Akunndanfuɛ'n 8 - NYANMIƐN NDƐ'N 1998

¹ ?Wan yɛ ɔ ti kɛ akunndanfuɛ'n i sa, b'ɔ si sa nga be ju'n be bo-ɔ? Ngwlɛlɛ'n ɔ fite sran i ngban su, kpɛkuun i nyrun wiwi'n i kwlaa wie.

Sɛ bé nyin yi famiɛn'n ɔ ti kpa

² Sɛ famiɛn'n man mmla kun'n, man ɔ́ nyin yi i, afin a tɛli i nda Nyanmiɛn nyrun.

³ Nán jaso i bo, yɛ nán yo sa nga i klun klo-man su'n kɔ ɔ nyrun. Afin sa kwlaa nga famiɛn'n waan ɔ ´yo'n ɔ su yo.

⁴ Famiɛn'n i nuan nun ndɛ'n yɛ ɔ ti ndɛ kwlaa i atabo nin-ɔn. ?Wan yɛ ɔ kwla se i kɛ: «Nguɛ yɛlɛ nga a ´yo i lɛ nin-ɔn?»

⁵ Sran nga bɔ i nyin yi i'n ɔ su fɛ-mɛn i wun wlɛ-mɛn i ndɛ tɛ nun. Akunndanfuɛ'n si i anwlɛn'n nun lɔ kɛ blɛ wa ju bɔ Nyanmiɛn wa di jɔlɛ-ɔ.

⁶ Afin sa kwlaa nga sran'm be yo'n, i ti be wa di be jɔlɛ cɛn kun, yɛlɛ kɛ sran'n i klunwi'n ɔ'a yo dan ngboko.

⁷ Kusu ɔ si-man sa ng'ɔ wa ju i su'n. ?Yɛ wan li yɛ ɔ ´kan wafa nga sa sɔ'n wa fa ju'n ´kle i-ɔ?

⁸ Sran fi kwla tra-man i bɔbɔ i nguan'n nun. Sran fi kwla su-man i wie cɛn'n bo kɔ-mɛn i sin. Kɛ alɛ'n ko tɔ sa'n, ɔ lɛ-man kɛ b'a fite nun, klunwi yolɛ'n ɔ kwla de-man klunwi yofuɛ mun.

Kɛ sran'n fa ti'n i wun akunndan bulɛ

⁹ M buli ninnge nga be yo be nyanmiɛn'n bo wa'n be akunndan kpa n niannin. Ɔ lɛ blɛ kun bɔ sran kun sie i wiengu kun kpɛkuun ɔ kle i nyrɛnnɛn-ɔn.

¹⁰ N wunnin kɛ be nga be yo klunwi'n be nyan sɛ dan kpa. Kɛ sran'm be fa i sɔfuɛ'm be fuɛn'n be kɔ Nyanmiɛn i sua'm be nun bɔ be fite'n, kpɛkuun bé wla fi sa tɛ nga sran sɔ'm be yoli'n. Sa sɔ'n tra sran i akunndan'n su, yɛ i kwlaa ti afɛ ngbɛn.

¹¹ Kɛ be ka-man bé ja nun lɛ be tu-man sran ng'ɔ yo sa tɛ'n i fɔ kɛ ɔ nin i fata'n sa'n, i ti yɛ sa tɛ yolɛ'n i akunndan'n wo sran'm be anwlɛn'n nun b'ɔ wie-man le nin-ɔn.

¹² Kannzɛ bɔ sa tɛ yofuɛ'n ɔ yo sa tɛ'n lele kpɛ ya, nan i nguan'n i sin ɔ'a kpɛ-man'n, sanngɛ n si kɛ be nga be nyin yi Nyanmiɛn'n be liɛ be lɛ muae .

¹³ Klunwifuɛ'n ɔ nyan-man muae yɛ i nguan nyanman'n yo-man tɛnndɛn. I nguan sɔ'n ɔ yo vɛɛ kan kɛ fɔnvɔ sa yɛlɛ kɛ i nyin yi-man Nyanmiɛn mlɔnmlɔn .

¹⁴ Nyanmiɛn'n i bo wa'n, sa kun o lɛ bɔ i wlɛ wunlɛ yo ya: be yo sran kpa wie'm be kɛ klunwifuɛ mun sa, kpɛkuun be yo klunwifuɛ'm be kɛ sran kpa mun sa. N wunnin kɛ sa sɔ'n tra sran i akunndan'n su, yɛ i kwlaa ti afɛ ngbɛn.

¹⁵ N wunnin i kɛ like ng'ɔ ti kpa man sran'n yɛlɛ aklunjuɛ dilɛ. Afin nyanmiɛn'n i bo wa'n, like fi ti-man kpa man-man sran kɛ like dilɛ, nin nzan nɔnlɛ, ɔ nin aklunjuɛ nyanlɛ'n sa. Kɛ sran'n fɛ nyanmiɛn'n bo wa lele'n, i junman nuan like nga Nyanmiɛn mɛnnin i kɛ ɔ `nyɛn i'n yɛ ɔ o lɛ-ɔ.

¹⁶ N fali mín wun n wlali ngwlɛlɛ'n i silɛ'n nun, yɛ m buli kokolɛ nga sran'm be koko nyanmiɛn'n bo wa'n i akunndan, afin i kɔnguɛ o, i wia'n nun o, sran'm be nyinma si-man lafilɛ'n.

¹⁷ N wunnin Nyanmiɛn i junman ng'ɔ di'n i kwlaa, yɛ n wunnin kɛ sran'm be ´kle bé wun nyrɛnnɛn ngbɛn, be su wun-mɛn i wlɛ le. Sran nga bɔ i waan ɔ si ngwlɛlɛ bɔbɔ'n, ɔ su wun-mɛn i wlɛ le.