Amɔs 5 - NYANMIƐN NDƐ'N 1998

Izraɛlfuɛ'm bé wun sɛ jue

¹ Izraɛlfuɛ mun, an `sie amún su be `tie amún wun sɛ jue nga n ´to i yɛ'n.

² Izraɛl, kɛ a la lɛ'n yɛ a la-a, a su jaso-man kun. Kɛ a la wɔ asiɛ'n su lɛ'n, nán kɛ a ´nyan sran man wɔ su ti-ɔ.

³ Ndɛ nga Anannganman Nyanmiɛn kan kle Izraɛlfuɛ mun yɛ: «Klɔ dan nga bɔ i su sran akpi be kɔ alɛ kunlɛ'n, be nun sran ya cɛ yɛ be ´sa be sin-ɔn. Nga kusu bɔ be fa sran ya be kɔ'n, blu cɛ yɛ be ´sa be sin-ɔn.»

Sɛ Izraɛlfuɛ'm be ´wun kɛ be ´ka nguan nun'n

⁴ Ndɛ nga Anannganman kan kle Izraɛlfuɛ mun'n yɛ: «Sɛ amun ´wun kɛ amun ´ka nguan nun'n, wuun amu'an mantan min .

⁵ Nán amun wɔ Betɛl annzɛ Gilgal. Nán amun wɔ Beɛr-Seba Nyanmiɛn sua'n nun lɔ. Afin be wa tra Gilgalfuɛ mun be ´ko jra be mɛn uflɛ nun. Betɛl kusu ɔ wa nunnun mlɔnmlɔnmlɔn.»

⁶ Zozɛf osu nunfuɛ mun, sɛ amun klo kɛ amun ´nyan nguan'n, Anannganman'n yɛ ɔ fata bɔ amun mɛntɛn i-ɔ. Sɛ ɔ'a yo-man sɔ-ɔ, ɔ wa kaci kɛ sin sa, ɔ ´to amun, ɔ ´di amun. An su nyan-man sran fi Betɛl lɔ b'ɔ ´nuan sin sɔ nin-ɔn.

⁷ Amun yo man sa ng'ɔ ti kpa'n, sran'm be bu i sa tɛ. Be nga be di nanwlɛ'n, amun yi be ase.

⁸ Sran ng'ɔ yili nzraama akpasua akpasua mun sran nga b'ɔ san aliɛ'n cɛn aliɛ, b'ɔ cɛn aliɛ'n b'ɔ san aliɛ'n, b'ɔ flɛ jenvie nzue'n fa ba asiɛ kee'n su'n, be flɛ i kɛ Anannganman.

⁹ Be bɔ be kan ndɛ-ɔ sran'm be fa'n, i yɛ man be ´nunnun-ɔn. Kpɛkuun klɔ nga be sisi be wun'n, i yɛ ɔ ´bo be-ɔ.

¹⁰ Kɛ be ´kan ndɛ'n, sran ng'ɔ di nanwlɛ'n yɛ amun kpɔ i-ɔ.

¹¹ Amun di be nga be lɛ-man wie'n be lufle. Be ble kan nga be kpɛ'n, kpɛkuun amu'an ko de wie bé sa nun. I sɔ'n ti, sua kpakpa nga an kplannin'n, an su tran-man be nun. Amun anwlɛn su vinyi nga an tali'n, bɔ be su mma fɛfɛ'n, amun su nɔn-man vinyi sɔ'm be su mma'n be nzue wie.

¹² «Min Nyanmiɛn, amún sa tɛ nga amu'an yo'n, bɔ ɔ'a bobo su n si be. N si kɛ sran nga ɔ'a yo-man like fi'n, an fa bé nyin be ci i. An kan ndɛ sika nun. Amun ndɛ kanwlɛ lɔ'n, amun bu ndɛ be yi i yalɛfuɛ'm be su.»

¹³ Blɛ'n ɔ'a yo kekle. I sɔ'n ti, be nga be si ngwlɛlɛ'n, be wun ndɛ-ɔ be kwla kan-man.

¹⁴ Nán an kunndɛ kɛ amun yo sa tɛ. Sa ng'ɔ ti kpa'n, yɛ amun `kunndɛ amun `yo-ɔ. I liɛ'n, an ´nyan nguan, kpɛkuun Anannganman b'ɔ sie mɛn wunmuan'n ɔ nin amun wa tran kpakpa sakpa kɛ an fa sunnzun su'n sa.

