Amɔs 9 - NYANMIƐN NDƐ'N 1998

Amɔs i aolia nun like wunlɛ kasiɛn'n

¹ N ´wun Anannganman nin-ɔn, ɔ jin i sɔwlɛ'n su. I waan: «Man be bubu sua ja'm bé ti su nglo gbagblagba'n nan Nyanmiɛn sua'n i nyrun lika'n ɔ `keje. N ´kpuke sran'm be kwlakwla bé ti'n nun, sɛ be wie ka lɛ'n, n ´yo man be nunkun be. Sran fi su kwla wanndi-man. Be wie su fi-man nun fite-man.

² Sɛ be kɔ lele be ju blɔlɔ lɔ'n, n ´ko fa be lɔ m ba. Sɛ be ko fia nyanmiɛn su lɔ'n, n ´ko fa be lɔ n ´jra.

³ Sɛ be ko fia Karmɛl oka'n i ti su nglo lɔ'n, n ´kɔ bé sin, n ´wun be, n ´tra be lɔ. Sɛ be waan be ´mlɔn jenvie'n bo lɔ nan be ´mlin-mlin min nyrun'n, n ´sunman jenvie nun wuo'n kɛ ɔ ´kɔ ka be lɔ.

⁴ Sɛ alɛ kunlɛ nun be trali be lomuɛn nan be yoli kanga be nga be nin be be kun'n bé sa nun'n, n ´yo man be ´kun be. Mín nyin su jaso-man be su le. Nán kɛ be ye yolɛ ti-ɔ, sanngɛ be tɛ yolɛ ti-ɔ.»

⁵ Kɛ Anannganman Nyanmiɛn b'ɔ sie mɛn wunmuan'n fɛ i sama'n kan asiɛ'n, kpɛkuun asiɛ'n su keje. Asiɛ'n sufuɛ'm be kwlakwla be ´tran awlaboɛ nun. Sɛ n ´kwla se'n, asiɛ wunmuan'n ɔ ´mɛn i wun su kpɛkuun ɔ ´tɛ i wun ase kɛ Ezipt lɔ nzue ba dan'n sa.

⁶ Nyanmiɛn kplannin i bɔbɔ i sua'n nglo lɔ. I sua ja'n wo asiɛ'n su wa. Kɛ ɔ flɛ jenvie'n, wuun jenvie sɔ'n ɔ'a de asiɛ wunmuan'n. Nyanmiɛn sɔ'n i dunman yɛlɛ Anannganman.

Be nga be yoli sa'n be jɔlɛ dilɛ'n

⁷ «?Izraɛlfuɛ mun, an bu amun klun lɔ kɛ min waan amun kpa tra Etiopifuɛ mun? Nán wafa kunngba nga n fali amun Ezipt lɔ m bali'n, yɛ n fali Filistifuɛ mun Kaftɔr lɔ m bali-ɔ? ?Nɛ́n i kunngba'n yɛ n fali Sirifuɛ mun Kir lɔ m bali-ɔ?»

⁸ Anannganman Nyanmiɛn b'ɔ sie mɛn wunmuan'n i nyin ta Izraɛl famiɛn'm be kwlaa bɔ sa tɛ'n yɛ ɔ ti be like yɛ be yo'n, ɔ ´nunnun be asiɛ'n su. Sanngɛ ɔ'a se-man kɛ ɔ ´nunnun Zakɔb anunman'm be ngba.

⁹ «N wa yo man be ´kpukpu Izraɛlfuɛ mun be gua mɛn'm be kwlakwla nun kɛ be fa yo ble'n b'ɔ man yɛbuɛ'n sanngan-man ble nun tɔ-man'n sa .

¹⁰ Sran nga be yoli sa tɛ min nvle'n nun'n be kwlaa, ɔ nin be nga be se kɛ: ‹Sa yalɛ nga a kɛn i ndɛ kɛ ɔ'a mantan ye lɛ'n, ɔ su tɔ-man e su'n,› alɛ'n ´di be sɔfuɛ mun!»

Kɛ sa yalɛ'n ko sin'n

¹¹ Anannganman'n waan: «David i famiɛn klɔ'n bɔ ɔ'a bubu'n, cɛn kun n ´siesie i ye. N ´tannin tannin i toklo mun, i lika nga be bu guali'n, m ´man be su n ´sie be osu, n ´kplɛn i uflɛ, kɛ laa'n sa.

¹² Kpɛkuun asiɛ ng'ɔ ti Edɔmfuɛ'm be liɛ laa'n nin ng'ɔ ti nvle kun nga'm be liɛ laa'n, ɔ nin ng'ɔ ti m bɔbɔ min liɛ laa'n, be ´yo Izraɛlfuɛ'm be liɛ. M bɔbɔ min Anannganman'n, min yɛ n kan sɔ-ɔ. Min bɔ n kan'n, min kusu min yɛ n ´yo m ´man amun-ɔn .»

¹³ Anannganman waan: «Cɛn wie lele kɛ be kpɛ ble'n cɛ'n, wuun be su guɛ i uflɛ ekun. Kɛ be gua ble'n cɛ'n, wuun be su cuɛn vinyi mma'm be nzue'n. Be ´yi nzan lɔflɛ kpanngban oka'm be su. Nzan'n ´tɔ nvati kpɔlɛ'm be su .

¹⁴ Min sran nga be trali be lomuɛn'n, n ´fa be n ´sa bé sin. Be klɔ bɔ be bubuli be'n, be ´kplan be uflɛ be ´tran su ekun. Be ´ta vinyi be ´nɔn i nzan'n. Be ´di fie be ´di be su ninnge.

¹⁵ N ´taka min nvle'n i lika laa'n nun. Be su fuan-man min sran mun be asiɛ nga n fa mannin be'n su lɛ kun. M bɔbɔ min Anannganman amun Nyanmiɛn'n, yɛ n kan ndɛ sɔ'n n kle amun-ɔn.»