Akunndanfuɛ'n 9 - NYANMIƐN NDƐ'N 1998

¹ Ninnge nga n wunnin be'n, m buli be akunndan kpa n niannin. Sa nga n wunnin i'n yɛlɛ kɛ sran kpa mun nin ngwlɛlɛfuɛ mun be nin be junman mun be o Nyanmiɛn sa nun. Klolɛ nin kpɔlɛ'n kusu sran si-man be nun like fi, afin ɔ si-man i nyrun lɔ sa mun.

² Sa nga be ju sran'm be kwlakwla bé su'n, i kwlaa ti kunngba. Sran kpa'n i agualiɛ'n nin sran tɛ'n i agualiɛ'n be ti kunngba. Sa ng'ɔ ju sran kpa nin sran ng'ɔ ti saun Nyanmiɛn nyrun bé su'n, i sɔ sa kunngba'n ju sa tɛ yofuɛ'n su. Sran ng'ɔ yi sraka o, sran ng'ɔ yi-man sraka o, klun-ufuefuɛ o, klunwifuɛ o, sran ng'ɔ ta Nyanmiɛn nda o, sran nga be sro nda talɛ o, be awieliɛ'n ɔ ti kunngba.

³ Nyanmiɛn'n i bo wa'n, ninnge'm be nun tɛ kpa kun yɛ ɔ o yɛ. Sran'm be kwlaa be agualiɛ'n ɔ ti kunngba, ɔ man kɛ sran'm be ´yo sa tɛ'n bɔ ngunmin sa, yɛ sinnzin akunndan'n yɛ ɔ o be anwlɛn'n nun sa tititi-ɔ, kpɛkuun b'a fa wu, wuun b'a ko to be nga be dun mmua wuli'n be lɔ.

^4-5 Kusu san sran nga i nyin tɛ o su'n yɛ ɔ lafi su kɛ ɔ kwla nyan like cɛn wie-ɔ. Be nga bé nyin o su'n, be si kɛ be ´wu cɛn kun, sanngɛ be nga b'a wu'n be liɛ'n be wun-man sa fi wlɛ. Be minndɛ-man akatua fi kun, afin sran'm bé wla ɔ'a fi be su. Alua nga i nyin tɛ o su'n, i kpa tra asɔmɔli i fuɛn'n lele.

⁶ Be sran klolɛ o, be sran kpɔlɛ o, be kwla silɛ o, i kwlaa sɔ'n ɔ'a wie. Ninnge nga be ´yo be nyanmiɛn'n bo wa'n, be liɛ nun-man nun kun mlɔnmlɔn.

⁷ I sɔ'n ti, di ɔ́ sa ti aliɛ'n, nan nɔn ɔ́ sa ti nzan'n man ɔ klun jɔ. Afin ɔ sa nga a yo be'n, be jɔ Nyanmiɛn i klun.

⁸ Blɛ'n kwlaa nun'n, man ɔ́ wun tralɛ'm be ´yo ufue, kpɛkuun nán ngo tu ɔ́ ti'n su.

⁹ Wɔ anwlɛn su bla'n, a nin i be `tran fɛfɛ blɛ vɛɛ kan nga Nyanmiɛn fa mannin wɔ nyanmiɛn'n bo wa'n nun. Afin ɔ liɛ nga a ko nyɛn i afɛ nga a fɛli nyanmiɛn'n bo wa nun'n yɛ ɔ o lɛ-ɔ.

¹⁰ Like kwlaa nga a ´yo'n, fa ɔ wunmiɛn'n gua su yo. Afin kɛ a wa wu a ´kɔ lɔ lɛ'n, i junman dilɛ o, i sa nun yiyilɛ o, i sa silɛ o, i ngwlɛlɛ o, be wie fi nun-man lɔ kun.

Sran'm be di-man ngwlɛlɛ'n su sa kwlaa nun

¹¹ N wunnin i nyanmiɛn'n bo wa ekun kɛ wanndilɛ i akatua'n ɔ ti-man be nga bé wun kpɛ'n be liɛ titi, kwlalɛ'n kusu ti-man safunyrɛn'm be liɛ titi. Nán cɛn kwlaa yɛ ngwlɛlɛfuɛ'n nyɛn i nuan nun aliɛ di-ɔ. Ngwlɛlɛfuɛ'n yo-man anyanbeunfuɛ cɛn ngba. Nán be nga be si sa'n yɛ be man be kɔmin su cɛn ngba-a. Afin kɛ blɛ'n fa ti bɔ sa'm be fa ju'n, i su like yɛ be wun i-ɔ.

¹² Kɛ kpatra'n b'ɔ ´wun i wun-ɔn, lala ɔ'a trɛ i'n, annzɛ anunman'n b'ɔ ´wun i wun-ɔn, aya ɔ'a trɛ i'n, kɛ klɔ sran'n kusu ɔ ti sɔ-ɔ, ɔ si-man cɛn nga nyrɛnnɛn'n ɔ wa tɔ i su-ɔ. Blɛ wie'n, sran'n sunnzun-man kɛ sa su wa nyɛn i, kpɛkuun sa wie ɔ'a tɔ i su ɔ'a blɛblɛ i wun.

¹³ N wunnin i kɛ nyanmiɛn'n bo wa'n ngwlɛlɛ i wun ndɛ dan kun wo lɛ b'ɔ nin kanlɛ fata.

¹⁴ Klɔ kaan kun wo lɛ, i su sran'm b'a sɔn-man. Famiɛn kun b'ɔ kwla'n, ɔ ɔli kɛ ɔ nin i nunfuɛ'm be ´kun alɛ. Ɔ nin i sran'm be sin yiali klɔ'n. Be kplannin alɛ kunlɛ talɛ'n sin yiɛli i.

¹⁵ Klɔ sɔ'n su yalɛfuɛ kun wo lɛ b'ɔ si ngwlɛlɛ kpa. I ngwlɛlɛ'n ti man klɔ'n sufuɛ'm be fiteli nun, sanngɛ sran fi wla ɔ'a kpɛn-mɛn i su.

¹⁶ Yɛ n seli kɛ: «Ngwlɛlɛ'n i kpa liɛ'n, wunmiɛn'n to-mɛn i.» Sanngɛ be bu-man yalɛfuɛ'n i ngwlɛlɛ b'ɔ si i'n i like fi. I ndɛ ng'ɔ kan'n, sran'm be fa-man su.

¹⁷ Ngwlɛlɛfuɛ b'ɔ kɛn i ndɛ wɛtɛɛ su'n, i ndɛ'n i tielɛ ti kpa tra sinnglinfuɛ'm bé su kpɛnngbɛn b'ɔ ´kan ndɛ kle be-ɔ, ɔ kpankpan be su'n i ndɛ liɛ'n i tielɛ'n.

¹⁸ Ngwlɛlɛ'n i kpa liɛ'n, alɛ ninnge'm be to-mɛn i. Sa tɛ yofuɛ kunngba cɛ kwla saci like kpanngban.