Akunndanfuɛ'n 7 - NYANMIƐN NDƐ'N 1998

¹ Sran i dunman kpa nga be bo i sa'n, ɔ ti kpa tra ayre fanninfannin i kpafuɛ'n bɔbɔ. Sran i wie cɛn'n i kpa trɛ i awuliɛ cɛn'n.

² Awlo nga sɛ o nun'n, i nun kɔlɛ'n ti kpa tra awlo nga be su di cɛn nun'n. Yɛlɛ kɛ sran'm be kwlaa be awieliɛ yɛlɛ wie'n, i ti ɔ fata kɛ be nga be nyin o su'n be bu i akunndan.

³ Awlaboɛ'n ɔ man sran ngwlɛlɛ tra srilɛ'n. Afin ɔ yo man sran'n ɔ mlɛn i nyrun sanngɛ ɔ man ɔ kaci sran kpa.

⁴ Ngwlɛlɛfuɛ'm be bu wie'n i akunndan. Sanngɛ sinnglinfuɛ'm be liɛ'n, ngowa'n yɛ be waan be `fa man be nan be kan-an.

⁵ Kɛ n ko sie mín su sinnglinfuɛ i manmanlɛ jue'n i bo'n, ɔ flunman kɛ n tie afɔtuɛ ndɛ nga ngwlɛlɛfuɛ'n kan kle min'n.

⁶ Sinnglinfuɛ'n i srilɛ'n ɔ ti kɛ yie mma bɔ b'a fa wla sin nun b'ɔ su tɛtɛ kplɛlɛ sɛ wie bo'n sa. Sa sɔ'n tra sran i akunndan'n su, yɛ i kwlaa ti afɛ ngbɛn.

⁷ Sɛ be su kle sran kun nyrɛnnɛn'n, ɔ yo ngwlɛlɛfuɛ'n i ya lele tra su. Adi nga be man'n, ɔ yo man sran di-man nanwlɛ.

⁸ Like kwlaa i agualiɛ'n ɔ ti kpa trɛ i bo bolɛ'n. Amlin dilɛ ti kpa tra bé wun tulɛ.

⁹ Nán fa ya ndɛndɛ. Afin sinnglinfuɛ yɛ i anwlɛn'n ɔ ti fufu-ɔ .

¹⁰ Nán usa kɛ ɔ yo sɛ ti yɛ laa blɛ liɛ'n ɔ ti kpa tra ndɛ blɛ liɛ nin-ɔn. Ngwlɛlɛfuɛ'n usa-man i sɔ sa liɛ'n.

¹¹ Ngwlɛlɛ'n ɔ lɛ nyrun kɛ aja bɔ b'a sie'n ɔ fa lɛ nyrun'n sa. Yɛlɛ kɛ ɔ ti sran'm be kwlaa be wun nyanman nun.

¹² Afin be fa ngwlɛlɛ'n kpli bé ti kɛ be fa sika kpli bé ti'n sa. Sa nga ti bɔ ngwlɛlɛ silɛ'n ti kpa'n yɛlɛ kɛ ɔ man sran ng'ɔ si ngwlɛlɛ'n i nguan nyanman'n ɔ yo tɛnndɛn.

¹³ Nian Nyanmiɛn i sa nuan ninnge mun. ?Wan yɛ sɛ Nyanmiɛn bli like kun'n ɔ kwla tinngɛ nun-ɔn?

¹⁴ Sɛ a wun ɔ́ wun fɛ'n, man ɔ klun jɔ, sɛ kusu a o nyrɛnnɛn nun'n, bu akunndan. Nyanmiɛn yɛ man sran wun i wun fɛ-ɔ, i kunngba'n yɛ man sran wun nyrɛnnɛn nin-ɔn. Kɛ ɔ ´yo nan sran ɔ'a si-man cɛn wie sa ng'ɔ wa ju'n, i ti yɛ ɔ yo i sɔ nin-ɔn.

