Bo Bolɛ 12 - NYANMIƐN NDƐ'N 1998

ABRAAM I WUN NDƐ Abram i Kanaan kɔlɛ

¹ Anannganman seli Abram kɛ: «Jaso ɔ́ mɛn'n nun, jaso ɔ osufuɛ'm be afiɛn ɔ́ si i awlo'n nun kɔ mɛn nga n wa kle wɔ'n nun.

² N ´yo man ɔ osu'n wa yo nvle dan kun, n ´yo wɔ ye, n ´yo man ɔ dunman'n ´fu. Ɔ dunman nun ti n ´yo sran'm be ye.

³ Sran ng'ɔ bu ɔ wun akunndan kpa'n, n ´yo i ye. Sran nga kusu b'ɔ bo wɔ sannzan'n, m ´bo i sannzan wie. Ɔ dunman nun yɛ n ´yo nvle-nvle'm be kwlaa be ye-ɔ .»

⁴ Kpɛkuun Abram ɔli kan Anannganman kleli i kɛ ɔ wɔ lɔ'n. Kɛ Abram ´jaso Aran lɔ'n, wuun ɔ lɛ afuɛ ableso-nin-nnun.

⁵ Kɛ Abram ´jaso Aran kɔ'n, ɔ nin i yi Sarai nin i niaan wa Lɔt yɛ be ɔli-ɔ. Be toli bé ti Kanaan bue liɛ'n su lɔ yɛ be ɔli-ɔ. Be ´kɔ'n be fali bé bo ninnge mun, ɔ nin bé sa nun sran nga be toli be Aran lɛ'n be ngba yɛ be ɔli-ɔ. Kɛ Abram nin sran nga be nin i kɔ'n be juli Kanaan mɛn'n nun lɔ'n,

Abram i Kanaan lɔ tranlɛ nin i Ezipt kɔlɛ

⁶ be sinnin mɛn sɔ'n nun, be ɔli lele be juli Sisɛm, be toli Mɔre lɔ sɛni waka'n. I blɛ sɔ nun'n, wuun Kanaanfuɛ mun yɛ be tran lɛ-ɔ.

⁷ Kpɛkuun Anannganman fiteli Abram nyrun nan ɔ'a se i kɛ: «N ´fa mɛn nga m ´man ɔ osu'n.» Nan Abram ɔ'a kplan Nyanmiɛn sɔwlɛ kun ɔ'a man Anannganman kan ɔ fiteli i nyrun lɛ'n.

⁸ Kpɛkuun ɔ tuli i nanmue'n nun lɛ ɔli oka-oka'm be nun Betɛl i bue ng'ɔ kpɛ wia afiliɛ lɔ'n nun. Ɔ ko kplɛnnin i tannin sua'n Betɛl nin Ai be afiɛn: Betɛl'n wo wia atɔliɛ, yɛ Ai'n kusu wo wia afiliɛ. Ɔ wa kplannin Nyanmiɛn i sɔwlɛ uflɛ lɛ mɛnnin i nan ɔ'a bo a flɛ i ɔ'a srɛ i.

⁹ Abram tu trantrannin lele kpɛkuun ɔ mantannin Negɛb wun lɔ.

¹⁰ Awe kun ɔ wa kpɛnnin mɛn sɔ'n nun. Ɔ'a kpɛn-man blɛblɛ, nan Abram ɔ'a ɔ Ezipt lɔ tranlɛ.

¹¹ Kɛ be wa ju Ezipt lɔ'n, ɔ seli i yi Sarai kɛ: «A ti bla klanman yɛ a o lɛ-ɔ.

¹² N si kɛ sɛ Eziptfuɛ'm be wun wɔ'n, be ´se kɛ: ‹I yi-ɔ!› Kpɛkuun be ´kun min be ´yaci wɔ lɛ.

¹³ I sɔ'n ti, n ´srɛ wɔ, se kɛ a ti min niaan bla nan be yo min kpa ɔ dunman nun, nan b'a kun-man min.»

¹⁴ Kɛ Abram juli Ezipt lɔ'n, Eziptfuɛ'm be wunnin i yi'n, be kloli i kekleke.

¹⁵ Ezipt famiɛn'n i awlo lɔ sran dan'm be wunnin Abram i yi'n wie, nan b'a kɛn i ndɛ a kle famiɛn'n nan b'a fɛ i b'a ɔ i awlo lɔ.

¹⁶ Bla'n i dunman nun ti, kɛ Ezipt famiɛn'n ko di Abram nɛnnɛn'n yɛ ɔ dili-ɔ. Ɔ mɛnnin i bua mun nin boli mun, nin nannin mun, nin kanga yasua mun, nin kanga bla mun, ɔ nin aflunmun yasua nin bla mun, ɔ nin nyɔnngɔnmɛn mun.

¹⁷ Sanngɛ Anannganman kleli Ezipt famiɛn'n nin i awlofuɛ'm be nyrɛnnɛn dan kpa Abram i yi Sarai ti.

¹⁸ Yɛ Ezipt famiɛn'n flɛli Abram-ɔ, ɔ usɛli i kɛ: «?Nzu ti yɛ a yoli min sɔ-ɔ? ?Nzu ti yɛ a se-man min kɛ ɔ́ yi-ɔ?

¹⁹ ?Nzu ti yɛ a seli min kɛ ɔ niaan bla bɔ m'an fɛ i m'an yo mín yi-ɔ? Ɔ yi'n yɛ ɔ o lɛ-ɔ. Fɛ i nan an `wɔ.»

²⁰ Ezipt famiɛn'n seli i sonja'm be kɛ be fɛ i ko sie mɛn'n i anyialiɛ su lɔ, ɔ nin i yi nin i bo ninnge'm be kwlaa.