Bo Bolɛ 15 - NYANMIƐN NDƐ'N 1998

Nyanmiɛn waan ɔ ´fa Kanaan mɛn'n ɔ ´man Abram nin i anunman mun

¹ Kɛ ɔ yoli sɔ'n, Anannganman fiteli Abram nyrun aolia nun nan ɔ'a se i kɛ: «Abram, nán srɛ kun wɔ. N ti wɔ sasafuɛ, ɔ mo yolɛ'n ɔ wa yo dan mín sa nun.»

^2-3 Abram seli i kɛ: «Anannganman min Min, m'an wu-man ba. ?Nguɛ like cɛ yɛ a ´man min-ɔn? Min aja difuɛ'n yɛlɛ Eliezɛr b'ɔ fin Damas'n i kunngba. A man-man min ba, ɔ man min sufuɛ'n yɛ ɔ ´yo min aja difuɛ-ɔ.»

⁴ Kpɛkuun Anannganman waan: «Nɛ́n i yɛ ɔ ´yo wɔ aja difuɛ-ɔ.»

⁵ Yɛ ɔ fɛ i fiteli nan ɔ'a se i kɛ: «Man ɔ nyin'n su nian nglo lɔ. Sɛ a kwla ka nzraama mun'n, ka be man n nian. Kɛ wɔ anunman'm be wa sɔn kpanngban sɔ-ɔ.»

⁶ Ndɛ nga Anannganman kɛnnin i lɛ'n, Abram lafili su, ɔ man Anannganman buli i sran kpa .

⁷ Yɛ Anannganman seli i kɛ: «Min yɛ n fali wɔ Babilɔni nvle'n nun klɔ nga be flɛ i Ir'n su lɔ m bali wa kɛ n ´fa mɛn nga m ´man wɔ nin-ɔn.»

⁸ Abram usɛli i kɛ: «?Anannganman min Min, nguɛ like yɛ man n ´kwla wun kɛ mɛn nga ´yo n liɛ-ɔ?»

⁹ Yɛ Anannganman waan: «Fa nannin talua kun, boli nin kun, ɔ nin bua nene kun bɔ b'a di afuɛ nsan-nsan, ɔ nin ablioso nin okunmomo ba kun, fa be bla.»

¹⁰ Yɛ Abram ´fa nnɛn nga Anannganman kleli'n ´ba-a, yɛ ɔ ´kpaci be nun nnyɔn-nnyɔn sɛsɛsɛ-ɔ. Ɔ fali be bue nnyɔn-nnyɔn sɔ'n bé nyin'n wɔwɔli su. Sanngɛ anunman'm be liɛ'n ɔ'a kpaci-man be nun.

¹¹ Anunman nga be di nnɛn'n be bali nnɛn sɔ'm be dilɛ nan Abram ɔ'a fuan be.

¹² Kɛ wia'n ´tɔ'n, lafilɛ wie b'ɔ wa kunnin Abram'n, be flɛ-mɛn i lafilɛ. Lika'n dunnin tritri kpa, kpɛkuun srɛ kunnin i.

¹³ Yɛ Anannganman seli i kɛ: «Se kɛ sɛ, wɔ anunman'm be wa tran nvle wie nun. Be ´yo akua, be ´kle be yalɛ afuɛ kpakpa ya nnan .

¹⁴ Sanngɛ n ´tu i sɔ nvle liɛ nga be ´fa wɔ anunman'm be ´yo be akua'n be fɔ. Kɛ be ´jaso lɛ be ´kɔ'n, be ´nyan ninnge kpanngban.

¹⁵ Ɔ kusu ɔ liɛ'n, a wa di alaje, ɔ́ ti'n ´bo je fitafita. A ´wu wɛtɛɛ, be ´sie wɔ.

¹⁶ Wɔ anunman siansian mun yɛ be ´ba wa-a, afin Amɔrfuɛ'm bé sa tɛ bɔ be yo'n ɔ nian bobo-man su bɔ man n ´fuan be-ɔ.»

¹⁷ Kɛ wia'n tɔli'n, lika'n dunnin dan kpa, kpɛkuun sin wie jueli nnɛn bɔ Abram kpacili be nun nnyɔn-nnyɔn'm be afiɛn.

¹⁸ Le kun sɔ nun'n, Anannganman nin Abram be trali aenguɛ. Anannganman seli i kɛ: «Mɛn ng'ɔ o yɛ'n, kɛ ɔ fɛ i Ezipt nzue ba kan'n i nuan lɛ b'ɔ ´fa ju Efrat nzue ba dan'n i nuan'n, m'an fa man wɔ anunman mun .

¹⁹ Kenfuɛ mun, nin Kɛnazfuɛ mun, nin Kadmɔnfuɛ mun,

²⁰ nin Ɛtfuɛ mun, nin Ferezfuɛ mun, nin Rɛfafuɛ mun,

²¹ nin Amɔrfuɛ mun, nin Kanaanfuɛ mun, nin Girgazfuɛ mun, ɔ nin Zɛbisfuɛ'm be liɛ yɛlɛ mɛn sɔ'n.»