Amɔs 6 - NYANMIƐN NDƐ'N 1998

Izraɛlfuɛ'm be bu i kɛ b'a nyan be ti

¹ Amun bɔ an ti Siɔn lɔ be ´di pɔɔ'n, bɔ an gua Samari kpɔlɛ'n su lɔ bɔ an bu i kɛ amu'an nyan amun ti'n, an yako lele! Be blɔ kɛ mɛn'n nun be nga be lɛ nyrun'n, amun yɛ be ti be klikli nin-ɔn, yɛ Izraɛlfuɛ'm be kɔ amun sin-ɔn .

² Amun li an `wɔ Kalne lɔ be `ko nian sa ng'ɔ yoli lɔ'n, nan kɛ an fɛ i lɛ'n, amun `wɔ Amat klɔ dan'n su lɔ, nan an `kpɛn Filistifuɛ'm be klɔ Gat'n su lɔ. Amun wa wun kɛ i sɔ nvle liɛ'n nun'n, klɔ mun kanngan yɛ be ti-ɔ, sanngɛ amun kpa tra-man be.

³ An bu i kɛ an ´yo sɔ nan nyrɛnnɛn cɛn'n ɔ ´cuɛn kɔ i sin, sanngɛ kusu wuun sa kekle blɛ'n yɛ amun su mɛntɛn i-ɔ.

⁴ Amu'an tinngɛ amún wun famiɛn li'm be su cɛ. Amu'an la bia ndɛnndɛn'm be nun yɛ bua nga b'a kpɛ cro'n nin nannin nga b'a lo lɛklɛɛ'n, yɛ an di-ɔ.

⁵ An ´bo sanngo'n, wuun an ´kpankpan be ´to jue. David sɔnnzɔnlɛ ti able silɛ ninnge uflɛ mun yɛ amun kpɛ be ba-a.

⁶ Klowa kpakpa'm be nun yɛ amun nɔn nzan nin-ɔn. Nyanngo kpakpa ng'ɔ bɔn fannin'n yɛ an kpakpa-a, sanngɛ nyrɛnnɛn dan ng'ɔ su wa tɔ Zozɛf osu'n nunfuɛ'm be su'n, ɔ kle-man amun kokolɛ.

⁷ Ɔ man n ´kan kle amun kɛ yoo: «Cɛn nga be ´tra sran'm be ´kɔ'n, amun yɛ be dun mmua tra amun-ɔn. Kpɛkuun cɛn dilɛ beblebe'n ´wie fuɛnfuɛ'm bé sa nun.»

Samari i sacilɛ

⁸ Anannganman b'ɔ sie mɛn wunmuan'n ɔ'a fua. I wan yoo: «N ti Nyanmiɛn. Izraɛlfuɛ'm bé wun dandan yolɛ'n yo min tɛ kpli. Kɛ n wun bé sua kpakpa mun'n, min anwlɛn'n kpɛ min klun. I sɔ'n ti man, n ´fa Samari nin i nun ninnge'm be kwlaa m ´man i kpɔfuɛ mun.

⁹ Awlo kun nun'n, sɛ sran blu cɛ yɛ be ka nun'n, be ´wie wu.

¹⁰ Sɛ sran kun ba i osufuɛ nga be wuli'n be fuɛn'n falɛ kɛ ɔ ´ko wɔ be nun nan sɛ sua sɔ'n nun lɛ sran wie ɔ'a wu-man wie, nan ɔ o sua ba kasiɛn nun lɔ'n, ɔ ´usa kɛ: «?Sran wie o ɔ wun lɛ ekun?» Kpɛkuun ɔ ´se kɛ: «Cɛcɛ! Sran nun-man wa kun. Sanngɛ nán ijɔ kun, nán bo Anannganman'n i dunman ka .»

¹¹ Amun `nian amun wun kpa. Afin Anannganman i nuan b'ɔ ´uke i sa'n, wuun sua dandan'm be lɛ bubulɛ'n, wuun sua kanngan'm be kusu be o kpacikpacilɛ.

Nvle kun nin Izraɛl nvle'n be wa yia nun

¹² ?Nnɛn kpanngɔ'm be wanndi yɛbuɛ su-ɔ, ɔ yo ye? ?Be kwla fa nannin be trutru kpangba nun kɛ be ´lua nun like-ɔ ɔ yo ye'n? ?Yɛ wuun sɛ ti yɛ amu'an yo man nanwlɛ dilɛ'n ɔ'a kaci kɛ duwlɛ sa nin-ɔn, bɔ sa i nan su yolɛ'n ɔ'a kaci kɛ kondu sa nin-ɔn?

¹³ Lɔdɛbar klɔ bɔ be ti-man like fi bɔ an kwlɛli i'n ti, an su di i ti cɛn. An ko se kɛ yoo: «E lɛ wunmiɛn o, y'a fa Karnaim!»

¹⁴ Anannganman b'ɔ sie mɛn wunmuan'n i kusu ɔ'a fua. I waan: «I sɔ'n ti Izraɛlfuɛ mun, n wa yo man nvle kun nin amun be wa yia nun. Ɔ ´bo amun nun klelɛ bo Amat i wun lɔ lele ɔ ´fa ju Araba nzue ba ng'ɔ kpalo vivi'n i nuan lɔ.»