Akunndanfuɛ'n 6 - NYANMIƐN NDƐ'N 1998

¹ N wunnin nyrɛnnɛn sa kun nyanmiɛn'n bo wa. Nyrɛnnɛn sa sɔ'n ɔ ti kɛ trɔ sa sran'm be su.

² A ´nian-an, sran wie o lɛ, kpɛkuun Nyanmiɛn ɔ'a yo man ɔ'a nyɛn i wun yɛ ɔ'a nyan nyrun. Like nga sran sɔ'n ɔ kunndɛ'n, i wie fi miɛn-mɛn i sa, sanngɛ wienun-ɔn, Nyanmiɛn kplin-man su kɛ ɔ di like sɔ'n su. Sran uflɛ yɛ ɔ di su-ɔ. Ɔ ti anwlɛn su fitalɛ like. Sa sɔ'n tra sran i akunndan'n su, yɛ i kwlaa ti afɛ ngbɛn.

³ Man sran kun wu ba lele ya yɛ man ɔ cɛ lele'n, sanngɛ sɛ i nguan tɛnndɛn sɔ'n nun ɔ'a nyan-man alaje nan ɔ'a nyan-man asieliɛ kpa'n, ba ng'ɔ wu i nin klun lɔ b'ɔ flo tɔ'n, i nyrun ba nyan trɛ i.

⁴ Afin ba ng'ɔ flo tɔli sɔ'n, ɔ bali ngbɛn, ɔ su sɛ i sin aosin'n nun lɔ, be su si-mɛn i dunman mlɔnmlɔn.

⁵ Ɔ'a wun-man wia'n i wun. I liɛ'n, ɔ flunman tra sran nga i waan be `se kɛ be wuli i nan ɔ'a cɛ nyanmiɛn'n bo wa'n.

⁶ ?Sɛ sran kun cɛ lele di afuɛ akpi nnyɔn (2.000) nan ɔ'a nyan-man manndran le'n, i mmlusuɛ liɛ'n yɛlɛ onin? ?Sran'm be kwlaa be kɔwlɛ'n ti-man kunngba?

⁷ Sran'n i nuan nun aliɛ'n i nyanlɛ'n i ti yɛlɛ junman kekle ng'ɔ di i nyanmiɛn'n bo wa'n. Sanngɛ ninnge ng'ɔ nyan be'n wie fi jɔ-mɛn i klun.

⁸ ?Nguɛ yɛ ngwlɛlɛfuɛ'n nyɛn i tra sinnglinfuɛ nin-ɔn? ?Yɛ nguɛ like yɛ yalɛfuɛ nga i nzuɛn ti kpa'n, ɔ nyɛn i sran'm be nyrun-ɔn?

⁹ Sɛ sran kun nyin yi like ng'ɔ lɛ i'n, ɔ ti kpa tra kɛ i konvi o like wie su sanngɛ ɔ kwla nyɛn-mɛn i'n. Sa sɔ'n tra sran i akunndan'n su, yɛ i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ´ko trɛ i sa.

Ngwlɛlɛ ndɛ mun bɔ be man afɔtuɛ'n

¹⁰ Ninnge nga be o mɛn'n nun'n, b'a tɔn be kwlaa be dunman laa, yɛ e si like nga be flɛ i klɔ sran'n. Klɔ sran'n ɔ nin like nga i wunmiɛn trɛ i liɛ'n be kwla si-man akplowa.

¹¹ Kɛ sran kun ijɔ kpanngban'n, ɔ kan ndɛ ngbɛn ngbɛn mun. ?Mmlusuɛ onin yɛ sran kwla nyɛn i nun-ɔn?

¹² Sran i nguan'n ti kɛ fɔnvɔ wie sa. ?Wan yɛ ɔ si like kpa ng'ɔ wa ju i nguan tika sɔ'n nun-ɔn? ?Nyanmiɛn'n i bo wa'n, wan yɛ ɔ kwla kan sran kun i wie'n i sin sa mun kle i-ɔ?