Amɔs 8 - NYANMIƐN NDƐ'N 1998

Aolia nun like bɔ Amɔs wunnin be'n, i nnan'n su yɛ: Waka mma gbogbo kun

¹ Anannganman Nyanmiɛn'n fali sa nga kleli min aolia nun ekun. Ɔ fali waka mma blowa gbogbo kun kleli min.

² Ɔ usali min kɛ: «?Amɔs, nguɛ yɛ a wun i-ɔ?» Yɛ n tɛli su kɛ: «N wun waka mma blowa gbogbo kun.» Kpɛkuun Anannganman'n seli min kɛ: «Min nvle Izraɛl ɔ'a blo kɛ ɔ `ti tɔ sa. Sa nga i nunfuɛ'm be yo'n, n su yaci-man wie fi cɛ-man be kun.»

³ Anannganman Nyanmiɛn wan yoo: «Min jɔlɛ dilɛ cɛn sɔ nun'n, famiɛn sua'n nun jue tofuɛ'm be ´yaci jue tolɛ be ´sun. Fuɛn'm be ´tru lika'n nun sa trutrɛɛ, kpɛkuun lika'n ´tɔ sa bliin.»

Klunngbɔ cɛn

⁴ Amun bɔ an tɛ tia mɛn'n nun aunnvuɛfuɛ'm be su bɔ amun waan nán amún nyinma wun be nga be lɛ-man nyrun mɛn nun'n, an `tie ndɛ ng'ɔ o yɛ'n:

⁵ An ko se kɛ: «Man anglo le kun'n wie sɔ nan e `nyan e ble'n i atɛ yowlɛ. Man wunmiɛn-delɛ-cɛn'n sin ndɛndɛ nan e `tike e tanngannin'm be su!» An kpɛ suliɛ'm be su, an kpɛ jayɛbuɛ'm be su. An mian toe'm be nun be fa di sran'm be lufle.

⁶ An yo ble'n nin i wla'n i atɛ sran'm bé sa nun. An fa be bɔ be lɛ-man like'n be kaci amun kanga. Sɛ amun ngbabua nnyɔn cɛ kalɛ o yalɛfuɛ nin sran ng'ɔ lɛ-man like'n be su, nan be kwla yi-man'n, an fa be sɔfuɛ mun yo amun kanga.

⁷ Mɛn nga Zakɔb i anunman Izraɛlfuɛ'm be fa nyinman-nyinman bé wun'n ti, Anannganman wan yoo: «Izraɛlfuɛ'm be aeliɛ'n, mín wla su fi-mɛn i le.

⁸ Sa sɔ'm be ti, asiɛ'n ɔ ´keje, i su tranfuɛ'm be kwlaa be wa tran awlaboɛ nun. Sɛ n ´kwla se'n, asiɛ wunmuan'n ɔ ´mɛn i wun su nglo kpɛkuun ɔ ´tɛ i wun ase kɛ Ezipt lɔ nzue ba dan'n sa.»

⁹ Anannganman'n waan: «Cɛn sɔ'n nun'n, kɛ wia'n ´ju bé ti afiɛn sɛsɛ'n, n ´yo man lika'n ´ka lɛ lu tuun wia sɔ'n nun lɛ, aosin'n ´wla asiɛ wunmuan'n su .

¹⁰ Amún cɛn nga amun di be'n, n ´fa be n ´kaci awlaboɛ cɛn, jue nga amun to be'n, n ´fa be n ´kaci sunlɛ. Sran'm be kwlaa be ´wla bajɛ tralɛ. N ´fa nyrɛnnɛn n ´yi nvle wunmuan'n su. Be sran'm be kwlaa be ´kpu bé ti'n su kɛ sran wie bɔ i wa ba kunngba cenje'n ɔ'a saci i sa nun'n sa. Kpɛkuun i agualiɛ'n ko yo-man aklunjuɛ.»

¹¹ Anannganman'n waan: «Cɛn kun n wa to awe n ´yi mɛn'n su. Awe sɔ b'ɔ kun sran mun'n, nán kɛ awe-ɔ, nán nzuewe-ɔ. Anannganman i nuan ndɛ'n i tilɛ i awe yɛ ɔ ´kun be-ɔ.

¹² Be ´wlan mɛn nun sa daan ngbɛn. Be ´fɛ i ngua lɔ lele be ´ko guɛ i wia atɔliɛ lɔ. Be ´fɛ i nglo lɔ lele be ´ko guɛ i wia afiliɛ lɔ. Be ´wlan kunndɛ Anannganman'n i nuan bo ndɛ be ´ti, sanngɛ be su ko nyɛn-mɛn i be ko ti-mɛn i le.

¹³ I sɔ cɛn nun'n, talua nglanman kpa'm be nin gbanflɛn'm be ´glɔ, nzuewe'n dunman nun.

¹⁴ Kpɛkuun be nga bɔ be fa Samari amuɛn'm be fa ta nda'n, ɔ nin be nga be di amuɛn be se kɛ: ‹N kan Dan lɔ amuɛn'n ti'n!› annzɛ kusu: ‹N kan Beɛr-Seba amuɛn'n ti'n,› be kwlakwla sɔ'm be ´tɔ. Be tɔ kusu-ɔ be su kwla jaso-man kun.»