Bo Bolɛ 11 - NYANMIƐN NDƐ'N 1998

Babɛl: Aniɛn'm be sannganlɛ

¹ Laa, sran'm be kwlaa be kan aniɛn kunngba, ɔ kpaci-man.

² Be fɛli i wia afiliɛ lɔ be ko juli lika kpɛkplɛkpɛ kun nun Babilɔni i bo ngua lɔ nan b'a tran lɛ.

³ Be seli be wiengu kɛ: «Man e wɔ e ko kpɛ bliki e nyintɔn.» Yɛ bliki sɔ'n yoli kɛ be yɛbuɛ sa be fa kplannin sua, gudrɔn'n kusu yoli kɛ be laso sa.

⁴ Be seli kɛ: «An man e kplan klɔ kun nin sua mlomlo kun. Man i sɔ sua liɛ'n i ti'n to nyanmiɛn'n lɔ. E `yo sɔ nan e dunman'n fu nan kusu y'a bo y'a sanndi-man asiɛ wunmuan'n su.»

⁵ Anannganman fin nglo lɔ jra niannin klɔ nin sua sɔ'n bɔ sran'm be su kplan'n.

⁶ Yɛ ɔ seli kɛ: «Be ti nvle kun, be kan aniɛn kunngba yɛ nian be bo bolɛ bɔ b'a bo-ɔ. Nga, like kwlaa bɔ be gugu kɛ be ´yo'n, like fi nun-man lɛ b'ɔ kwlaa jran be-ɔ.

⁷ Ɔ man e `wɔ e ko sanngan be aniɛn'n nun, nan nán be ti be wun aniɛn kun.»

⁸ Yɛ Anannganman man be bo sanndili asiɛ wunmuan'n su nan b'a yaci klɔ sɔ'n i kplanlɛ.

⁹ I sɔ'n ti yɛ be flɛli klɔ sɔ'n kɛ Babɛl nin-ɔn. Afin lɛ yɛ Anannganman sanngannin asiɛ'n sufuɛ'm be kwlaa be aniɛn nun-ɔn. Lɛ yɛ ɔ man be boli be bo sanndilɛ'n bo asiɛ wunmuan'n su-ɔ.

Sɛm i osu'n lele fa ju Abram i osu'n nun

¹⁰ Sɛm i osu'n yɛ. Kɛ Sɛm ´di afuɛ ya'n, wuun nzue dan'n tɔli ɔ'a di afuɛ nnyɔn. I blɛ sɔ'n nun yɛ Sɛm wuli Arpaksad-ɔ.

¹¹ Kɛ Sɛm wuli Arpaksad'n, ɔ dili afuɛ ya nnun ekun. I blɛ sɔ nun'n, ɔ wuli ba yasua wie mun nin ba bla wie mun ekun.

¹² Arpaksad dili afuɛ ablasan-nin-nnun nan ɔ'a wu Sela.

¹³ Kɛ Arpaksad wuli Sela'n, ɔ dili afuɛ ya nnan nin afuɛ nsan ekun. I blɛ sɔ nun'n, ɔ wuli ba yasua wie mun nin ba bla wie mun ekun.

¹⁴ Sela dili afuɛ ablasan yɛ ɔ wuli Ebɛr-ɔ.

¹⁵ Kɛ Sela wuli Ebɛr'n, ɔ dili afuɛ ya nnan nin afuɛ nsan ekun. I blɛ sɔ nun'n, ɔ wuli ba yasua wie mun nin ba bla wie mun ekun.

¹⁶ Ebɛr dili afuɛ ablasan-nin-nnan yɛ ɔ wuli Pelɛg-ɔ.

¹⁷ Kɛ Ebɛr wuli Pelɛg'n, ɔ dili afuɛ ya nnan afuɛ ablasan ekun. I blɛ sɔ nun'n, ɔ wuli ba yasua wie mun nin ba bla wie mun ekun.

¹⁸ Pelɛg dili afuɛ ablasan yɛ ɔ wuli Rɛi-ɔ.

¹⁹ Kɛ Pelɛg wuli Rɛi'n, ɔ dili afuɛ ya nnyɔn nin afuɛ ngwlan. I blɛ sɔ nun'n, ɔ wuli ba yasua wie mun nin ba bla wie mun ekun.

²⁰ Rɛi dili afuɛ ablasan-nin-nnyɔn yɛ ɔ wuli Sɛrig-ɔ.

²¹ Kɛ Rɛi wuli Sɛrig'n, ɔ dili afuɛ ya nnyɔn nin afuɛ nso. I blɛ sɔ nun'n, ɔ wuli ba yasua wie mun nin ba bla wie mun ekun.

²² Sɛrig dili afuɛ ablasan yɛ ɔ wuli Nakɔr-ɔ.

²³ Kɛ Sɛrig wuli Nakɔr'n, ɔ dili afuɛ ya nnyɔn ekun. I blɛ sɔ nun'n, ɔ wuli ba yasua wie mun nin ba bla wie mun ekun.

²⁴ Nakɔr dili afuɛ ablaɔn-nin-ngwlan yɛ ɔ wuli Terak-ɔ.

²⁵ Kɛ Nakɔr wuli Terak'n, ɔ dili afuɛ ya afuɛ blu-nin-ngwlan ekun. I blɛ sɔ nun'n, ɔ wuli ba yasua wie mun nin ba bla wie mun ekun.

²⁶ Terak dili afuɛ ableso yɛ ɔ wuli Abram nin Nakɔr, ɔ nin Aran-an.

²⁷ Abram nin Nakɔr yɛ Aran bé si Terak i osu'n yɛ. Aran wuli Lɔt

²⁸ kpɛkuun Aran wuli kan be wuli i lɔ'n i si Terak i nyin su. Ɔ wuli klɔ nga be flɛ i Ir'n su. Klɔ sɔ'n wo Babilɔni mɛn'n nun.

²⁹ Abram nin Nakɔr be wa jali bla. Abram yi'n be flɛ i kɛ Sarai. Nakɔr liɛ'n yɛlɛ Aran i wa bla Milka. Aran i wa ekun yɛlɛ Ziska.

³⁰ Sarai i klun ti kpan, ɔ wu-man ba.

³¹ Terak fɛli i wa Abram nin i anunman Lɔt b'ɔ ti Aran i wa'n, ɔ fɛli i wa Abram i yi Sarai wie nan b'a jaso Ir b'ɔ o Babilɔni mɛn'n nun lɔ'n b'a to bé ti Kanaan. Be ko juli Aran nan b'a tran lɛ.

³² Terak dili afuɛ ya nnyɔn afuɛ nnun nan ɔ'a wu Aran lɛ.