¹⁵ Blɛ kan nga m'an di i asiɛ'n su wa nun'n, m'an wun kɛ sa'n kwlaa kwla ju. Kannzɛ bɔ sran'n ti kpa sɛ, sanngɛ ɔ kpɛ kpo wu. Sran wie kusu i klunwi liɛ'n be kwla kan-man, sanngɛ ɔ wu-man ndɛ.

¹⁶ Nán bu ɔ wun sran kpa yɛ nán bu ɔ́ wun ngwlɛlɛfuɛ. Sɛ a yo sɔ-ɔ a ´wu ndɛ kpa'n.

¹⁷ Nán yo klunwi yɛ nán fa ɔ wun wla sinnzin ninnge'm be yolɛ nun. Sɛ ɔ ti-man sɔ-ɔ a ´wu ndɛ kpa'n.

¹⁸ Ɔ ti kpa kɛ a `fa afɔtuɛ nnyɔn ng'ɔ o lɛ'm be su. Afin sran nga i nyin yi Nyanmiɛn'n, ɔ fata-man kɛ be kɛn i wun ndɛ.

¹⁹ Ngwlɛlɛfuɛ'n kannzɛ ɔ ti kunngba'n, ɔ lɛ fanngan tra klɔ nga i siefuɛ'm be ju blu'n.

²⁰ Sran kun b'ɔ yo sa kpa lele guɛ i ti nin i bo'n, b'ɔ yo-man sa tɛ kaan sa le'n, i sɔ nun-man nyanmiɛn'n bo wa .

²¹ Nán fa ɔ́ su sie ndɛ nga sran'm be kan'n i ngba bo kɛ ɔ ´yo nan sɛ wɔ afanniɛn wie kan ɔ́ wun ndɛ tɛ-ɔ, w'a ti-man'n ti.

²² Afin ɔ bɔbɔ a si ɔ klun lɔ kɛ w'a kan sran wie'm bé wun ndɛ tɛ le.

²³ M buli ninnge'm be kwlaa be akunndan n niannin. N seli n klun lɔ kɛ: «N wa nanti kɛ ngwlɛlɛfuɛ sa.» Sanngɛ ɔ'a yo-man ye.

²⁴ Ninnge nga be o mɛn nun'n bé bo ti kploun dan. ?Wan yɛ ɔ kwla wun be wlɛ-ɔ ?

²⁵ Min waan n ´si sa'm bé bo. Min waan n ´si like nga be flɛ i ngwlɛlɛ'n i bo, yɛ min waan n ´si sa nga ti yɛ sa'm be ju'n. N wunnin kɛ klunwi yolɛ nin sinnzin yolɛ'n be ti fia like.

²⁶ N wunnin kɛ bla nga ɔ sua yasua'm be wun aya'n, ɔ wla sran nyrɛnnɛn nun tra wie b'ɔ kun sran'n. Klolɛ ng'ɔ se kɛ ɔ klo yasua'n ɔ ti kɛ aya sa, yɛ i sa'n ɔ ti kɛ jrɔkɔ sa yɛ ɔ fa ci i-ɔ. Sanngɛ sran ng'ɔ klo Nyanmiɛn'n, i sɔ bla'n kwla nyɛn-mɛn i, san sran ng'ɔ yo sa tɛ'n yɛ ɔ kwla nyɛn i-ɔ.

^27-28 Akunndanfuɛ'n waan: «M buli sa'm be kwlaa bé sin kunngunngun n guɛli lɔ nan n ´wun bé bo, sanngɛ n kunndɛli bé bo sɔ'n lele ngbɛn. N wunnin kɛ sɛ a wun yasua akpi kun gua su sa'n, be nun kunngba cɛ yɛ ɔ ti sran kpa-a. Bla'm be liɛ'n, man be ´sɔn sɛ, a kwla wun-man be nun kunngba sa bɔ ti sran kpa-a.

²⁹ Sa kunngba nga n wunnin i wlɛ kpa i kwlaa sɔ'n nun'n yɛ. Nyanmiɛn yili sran'm be kpa, be bɔbɔ yɛ be fali bé wun wlali sa sukusuku'm be nun-ɔn.»