Amɔs 2 - NYANMIƐN NDƐ'N 1998

(Moabfuɛ mun)

¹ Anannganman'n wan yoo: «Moabfuɛ'm bé sa tɛtɛ nga b'a yo'n sɔnnin. Be yrali Edɔm famiɛn'n i owie'n kɔlikɔlikɔli. Ɔ man e nin be y'a nyɛn i.

² N ´fa sin n ´yi Moab mɛn'n nun. Sin'n ´di sua nglanman nga be o Kɛrizɔt klɔ'n su mun. Be ´kpan alɛ kpanlɛ, be ´bo awɛ. Oyo-oyo sɔ'n nun, Moab mɛn'n ´bo.

³ N ´kun famiɛn ng'ɔ sie lɔ mɛn'n. N kun be famiɛn i awlo lɔ sran dandan'm be kusu wie.»

(Zidafuɛ mun)

⁴ Anannganman'n wan yoo: «Zidafuɛ'm bé sa tɛtɛ nga b'a yo'n sɔnnin. Mmla nga n fa mannin be'n, be yoli i finfin. B'a fa-man mín nuan su ndɛ'm be su. Be yacili atin kpa'n be fali uflɛ, i ti be mlinnin. Gblɛ ninnge kɛ amuɛn'm be sa'n, bɔ be nannan'm be yoli'n be su yɛ be su-ɔ. Ɔ man e nin be y'a nyɛn i.

⁵ N ´fa sin n ´yi Zida mɛn'n nun. Ɔ man i sɔ sin liɛ'n ɔ ´yra sua nglanman nga be o Zerizalɛm lɔ'n mun.»

(Izraɛlfuɛ mun)

⁶ Anannganman'n wan yoo: «Izraɛlfuɛ'm bé sa tɛtɛ nga b'a yo'n sɔnnin. Ɔ man e nin be y'a nyɛn i. Sran nga ɔ'a yo-man sa'n, sika dunman nun ti be yo i atɛ ɔ kaci kanga. Ngbabua kunngun nnyɔn cɛ bɔ yalɛfuɛ'n ɔ'a kwlɛ-mɛn i kalɛ tannin'n ti, be yo i atɛ.

⁷ Nga be kunndɛ'n, yɛlɛ kɛ be bɔ be lɛ-man like'n, be ´mianmian be lele be ´de be sa nun ninnge kwlaa. Yalɛfuɛ'n kɛn i ndɛ liɛ-ɔ, jɔlɛ difuɛ'm be bu-mɛn i like fi. Sran kun nin i si be kunndɛ bla kunngba. I sɔ'n ti min dunman'n i sacilɛ.

⁸ Lika kwlaa bɔ be sɔ be amuɛn'm be lɛ'n, yalɛfuɛ'm bé wun ninnge nga be fa wlali aowa bé sa nun'n yɛ be sɛ be la su-ɔ. Nzan nga be dede i be sran'm bé sa nun'n, yɛ be nɔn i be amuɛn sua'm be nun-ɔn.

⁹ Sanngɛ wuun Amɔrfuɛ mun bɔ be tɛnndɛn'n ti kɛ sɛdri waka sa'n, bɔ be kekle'n ti kɛ sɛni waka sa'n, m bɔbɔ min m'an nunnun be m'an guɛ i ti nin bo m'an man amun.

¹⁰ N fali amun Ezipt lɔ m bali. N ko sunmannin amun afuɛ ablanan aawlɛ flɛnnɛn'n nun lɔ lele nan m'an fa Amɔrfuɛ'm be mɛn'n m'an man amun.

¹¹ N kpali amun mma yasua'm be wie mun n fa yoli min nuan ijɔfuɛ. N kpali amun nvle'n nun gbanflɛn'm be wie mun. N fali be n yoli m bɔbɔ min Nyanmiɛn min liɛ klonglo. ?Izraɛlfuɛ mun, ɔ'a yo-man sɔ?» Anannganman'n yɛ ɔ usa amun sɔ-ɔ !

¹² «Sanngɛ kpɛkuun amu'an man be nga be tali nda kɛ be yo min liɛ klonglo'm be nzan b'a nɔn. An tannin Nyanmiɛn nuan ijɔfuɛ'm be atin kɛ nán be kan mín nuan ndɛ'n kun.

¹³ N ´wɛtɛ amun mín ja bo kɛ kakaklolo nga b'a gua nun ble ɔ'a yi bɔ be kɛ ɔ kɔ'n, wuun asiɛ'n wɛtɛ'n sa.

¹⁴ Sran nga i wun kpɛ kpa'n bɔbɔ, ɔ su wun-man fiawlɛ. Sran nga be le wunmiɛn kpa'n bɔbɔ, be su kwla-man like fi yo. Be nga be ti alɛ kunfuɛ'n be su fite-man nun.

¹⁵ Ta tofuɛ'n su nyan-man jranwlɛ. Wanndifuɛ dan kpa'n bɔbɔ su nyɛn-mɛn i ti. Nnɛn kpanngɔ fufuɛ'n bɔbɔ su kwla de-mɛn i wun.

¹⁶ I sɔ cɛn'n nun'n, sonja'm be nun yakpafuɛ'n bɔbɔ, ɔ ´guɛ i alɛ ninnge'm be ase ´wanndi.» Anannganman'n yɛ ɔ kɛn i sɔ kle amun-ɔn.