Bo Bolɛ 16 - NYANMIƐN NDƐ'N 1998

Ismaɛl i awuliɛ'n i ndɛ

¹ Abram i yi Sarai ɔ'a wu-man ba, kusu i afanniɛn bla kun o lɛ, ɔ ti Eziptfuɛ, be flɛ i kɛ Agar.

² Le kun Sarai seli Abram kɛ: «Kɛ bɔ Anannganman man m'an wu-man min ku sɛ nun ba nin-ɔn, kɔ min afanniɛn bla i wun, sɛ ɔ ´wu ba yasua kun man min o.» Abram fali ndɛ nga Sarai kan kleli i'n su.

³ Ɔ man Sarai fɛli i Ezipt afanniɛn bla Agar mɛnnin i wun Abram kɛ ɔ fa yo i yi. Kɛ ɔ ´yo sɔ'n, wuun Abram ɔ'a di Kanaan mɛn'n nun lɔ afuɛ blu.

⁴ Abram nin Agar be sili sua, kpɛkuun Agar wunnzɛli. Kɛ b'ɔ ´nian-an ɔ'a wunnzɛ'n ti, siɛn'n, ɔ yo i min bla'n i finfin.

⁵ Yɛ Sarai seli Abram kɛ: «Fiaan nga be ´yo min lɛ'n, e sran nnyɔn'n yɛ be ´yo e lɛ-ɔ. M bɔbɔ min yɛ n fali min afanniɛn bla'n m mannin wɔ kɛ amun si sua nan ɔ `wunnzɛ-ɔ, kpɛkuun ɔ bu-man min like fi kun. Man Anannganman bɔbɔ di e nin wɔ e sran nnyɔn'n ye afiɛn jɔlɛ.»

⁶ Abram kusu tɛli Sarai su kɛ: «Ɔ bɔbɔ wɔ afanniɛn bla-a, ɔ o ɔ́ sa nun. Like kwlaa nga a klo kɛ a fa yo i'n, yo.» Ɔ man Sarai yoli Agar i tɛtɛ lele ɔ wanndili i.

⁷ Anannganman i anz'n ko toli Agar aawlɛ flɛnnɛn'n nun lɔ nzue ti ng'ɔ o Sir atin'n su'n i nuan lɔ.

⁸ Nan ɔ'a flɛ i: «Agar, Sarai i afanniɛn bla. ?A fin nin ko nin?» Agar tɛli i su kɛ: «N su wanndi min min bla Sarai.»

⁹ Yɛ Anannganman i anz'n waan: «Sa ɔ sin kɔ ɔ min bla'n i sin nan kan ɔ wun ase i bo.»

¹⁰ Anz'n seli i ekun kɛ: «Anannganman man ɔ osu'n ɔ wa trɛ dan. Be ka i nun sran mun-ɔn ɔ su yo-man ye.

¹¹ Wunnzɛlɛ nga w'a wunnzɛ yɛ'n, a wa wu ba yasua kun. A ´tɔn i dunman kɛ Ismaɛl yɛlɛ kɛ Anannganman tili wɔ aunnvuɛ sunlɛ'n.

¹² Ba sɔ'n ɔ ´yo kɛ blo aflunmun sa. Ɔ nin sran'm be kwlaa be ´kun, sran'm be kwlaa kusu be nin i be ´kun. Ɔ ´trɛn i ngunmin, ɔ nin i niaan'm be su tran-man likawlɛ.»

¹³ Agar waan: «?Nán wa yɛ n wunnin Nyanmiɛn b'ɔ wunnin min nin-ɔn?» I ti ɔ flɛli Anannganman b'ɔ nin i ijɔli'n kɛ: Ɛl-Rɔi «A suan Nyanmiɛn'n b'ɔ wun min'n.»

¹⁴ I ti yɛ be flɛ gbo ng'ɔ o Kadɛs nin Barɛd be afiɛn'n kɛ Lasai-Rɔi gbo nin-ɔn.

¹⁵ Agar nin Abram be wuli ba yasua kun, nan Abram ɔ'a flɛ ba sɔ'n kɛ Ismaɛl.

¹⁶ Kɛ Agar ´wu Ismaɛl'n, wuun Abram lɛ afuɛ ablaɔcuɛ-nin-nsiɛn.