Amɔs 3 - NYANMIƐN NDƐ'N 1998

Sa nga Izraɛlfuɛ'm be yoli'n, Nyanmiɛn nin be ´kɛn i ti ndɛ

¹ Izraɛlfuɛ mun, an `tie, amun bɔ Anannganman'n fali amun Ezipt lɔ bali'n, an `tie amún wun ndɛ ng'ɔ o i klun'n:

² «Sran beblebe nga be wo asiɛ'n su'n, amun kunngba cɛ yɛ n fali amun kɛ e nin amun e su nanti-ɔ. I sɔ'n ti amún sa tɛ kwlaa nga amun yoli'n, e nin amun e ´kɛn i ngba'n i ti ndɛ.»

Kɛ Anannganman'n ko fa ndɛ ko wlɛ sran nuan'n, san ɔ ´kan

³ ?Sran nnyɔn bɔ be ´kɔ lika sa'n, sɛ bé nuan ɔ'a dun-man mmua ɔ'a sɛ-man bé wun'n, be kɔ likawlɛ sɛ yɛ ɔ yo ye-ɔ?

⁴ ?Kɛ asɔmɔli'n wo bo nun lɔ'n, sɛ ɔ'a tra-man nnɛn wie'n, be ti i kpanlɛ? ?Kɛ asɔmɔli bɔ ɔ'a kpɛ cro'n ɔ wo i lawlɛ nun lɔ'n, sɛ ɔ'a tra-man like'n, ɔ kpan?

⁵ ?Aya kun wo sa sɛ b'a sua-man nun mlɔnmlɔn'n, nnɛn tɔ nun-ɔn ɔ trɛ i? ?Sɛ kusu b'a suɛ-mɛn i yɛklɛɛ bɔ like fi ɔ'a tɔ-man nun'n, ɔ fanndi sa ngbɛn?

⁶ ?Klɔ kun su'n sɛ be ´bo awɛ'n, sran'm be usa-man kɛ nguɛ sa-a? ?Sa onin yɛ ɔ tɔ klɔ kun su sa bɔ nán Anannganman'n yɛ ɔ mɛn i wun atin-ɔn?

⁷ Nanwlɛ, sa kwlaa nga Anannganman waan ɔ ´yo'n, san ɔ ´dun mmua kan kle i sufuɛ nga be ijɔ i nuan'n .

⁸ ?Kɛ asɔmɔli kun tian sa'n, wan yɛ ɔ se kɛ ɔ bo-man bli-ɔ? ?Sɛ Anannganman Nyanmiɛn'n fa ndɛ wlɛ i sran kun nuan'n, ɔ lɛ atin se kɛ ɔ kan-man?

Sa ng'ɔ wa tɔ Samari su'n

⁹ Amun `kpan be se Asdɔd famiɛn'n i awlofuɛ mun nin Ezipt famiɛn'n i awlofuɛ mun kɛ yoo: «Be `yia Samari oka'm be su lɔ, nan be `nian sannganlɛ bɔ ɔ'a sanngan lɔ-ɔ nin sa kekleekle bɔ ɔ'a ju sran'm be su lɔ-ɔ.»

¹⁰ Anannganman'n wan yoo: «Like ng'ɔ ti-man bɔ be yo'n, yɛ Samarifuɛ'm be yo-ɔ. Sa kekleekle nga be yo'n, i nun ninnge nga be nyɛn i'n, nin sran'm bé bo ninnge nga be fɛn'n, be tiɛn i nuan bé sua kpakpa'm be nun.»

¹¹ I sɔ'n ti Samarifuɛ mun, Anannganman Nyanmiɛn'n wan yoo: «Amun kpɔfuɛ'm be wa sin yia amun mɛn'n, be ´bubu talɛ ng'ɔ si amun klɔ wun'n, be ´fɛn amún sua kpakpa'm be nun ninnge mun.»

?M'an nyan mín ti wie yɛ?

¹² Anannganman'n wan yoo: «Kɛ asɔmɔli tra bua kun'n, i nga bua kankanfuɛ'n kwla de i nuan nun'n, yɛlɛ bua'n i ja nnyɔn, wie kusu-ɔ i sukpɔ nnya'n i bue kan. Sa kunngba sɔ'n yɛ ɔ wa tɔ Izraɛlfuɛ nga be tran Samari'n be su-ɔ. Be bɔ be la bia ndɛnndɛn kpakpa'm be nun'n nin be bɔ be la bɛ fɔkunfɔkun'm be su'n, san be nun kaan sa yɛ be ´nyan bé ti-ɔ.»

Nyanmiɛn ɔ'a fua a kle Izraɛlfuɛ mun

¹³ Anannganman Nyanmiɛn'n, Nyanmiɛn b'ɔ sie mɛn wunmuan'n wan yoo: «An `sie amún su nan an `fa ndɛ yɛ'n be `ju Zakɔb osufuɛ'm be nyrun.

¹⁴ Cɛn nga bɔ n jaso kɛ n ´tu Izraɛl fɔ'n, mín sa wa kan sraka yiwlɛ nga be o Betɛl lɔ'n mun. Like nga be ti kɛ nnɛn wɛ sa bɔ be o sraka yiwlɛ sɔ'm be cɔnjɔ'm be su'n, be ´bubu be ´gua asiɛ wun .

¹⁵ M ´bubu ayrɛ blɛ sua mun nin aunyɛyɛ blɛ sua mun. Sua nga be fa sui je be wlawlali nun'n, be ´wie bubu. Sua sroesroe sɔ'm be ´tu lɛ!» Anannganman'n yɛ ɔ kan sɔ kle amun-ɔn.