Bo Bolɛ 13 - NYANMIƐN NDƐ'N 1998

¹ Kɛ Abram fin Ezipt lɛ'n, ɔ wa sɛli i sin Negɛb ɔ nin i yi, ɔ fɛli i bo ninnge'n kwlakwla. Lɔt ɔli wie.

Lɔt nin Abram be nun titilɛ

² Abram ti anyanbeunfuɛ dan. Ɔ lɛ nnɛn nin jɛtɛ ufue, ɔ nin sika ɔkwlɛ kpanngban.

³ Kɛ ɔ fɛ i Negɛb lɛ'n ɔ tu trantrannin lele nan ɔ'a ju Betɛl

⁴ kan ɔ dun mmua trannin lɛ b'ɔ kplannin Nyanmiɛn sɔwlɛ kun lɛ'n. Lika ng'ɔ trannin lɛ'n wo Betɛl nin Ai be afiɛn. Ɔ bo flɛli Anannganman lika sɔ'n nun lɛ.

⁵ Lɔt b'ɔ su i su'n, i kusu lɛ i bua mun nin i boli mun, ɔ nin i nannin liɛ mun. Ɔ lɛ i bɔbɔ i tannin sua liɛ.

⁶ Lika'n ju-man be. Ɔ man be sran nnyɔn'n be tran likawlɛ-ɔ ɔ yo-man ye, afin bé sa nun ninnge'm be sɔnnin.

⁷ Utre wie wa tɔli Abram nin Lɔt be nnɛn kankanfuɛ'm be afiɛn. Kanaanfuɛ mun nin Ferezfuɛ'm be kusu be tran be bue.

⁸ Ɔ man Abram seli Lɔt kɛ: «E nin wɔ e kpaci-man. Ɔ fata-man kɛ ndɛ tran min nin wɔ ye afiɛn, yɛ ɔ fata-man kusu kɛ ndɛ tran min nnɛn kankanfuɛ'm be nin wɔ liɛ'm be afiɛn.

⁹ Nian, lika'n yɛ ɔ la lɛ-ɔ, man e tran ngunmin-ngunmin. Sɛ bɛ su yɛ a kɔ'n, n ´kɔ n liɛ fama su, sɛ kusu fama su yɛ a kɔ'n, n ´kɔ n liɛ bɛ su.»

¹⁰ Lɔt mɛnnin i nyin'n su. Ɔ wunnin kɛ Zurdɛn lika kpɛkplɛkpɛ'n ɔ ti nzue bo lika. Kɛ ɔ ´yo sɔ'n, wuun Anannganman nian nunnun-man Sodɔm nin Gomɔr. Kɛ ɔ fɛ i lika sɔ'n nun lele b'ɔ fa ju Zɔar'n, lika'n ti klanman kɛ Anannganman i fie wie sa, i kunngba'n ɔ ti kɛ Ezipt lika'n sa.

¹¹ Yɛ Lɔt fali Zurdɛn lika kpɛkplɛkpɛ nin-ɔn. Ɔ toli i ti wia afiliɛ lɔ lika'n nun. Kɛ be nun tilɛ'n yoli sa.

¹² Abram kali Kanaan mɛn'n nun. Lɔt kusu trannin Zurdɛn lika'n nun klɔ'm bé wun koko lɔ. Ɔ kplɛnnin i tannin sua mun lele juli Sodɔm klɔ kpa'n su.

¹³ Sodɔmfuɛ'm be ti sa tɛtɛ yofuɛ dan. Be fɔn Anannganman i wun.

¹⁴ Kɛ Lɔt nin Abram be kpacili'n, Anannganman seli Abram kɛ: «Jran kan a o lɛ'n, man ɔ́ nyin'n su nian mɛn'n i nglo lɔ lika'n nin i ngua lɔ lika'n, nin wia afiliɛ lɔ, ɔ nin wia atɔliɛ lɔ.

¹⁵ Lika wunmuan nga a wun i lɛ'n, m'an fa man wɔ. Ɔ ti wɔ nin wɔ anunman mun amun liɛ titi .

¹⁶ N ´yo man wɔ anunman'm be ´sɔn kaka kpa kɛ asiɛ wun ndutre sa. Be ka be-ɔ ɔ su yo-man ye.

¹⁷ Jaso, ko kpla lika sɔ'n i tɛnndɛn nun'n nin i ngbinngbin nun'n nian, afin n ´fa man wɔ.»

¹⁸ Abram tuli i nanmue'n bo ko trannin Mamre sɛni waka'm be bo lɔ Ebrɔn lika liɛ'n nun lɔ, nan ɔ'a kplan Nyanmiɛn i sɔwlɛ kun lɔ ɔ'a mɛn i.