¹⁵ Nán amun fa sa tɛ yolɛ'n be `sie amun anwlɛn'n nun mlɔnmlɔn. Man klun-ufue yolɛ'n yɛ ɔ tran amun anwlɛn'n nun-ɔn. Amun ´kan ndɛ-ɔ, amun `di nanwlɛ. Amun `di nanwlɛ, i liɛ'n nja, sɛ Anannganman b'ɔ sie mɛn wunmuan'n ɔ ´si Zozɛf i anunman nga be ka'n be aunnvuɛ o!

¹⁶ I sɔ'n ti min Anannganman bɔ n sie mɛn wunmuan'n n wan yoo: «Gua'n su, ɔ ti fɛfɛlɛ'n cɛ yɛ be fɛfɛ-ɔ. Klɔ nun akpɔ'm be nun'n, sran'm be ´kpankpan be ´se kɛ: ‹Ɔo! ?Nguɛ nyrɛnnɛn ndɛ liɛ yɛlɛ nga?› Be ´flɛ fie su junman difuɛ mun sɛ bo. Kpɛkuun be nga be si ngwlɛ yi kpa'n, be ´ko flɛ be kɛ be wa sun.

¹⁷ Cɛn nga n ´kɔ amun sin vinyi fie'n su lɔ'n, san sunlɛ cɛ yɛ amun ´sun-ɔn.»

Anannganman i cɛn'n

¹⁸ Amun bɔ an wo Anannganman i cɛn'n i minndɛlɛ'n, amun yako lele! ?Amun klun lɔ'n, an bu i kɛ i sɔ cɛn'n nun'n muae yɛ amun wa nyɛn i Anannganman sa nun-ɔn? Ɔ siɛ i mlɔnmlɔn! Amún nyin yɛ ɔ ´si amun ble-ɔ.

¹⁹ Amun ´yo kɛ sran wie bɔ i waan ɔ su wanndi asɔmɔli i nyrun kpɛkuun ɔ'a kɔ fu kangale su'n sa. Kɛ ɔ fɛ i lɛ ju i awlo lɔ, ɔ ´fɛ i sa fua talɛ wun-ɔn, wuo ɔ'a kɛ i.

²⁰ ?Anannganman i cɛn'n nun'n, lika'n ´kpaja? Ɔ siɛ mlɔnmlɔn! Ɔ ´yo aosin cɛn, lika'n ´lu tritritri! Be su wun-man kɛ lika'n ɔ kpaja bɔ kaan sa!

Izraɛlfuɛ'm be Nyanmiɛn sulɛ'n ɔ'a flan Anannganman

²¹ Anannganman'n wan yoo: «Min wun wunlɛ ng'ɔ ju i blɛ-ɔ an ba'n, ɔ yo min kain, ɔ yo min tɛ. Amun anyia nga amun yia'n ɔ'a flan min.

²² Tɛ nga be yrɛ i nnɛn'n kɔlikɔli'n bɔ an ´yi man min'n, ɔ nin nnɛn nga amun kun be be man min ekun'n, b'a flan min. Nannin lowa nga an fa yi bo kun yolɛ i su tɛ'n, min ndɛ nun-man nun.

²³ Nán n ti amun jue tolɛ kun! An `yaci sanngo'm be bolɛ man n ti sa!

²⁴ Amun `yaci sa nuan su yolɛ man ɔ sonji kɛ nzue b'ɔ sonji'n sa. Man sa seiin yolɛ ɔ sonji kɛ nzue ba wie b'ɔ sonji gblogblo b'ɔ wie-man nun le'n sa.

²⁵ ?Izraɛlfuɛ mun, afuɛ ablanan nga an dili i aawlɛ flɛnnɛn nun lɔ'n, amun yili tɛ be mannin min? ?Amun yili sraka mannin min cɛn kun sa le?

²⁶ ?I sɔ blɛ'n nun'n, Sakit b'ɔ ti amun famiɛn nin amun amuɛn'n, ɔ nin amun amuɛn Kewan b'ɔ ti amun nzraama'n, bɔ an bɔbɔ yɛ amun sɛli be'n, kɛ an su be sɔ-ɔ? Amun bɔbɔ an si nun dan, nán sran yɛ ɔ ´kan kle amun-ɔn.

²⁷ I sɔ'n ti, n ´yo man be wa tra amun be ´kɔ Damas sin mmua lɔ kpa.» Nyanmiɛn b'ɔ sie mɛn wunmuan'n, b'ɔ suan Anannganman'n yɛ ɔ kan sɔ kle amun-ɔn .