Bo Bolɛ 14 - NYANMIƐN NDƐ'N 1998

Abram i famiɛn nnan'm be kwlalɛ ɔ nin i blusu b'ɔ yi mannin Mɛlkizedɛk'n

¹ I blɛ sɔ nun'n, Babilɔni famiɛn Amrafɛl, nin Ɛlazar famiɛn Arzɔk, nin Elam famiɛn Kɛdɔrlaɔmɛr, ɔ nin Gɔzim famiɛn Tideal,

² be nin Sodɔm famiɛn Bera, nin Gomɔr famiɛn Birsa, nin Adma famiɛn Sineab, nin Zɛbɔim famiɛn Semɛebɛr, ɔ nin Bela famiɛn'n, be kunnin alɛ. Bela klɔ'n i dunman'n kun ekun yɛlɛ Zɔar.

³ Sidim kongo bɔ andɛ ɔ'a kaci i dunman'n ɔ'a yo jenvie ng'ɔ ti njin nzue klakla i nun yɛ famiɛn nnun sɔ'm be kan boli nun-ɔn.

⁴ Kɛ ɔ ´yo sɔ'n, wuun b'a su Kɛdɔrlaɔmɛr lele afuɛ blu-nin-nsan. I afuɛ blu-nin-nnan su'n, be waan be su-mɛn i kun.

⁵ Yɛ i afuɛ blu-nin-nnun su'n, Kɛdɔrlaɔmɛr nin famiɛn nga be ukɛ i'n be bali kɛ be nin Rɛfafuɛ'm be ´kun alɛ nan b'a kwla Rɛfafuɛ sɔ mun Astɛrɔt-Karnaim lɛ. I sin be kwlali Zizfuɛ mun Am lɛ. I sin be kwlali Emfuɛ mun Kiriataim kongo'n nun lɛ.

⁶ I sin be kwlali Ɔrfuɛ'm be bɔbɔ bé mɛn'n nun lɔ Seir oka'm be su. Be suli be su lele juli Ɛl-Paran aawlɛ flɛnnɛn'n wun lɔ.

⁷ I sin be sali be sin bali An-Mispat bɔ yɛlɛ Kadɛs'n, nan b'a kwla Amalɛkfuɛ mun. Be sacili be fie'm be kwlaa. I sin be kwlali Amɔrfuɛ nga be tran Azazɔn-Tamar'n.

⁸ Kpɛkuun Sodɔm famiɛn'n nin Gomɔr famiɛn'n, nin Adma famiɛn'n, nin Zɛbɔim famiɛn'n, ɔ nin Bela klɔ'n bɔ i dunman'n kun ekun yɛlɛ Zɔar'n i famiɛn'n, be fin be klɔ'm be nun be fiteli, be jranjrannin Sidim kongo'n nun.

⁹ Be fali alɛ'n wlali Elam famiɛn Kɛdɔrlaɔmɛr i sin, ɔ nin Gɔzim famiɛn'n Tideal, nin Babilɔni famiɛn'n Amrafɛl, ɔ nin Ɛlazar famiɛn'n Arzɔk. Famiɛn nnun'n be ju guali famiɛn nnan'n be su.

¹⁰ Gudrɔn yiwlɛ kunman kpanngban o Sidim kongo'n nun. Kɛ Sodɔm famiɛn'n nin Gomɔr famiɛn'n be fuɛ'm be ´wanndi be kpɔfuɛ'm be nyrun'n, be tɔli kunman sɔ'm be nun. Be nga be kali lɛ'n, be wanndi ko fiali oka'n wun lɔ.

¹¹ Sodɔmfuɛ mun nin Gomɔrfuɛ'm be kwlafuɛ'm be fɛnnin bé bo ninnge'n nin be aliɛ'n kwlakwla, kpɛkuun be kɔlɛ nun-ɔn.

¹² Be fali Abram i niaan wa Lɔt b'ɔ tran Sodɔm ɔ nin i bo ninnge mun.

