usɛ i kɛ: «?Ɔ yi Sara o nin?» Ɔ tɛli be su kɛ: «Ɔ o tannin sua'n nun lɔ.»

¹⁰ Yɛ be nun kun seli i kɛ: «Afuɛ ng'ɔ ´ba lɔ bikisa'n, m ´ba wa ekun. Kɛ m ´ba'n, wuun ɔ́ yi Sara ɔ'a wu ba yasua kun.» Kɛ ɔ ´yo sɔ'n, wuun Sara o tannin sua'n i anuan'n nun lɛ Abraam i kɔminsin lɔ, kannzu ɔ tili.

¹¹ I blɛ sɔ nun'n, wuun Abraam nin Sara b'a yo kpɛnngbɛn, wuun b'a yo oke. Sara lafi-man su kɛ ɔ ´wu ba kun.

¹² Ɔ man Sara srili, ɔ seli i klun lɔ kɛ: «?Oke nga m'an yo i yɛ'n, min konvi tɛ sɔ bian ekun? Yɛ kusu mín wun'n ɔ'a yo oke.»

¹³ Yɛ Anannganman usali Abraam kɛ: «?Nguɛ ti yɛ Sara sri b'ɔ se kɛ: ‹?Min oke nga m'an yo i yɛ'n, n wu ba sɛ ekun yɛ ɔ tɛ yo ye-ɔ?›

¹⁴ ?Like kun wo lɛ bɔ i yolɛ ti kekle man Anannganman nin-ɔn? N se kɛ afuɛ ng'ɔ ´ba lɔ bikisa'n, kɛ m ´ba'n, wuun Sara ɔ'a wu ba yasua kun .»

¹⁵ Srɛ b'ɔ kun Sara'n ti ɔ sali, ɔ seli kɛ: «M'an sri-man o.» Nan Anannganman ɔ'a tɛ i su kɛ: «Ato-ɔ, a srili.»

¹⁶ Kɛ sran sɔ'm be jasoli bɔ be ´kɔ'n, be niannin Sodɔm bue liɛ'n su lɔ. Abraam ɔli be atin gualɛ.

¹⁷ Yɛ Anannganman seli kɛ: «N fa sa nga n wa yo'n n fia Abraam wun-ɔn ɔ yo-man ye.

¹⁸ Afin i osu'n ɔ wa trɛ dan yɛ ɔ ´nyan kwlalɛ. Abraam dunman nun yɛ n ´yo asiɛ'n su nvle'm be kwlaa be ye-ɔ.

¹⁹ M'an kpɛ i kɛ ɔ kan kle i mma mun nin be anunman nga be ´wu be'n be kɛ be `fa min atin'n su be nanti sɛsɛ, nan m'an yo like nga n kan kleli i kɛ n ´yo'n.»

²⁰ Yɛ ɔ seli Abraam kɛ: «Sa nga n ti i kɛ Sodɔmfuɛ mun nin Gomɔrfuɛ'm be yo'n, ɔ yo sro. Bé sa tɛ'n yo nɔnnin.

²¹ Ɔ man ɔ ti bɔ n `jra n nian sɛ sa nga be yo'n nin be wun ndɛ nga n ti'n sɛ ɔ ti nanwlɛ o.»

²² Kɛ sran'm be fɛli i lɛ bɔ be ´kɔ Sodɔm'n, wuun Abraam kusu nin Anannganman be tɛ o lɛ.

²³ Abraam wunngeli Anannganman wun lɔ, ɔ usɛli i kɛ: «?Nan a ´kan sran kpa mun nin sran tɛ mun bo nun a ´nunnun be ngba?

²⁴ ?Wienun-ɔn, sɛ sran kpa ablenun be o klɔ'n nun'n, a ´nunnun klɔ'n? ?A su yaci-man klɔ sɔ'n i lɛ sran kpa ablenun sɔ'm be dunman nun?

²⁵ N si kɛ a su nunnun-man klɔ'n. Kɛ a ´kan sran kpa mun nin sran tɛ mun bo nun a ´kun be'n nan sa nga ɔ ´ju sran kpa'm be su nin ng'ɔ ´ju sran tɛ'm be su'n be yo kun liɛ'n, a su yo-mɛn i sɔ mlɔnmlɔn. ?Wɔ bɔ a di asiɛ'n sufuɛ'm be kwlaa be jɔlɛ'n, sɛ a di-man nanwlɛ'n, wan yɛ ɔ di i ekun-ɔn?»

²⁶ Anannganman tɛli i su kɛ: «Sɛ n wun sran kpa ablenun Sodɔm klɔ'n nun'n, n ´yaci klɔ'n i lɛ be dunman nun.»

²⁷ Yɛ Abraam waan: «Nannan, n ti asiɛ wun fa, sanngɛ n tu wɔ kpli kaflɛ, man n kan kun ekun.

²⁸ ?Sɛ sran kpa'm be ju-man ablenun kpa nan nnun kpɛ su nin? ?Be nnun bɔ be kpɛ su'n ti a ´nunnun klɔ wunmuan'n?» Yɛ Anannganman waan: «Sɛ n wun sran kpa ablanan-nin-nnun'n, n su nunnun-man klɔ'n.»

²⁹ Yɛ Abraam usɛli i ekun kɛ: «?Yɛ sɛ be ti ablanan'n nin?» Anannganman waan: «Sɛ be ti ablanan-an, be ablanan sɔ'n be ti n su saci-mɛn i.»

³⁰ Yɛ Abraam waan: «Nannan, n tu wɔ kpli, nán fa ya, man n kan kun ekun. ?Sɛ sran kpa ablasan yɛ be o lɔ'n nin?» Anannganman waan: «Sɛ be ti ablasan-an, n su saci-man klɔ'n.»

³¹ Yɛ Abraam seli ekun kɛ: «N tu kpli o, kaflɛ, man n kan kun ekun. ?Sɛ sran kpa ablaɔn yɛ be o lɔ'n nin?» Anannganman waan: «Sɛ be ti ablaɔn-ɔn, n su nunnun-man klɔ'n.»

³² Abraam waan: «Nannan, nán fa ya o, kɛ n kan nga-a, n su kan-man wie kun. ?Sɛ sran kpa blu yɛ be o lɔ'n nin?» Anannganman waan: «Sɛ be ti blu-ɔ, n su saci-man klɔ'n.»

³³ Kɛ Anannganman nin Abraam be wieli ijɔ'n yɛ ɔ ɔli-ɔ. Abraam kusu sɛli i sin i awlo.