Amɔs 7 - NYANMIƐN NDƐ'N 1998

Aolia nun like bɔ Amɔs wunnin be'n, i klikli'n yɛ: Lalo mun

¹ Like nga Anannganman'n fa kleli min aolia nun'n yɛ ɔ o yɛ. Ijre klikli nga be kpɛ b'ɔ ti famiɛn'n liɛ'n, kɛ be kpɛli bɔ ijre'n boli fulɛ bo uflɛ-uflɛ'n, Anannganman'n fali lalo kaka kpa bali, be lu nglo lɔ tuun kɛ nzue yɛ ɔ'a mlan sa.

² Kɛ n ´nian bɔ lalo'm be su wa wie mɛn'n nun ijre'n kwlaa di'n, yɛ n seli kɛ: Anannganman Nyanmiɛn, Zakɔb osu nunfuɛ'm be ti kaan ngboko, sɛ w'a yaci-man bé wun sa'n a cɛ-man be'n, be ´wie nunnun.

³ Kpɛkuun Anannganman'n kacili aniɛn. Ɔ tɛli min su kɛ yoo: «I sɔ sa'n su yo-man.»

Aolia nun like bɔ Amɔs wunnin be'n, i nnyɔn'n su yɛ: Sin'n

⁴ Anannganman Nyanmiɛn'n yili sa uflɛ nglo kleli min. Sɛ n ´kwla se'n, ɔ flɛli sin'n kɛ ɔ wa di i jɔlɛ'n. Sin'n i dan b'ɔ ti'n ti, asiɛ'n bo lɔ nzue'n ɔ o wielɛ. Izraɛl mɛn wunmuan'n kusu o yralɛ.

⁵ Yɛ min waan: Anannganman Nyanmiɛn, n ´srɛ wɔ, yaci i sɔ. Zakɔb osu'n ti kaan ngboko, ɔ'a yo-man sɔ-ɔ ɔ ´wie nunnun.

⁶ Kpɛkuun Anannganman'n kacili aniɛn. Ɔ tɛli min su kɛ i sɔ sa'n su yo-man.

Aolia nun like bɔ Amɔs wunnin be'n, i nsan su'n yɛ: Nyanman bɔ sunmun wo i nuan'n

⁷ Anannganman yili sa ng'ɔ o yɛ'n i nglo kleli min ekun. I bɔbɔ jin talɛ kun su, nyanman kun wo i sa nun, sunmun wo i nuan .

⁸ Ɔ usa min kɛ: «?Amɔs, nguɛ yɛ a wun i-ɔ?» N tɛli i su kɛ: «N wun nyanman kun, sunmun wo i nuan.» Yɛ Anannganman'n waan: «N su nian min mɛn'n sɛ ɔ ti tinngɛwa sein o. Afin sa tɛ nga i nunfuɛ'm be yo be'n, n su yaci n cɛ-man be.

⁹ Izaak osufuɛ'm be sraka yiwlɛ lika nga be o kpɔlɛ kpɔlɛ'm be su'n, n ´saci be. M ´bubu be amuɛn sua'm be kwlaa. N ´fa alɛ n ´tua Izraɛl nvle'n i kalɛ.»

Be kannin Amɔs bo Betɛl lɔ

¹⁰ Amazia b'ɔ ti Betɛl lɔ Nyanmiɛn nyrun jranfuɛ'n ɔ ko mannin Zeroboam ngaliɛ kɛ yoo: «Amɔs kunndɛ kɛ ɔ ´yi wɔ ase Izraɛl nvle'n nun, ndɛ ng'ɔ kan be'n, e mɛn nunfuɛ'm be su kwla yaci cɛ-mɛn i .

¹¹ Afin ɔ bɔbɔ nian ndɛ ng'ɔ kan be'n. I waan: ‹Be ´kun Zeroboam kpɛkuun be ´tra Izraɛlfuɛ'm be lomuɛn be fa be ´jaso be mɛn liɛ'n nun be ´kɔ mɛn uflɛ nun mmua kpa.› »

¹² Nan Amazia ɔ'a se Amɔs kɛ: «Aolia nun ninnge wunfuɛ, jaso wa kɔ Zida mɛn'n nun lɔ. Lɔ liɛ'n, a ´kwla fa Nyanmiɛn nuan ijɔlɛ a ´fa nyan ɔ́ nuan nun aliɛ di.

¹³ Betɛl wa ti famiɛn'n i bɔbɔ i Nyanmiɛn sua, ɔ ti Izraɛl famiɛn'n i sua. Nán e ti kɛ a su ijɔ Nyanmiɛn nuan wa kun .»

¹⁴ Yɛ Amɔs tɛli i su kɛ: «Nyanmiɛn nuan ijɔlɛ'n ti-man min junman. I kusu n nun-man Nyanmiɛn ijɔfuɛ'n be anuansɛ'n wie fi nun. N ti min nnɛn kankanfuɛ, min sikomɔr fie yɛ n di n fa nyan mín nuan nun aliɛ-ɔ.

¹⁵ Anannganman'n yɛ ɔ ko fali min nnɛn'm bé sin lɔ yɛ ɔ seli min kɛ n wa kan i nuan su ndɛ kle Izraɛlfuɛ mun-ɔn.

¹⁶ Ɔ man i ti Amazia, wɔ bɔ a se min kɛ: ‹Nán kan sa kekle b'ɔ wa ju Izraɛlfuɛ'm be su kle be kun. Yaci Izaak anunman'm be ijɔlɛ beblebe'n,› sie ɔ́ su tie ndɛ nga Anannganman'n kan kle wɔ'n.

¹⁷ I waan: ‹I sɔ nga a kɛn i lɛ'n ti'n, ɔ́ yi'n ɔ wa si tekle sin klɔ'n nun. Ɔ mma mmla mun o, yasua mun o, be ´kun be. Be ´fa nyanman be ´sunnzun ɔ fie'n be ´cɛ nun be ´fa. Ɔ bɔbɔ kusu, mɛn nga be su-man Nyanmiɛn nun'n, lɔ yɛ a ´ko wu-ɔ. Be wa tra Izraɛl nvle'n be ´fa, Izraɛlfuɛ'm be ´jaso be mɛn liɛ'n nun be ´kɔ mmua kpa.› »