¹³ Be nga be wanndili'n be nun kun wa boli jasin sɔ'n kleli Abram b'ɔ ti Ebre'n. Kɛ ɔ ´yo sɔ'n, wuun Abram tran Mamre b'ɔ ti Amɔrfuɛ'n i sɛni waka'n bo lɛ. Mamre nin Ɛskɔl, ɔ nin Anɛr be ti niaan. Be nin Abram be trali aenguɛ.

¹⁴ Kɛ Abram tili i kɛ b'a trɛ i niaan wa'n b'a wɔ'n, ɔ fɛli i sufuɛ nga be wuli be i awlo'n nun'n be nun sran ya nsan nin sran blu-nin-mɔcuɛ. Ɔ wlali bé sa nun alɛ ninnge, yɛ be suli bé su lele be juli Dan.

¹⁵ Ɔ buli i sufuɛ'm be nun akpasua-akpasua nan ɔ nin be b'a fa alɛ'n b'a wla famiɛn sɔ'm be sin kɔnguɛ nan b'a kwla be. Abram nin i sran'm be suli be su lele juli Sɔba b'ɔ o Damas i nglo lɔ'n su lɔ.

¹⁶ Ninnge nga be sua ɔli'n, ɔ fali be ngba bali. Ɔ fɛli i niaan wa Lɔt nin i bo ninnge mun, nin bla mun, ɔ nin be mɛn'n nun sran nga be trali be'n mun.

¹⁷ Kɛ Abram nin i sran'm be ɔli bɔ be kwlali Kɛdɔrlaɔmɛr nin famiɛn nga be ukɛ i'n b'ɔ be ´ba'n, Sodɔm famiɛn'n ɔ wa kpali be atin Save kongo'n bɔ be flɛli i kɛ famiɛn'n i kongo'n nun lɛ.

¹⁸ Mɛlkizedɛk b'ɔ ti Salɛm famiɛn'n, bɔ i kunngba'n ti Nyanmiɛn b'ɔ o like'n kwlaa ti su'n i nyrun jranfuɛ'n, ɔ blɛli i kpaun nin nzan,

¹⁹ nan ɔ'a yrɛ i nuan klanman ɔ'a man Abram, ɔ seli kɛ: «Man Nyanmiɛn b'ɔ o like'n kwlaa ti su'n, b'ɔ yili nglo nin asiɛ'n, ɔ yo man a nyan muae.

²⁰ Man manmanlɛ'n yo Nyanmiɛn b'ɔ o like'n kwlaa ti su'n i liɛ. Afin i yɛ ɔ fali ɔ kpɔfuɛ mun wlali ɔ́ sa nun-ɔn .» Nan Abram ɔ'a fa ninnge ng'ɔ nyɛnnin i'n i kwlaa i blusu'n ɔ'a mɛn i.

²¹ Sodɔm famiɛn'n seli Abram kɛ: «Yaci, fa sran mun man min, ɔ li fa ninnge fuɛ'n.»

²² Yɛ Abram se i kɛ: «Mín sa'n yɛ m'an man su m'an kle Anannganman Nyanmiɛn b'ɔ o like'n kwlaa ti su'n, b'ɔ yili nglo nin asiɛ'n yɛ.

²³ N su fa-man ɔ ninnge'm be nun like bɔ kaan sa, kannzɛ ɔ wie jese nyanman annzɛ ngbabua nyanman bɔbɔ o, n su fa-man. Ɔ yo sɔ-ɔ, a wa se kɛ: ‹Abram i anyanbeun'n fin min.›

²⁴ N su fa-man like fi, min like bɔ n ko fa'n yɛlɛ aliɛ nga min sran'm be dili'n. Anɛr, nin Ɛskɔl, ɔ nin Mamre bɔ be ko sunmannin min'n, be like liɛ nga be ko fa'n yɛ ɔ ti n liɛ-ɔ.»