Akunndanfuɛ'n 5 - NYANMIƐN NDƐ'N 1998

¹ Nán kpli kan ndɛ. Ndɛ nga ɔ waan a ´kan'n, dun mmua bu i wun akunndan nan w'a kan. Afin Nyanmiɛn'n wo nglo lɔ, ɔ kusu a o asiɛ'n su wa. I sɔ'n ti nán ijɔ fiaii .

² Afin kokolɛ ngboko'n yɛ ɔ fa laliɛ kpanngban'n ba-a. I kunngba nin-ɔn, ijɔlɛ kpanngban'n yɛ ɔ fa ndɛ ng'ɔ nin kanlɛ fata-man'n ba-a.

³ Sɛ a se Nyanmiɛn kɛ a ´yo like wie mɛn i'n, nán sisi ɔ́ bo nan w'a yo i sɔ like'n. Afin Nyanmiɛn klo-man sinnglinfuɛ mun yɛlɛ kɛ be yo-man ndɛ nga be kan'n i su sa. Ka ɔ́ ja nun lɛ yo sa nga ɔ waan a ´yo'n.

⁴ Sɛ w'a se-man Nyanmiɛn kɛ a yo like wie mɛn i'n, ɔ ti kpa tra kɛ a se i kɛ a ´yo like wie mɛn i nan w'a yo-man'n.

⁵ Nán kan ndɛ tɛ ng'ɔ ko fa wɔ ko wla sa tɛ nun'n, kɛ ɔ ´yo nan ɔ'a mian-man ɔ́ sa nan w'a se-man Nyanmiɛn nyrun jranfuɛ'n kɛ nán ɔ nyinfu'n ti. Sɛ ɔ'a yo-man sɔ-ɔ, ɔ ijɔlɛ sakasaka sɔ'n ti, Nyanmiɛn ´fa ɔ wun ya kpɛkuun ɔ ´saci ɔ́ sa nun ninnge'm be ngba .

⁶ Sinnglinfuɛ'n i like liɛ ng'ɔ klo i'n yɛlɛ like nga be kwla yo-man'n i akunndan bulɛ nin ndɛ finfin, ɔ nin ndɛ kpanngban'm be kanlɛ. Sanngɛ ɔ liɛ bɔ a ti ngwlɛlɛfuɛ'n, man ɔ nyin yi Nyanmiɛn .

Sran mianmianlɛ

⁷ Sɛ mɛn wie nun a wun kɛ be su kle yalɛfuɛ wie nyrɛnnɛn'n, nan be su di i ndrunmun'n, nan be su di i ndɛ kwlɛ'n, nɛ́n i sɔ sa'n ɔ bo ɔ́ nuan. Afin kɛ mɛn'n wo yɛ'n, kannzɛ bɔ man a nyan nyrun sɛ, ɔ wiengu uflɛ o lɛ b'ɔ tra wɔ-ɔ.

⁸ Asiɛ'n nun like nga be nyɛn i'n ɔ ti sran'm be kwlaa be liɛ. Fie su junman'n yɛ man famiɛn'n ɔ di like-ɔ.

Anyanbeun'n ti like ngbɛn

⁹ Sran ng'ɔ klo sika dan'n, i nyin yi-man ng'ɔ lɛ i'n, sran ng'ɔ klo anyanbeun'n, ɔ nyɛn-mɛn i nun mmlusuɛ'n wie. I sɔ sa'n tra sran i akunndan'n su, yɛ i kwlaa ti afɛ ngbɛn.

¹⁰ Kɛ sran kun ko nyɛn i wun dan'n, be nga be su i su be di i wun ninnge mun'n, be di-man be yalɛ. ?Be nga be lɛ ninnge kaka sɔ mun'n, nguɛ yɛ be nyɛn i nun-ɔn? ?Nán nianlɛ bɔ be ´nian ninnge sɔ'n sa'n yɛ ɔ ti be liɛ nin-ɔn?

¹¹ Junman difuɛ ng'ɔ klo junman dilɛ'n, sɛ ɔ nyannin aliɛ kan dili o, sɛ ɔ nyannin aliɛ dan dili o, ɔ lafi klanman. Sanngɛ anyanbeunfuɛ'n i liɛ'n, i anyanbeun ninnge kpanngban'm be ti ɔ kwla lafi-man.

¹² N wunnin sa kun nyanmiɛn'n bo wa, ɔ ti nyrɛnnɛn sa. Yɛlɛ kɛ sran wie tian sika nuan, sanngɛ ɔ di-man, ɔ fa minndɛ sa yalɛ nga be wa tɔ i su'n.

¹³ Kɛ sanvuɛsa wa tɔ i su'n, kpɛkuun i sɔ anyanbeun liɛ'n kwlaa ɔ'a tu anunman i sa nun. I ti ba yasua ng'ɔ wuli i'n, ɔ nyan-man like fi.

¹⁴ I bɔbɔ kusu, kɛ ɔ fin i nin klun ´ba'n, i sa ngbɛn, kɛ ɔ ´sɛ i sin kɔ'n, ɔ ´fɛ i sa ngbɛn ekun yɛ ɔ ´kɔ-ɔ. Kɛ ɔ ´wu kɔ'n, i junman kekle b'ɔ dili'n, ɔ su nyan-man nun like fi kɔ-man.

¹⁵ I sɔ ng'ɔ o lɛ'n kwlaa ti nyrɛnnɛn sa dan ngboko. Ɔ ´sɛ i sin ´kɔ'n, ɔ ´yo kɛ ɔ fa fin i nin klun lɔ bali'n sa. ?Yɛ kɛ ɔ yo sɔ'n, wuun afɛ junman wla ng'ɔ dili'n, nguɛ mmlusuɛ yɛ ɔ nyɛnnin i nun-ɔn?

¹⁶ Ng'ɔ o su ekun'n, yɛlɛ kɛ i blɛ ng'ɔ dili i nyanmiɛn'n bo wa'n, ɔ dili i aosin, nin sa yalɛ, nin afɛ, ɔ nin klunngbɔ'n nun .

¹⁷ Sa nga n wunnin i sa sɔ'm be kwlaa be nun'n yɛ: like ng'ɔ ti kpa man sran'n, yɛlɛ aliɛ dilɛ, nin nzan nɔnlɛ, ɔ nin i junman kekle ng'ɔ di'n i nuan like nyanlɛ. Blɛ nga Nyanmiɛn mɛnnin i kɛ ɔ di i nyanmiɛn'n bo wa'n, ng'ɔ ti i liɛ'n yɛ ɔ o lɛ-ɔ.

¹⁸ Cɛn wie Nyanmiɛn man sran wie anyanbeun kɛ ɔ di su aklunjuɛ. Sran sɔ'n nyɛn i liɛ junman ng'ɔ di'n i nun. Nyanmiɛn yɛ ɔ man i sɔ nin-ɔn .

¹⁹ Nyanmiɛn man sran sɔ'n i klun'n ɔ jɔ dan, kpɛkuun i wla fi su kɛ i nguan'n ti tika.