Amɔs 1 - NYANMIƐN NDƐ'N 1998

¹ Tekoa lɔ nnɛn kankanfuɛ nga be flɛ i kɛ Amɔs i nuan su ndɛ yɛ ɔ o fluwa nga nun-ɔn. Anannganman yili Izraɛl mɛn'n i wun ndɛ'n i nglo kleli i. Kɛ ɔ yili kleli i sɔ'n, i afuɛ nnyɔn b'ɔ ´ju'n yɛ asiɛ'n kejeli-ɔ. Blɛ sɔ nun'n, wuun Ozias yɛ ɔ ti Zida famiɛn nin-ɔn. Zɔas i wa Zeroboam kusu yɛ ɔ ti Izraɛl famiɛn nin-ɔn .

² Amɔs wan yoo: «Anannganman'n wo Zerizalɛm lɔ ɔ kpan kɛ asɔmɔli sa. Ɔ o Siɔn lɔ, be ti i ngan. Kɛ ɔ ko yo sɔ'n, nnɛn'm be didiwlɛ'n nun ti nyrɛnnɛn ngbɛn. Karmɛl oka'n su lɔ ninnge'm be kwlaa be ´wu kee !»

Mɛn nga Nyanmiɛn nin be lɛ i'n (Sirifuɛ mun)

³ Anannganman'n wan yoo: «Sirifuɛ nga be o Damas'n be sa tɛtɛ nga b'a yo'n sɔnnin. Bé wun ndɛ ng'ɔ o min klun'n ti-man blɛblɛ. Be jɔjɔli Galaadfuɛ'm be nun kɛ asiɛ nun fundanlɛ blalɛ wie yɛ b'a fa sin be su sa. Ɔ man e nin be y'a nyɛn i.

⁴ N ´fa sin n ´yi Azaɛl i sua'n nun. N ´yra famiɛn Bɛn-Adad i sua dan'n.

⁵ Gboklo nga be fa to Damas klɔ'n i anuan'n nun, n ´tu, kpɛkuun n ´nunnun Bikat-Avɛn lɔfuɛ mun nin famiɛn ng'ɔ sie Bɛt-Edɛni'n. Sirifuɛ'm be kusu be liɛ'n, be wa tra be ´kɔ Kir.» Anannganman'n yɛ ɔ kan sɔ kle amun-ɔn .

(Filistifuɛ mun)

⁶ Anannganman'n wan yoo: «Filistifuɛ'm nga be o Gaza bé sa tɛtɛ nga b'a yo'n sɔnnin. Be trali nvle wunmuan kun be fa ko mannin Edɔmfuɛ mun. Ɔ man e nin be y'a nyɛn i.

⁷ N ´fa sin n ´yi Gaza klɔ'n nun. I sɔ sin liɛ'n ɔ ´yrɛ i sua nglanman mun.

⁸ N ´nunnun Asdɔdfuɛ mun nin famiɛn ng'ɔ sie Askalɔn'n. N ´tu mín nyin n ´wɔ Ekrɔnfuɛ mun. Filistifuɛ'm be kwlaa nga be ka'n be ´wie wu.» Anannganman'n yɛ ɔ kan sɔ kle amun-ɔn .

(Tirfuɛ mun)

⁹ Anannganman wan yoo: «Tirfuɛ bé sa tɛtɛ nga b'a yo'n sɔnnin. Anuansɛ ng'ɔ o be nin be niaan Izraɛlfuɛ'm be afiɛn'n, b'a bu-man i akunndan. Be trali klɔ'n wie'm be sufuɛ'm be kwlaa be fa ko mannin Edɔmfuɛ mun. Ɔ man e nin be y'a nyɛn i .

¹⁰ I sɔ'n ti, n ´fa sin n ´yi Tir klɔ'n nun. I sɔ sin liɛ'n ɔ ´yra klɔ'n su sua nglanman'm be kwlaa.»

(Edɔmfuɛ mun)

¹¹ Anannganman'n wan yoo: «Edɔmfuɛ'm bé sa tɛtɛ nga b'a yo'n sɔnnin. Tokofi o bé sa nun yɛ be fa fuan be niaan Izraɛlfuɛ mun-ɔn. B'a si-man be aunnvuɛ mlɔnmlɔn. Be ya ti tɛ ngboko. Be fali ya ble be sieli be klun mlɔnmlɔnmlɔn. Ɔ man e nin be y'a nyɛn i.

¹² N ´fa sin n ´yi Teman klɔ'n nun. I sɔ sin liɛ'n ɔ ´yra sua nglanman nga be o Bɔzra lɔ'n mun.»

(Amɔnfuɛ mun)

¹³ Anannganman'n wan yoo: «Amɔnfuɛ'm bé sa tɛtɛ nga b'a yo'n sɔnnin. Ɔ man e nin be y'a nyɛn i. Be mɛn bɔ be kunndɛ kɛ ɔ trɛ'n i dunman nun ti be kpacili Galaad bla wunnzɛfuɛ'm be klun.

¹⁴ N ´fa sin n ´yi be klɔ Raba'n nun, i sɔ sin liɛ'n ɔ ´yra klɔ'n su sua nglanman mun. Kɛ ɔ ´yo sɔ'n, wuun sran'm be ´kpan alɛ kpanlɛ. Alɛ kunlɛ cɛn'n nun'n, aunngban dan kun ´fita kɛ nzue su tɔ nan aunngban dan su fita sa.

¹⁵ Be ´tra be famiɛn'n nin i awlo lɔ sran dandan mun be lomuɛn kɔ mɛn uflɛ nun.» Anannganman'n yɛ ɔ kan sɔ kle amun-ɔn.