Akunndanfuɛ'n 4 - NYANMIƐN NDƐ'N 1998

Mɛn'n nun lufle bulɛ'n ɔ nin sa sukusuku yolɛ'n

¹ Nyrɛnnɛn nga sran'm be kle be wiengu mun nyanmiɛn'n bo wa'n, m buli i akunndan. Be nga be wun nyrɛnnɛn'n, kannzɛ be ´kpan sɛ, be nyan-man sran b'ɔ ´fɔnvɔ be-ɔ. Afin be nga be kle sran'm be nyrɛnnɛn'n yɛ kwlalɛ'n wo bé sa nun-ɔn. Nyrɛnnɛn wunfuɛ'm be nyan-man sran b'ɔ ´fɔnvɔ be-ɔ.

² I sɔ'n ti n liɛ'n, n se kɛ be nga b'a wu'n, be liɛ su ti ye, afin be liɛ'n flunman tra be nga bé nyin tɛ o su'n.

³ Yɛ sran nga be nian wunnzɛ-mɛn i'n, i liɛ'n flunman lele tra be nga be nyin o su nin be nga b'a wu'n. Afin ɔ nian wun-man sa tɛtɛ nga be yo be nyanmiɛn'n bo wa yɛ'n be wie.

⁴ N wunnin ekun kɛ sran'm bé klo kɛ be ´yo kɛ be wiengu'm bé sa, i ti yɛlɛ bé wun ase nga be wla be di junman lɛ'n. Sa sɔ'n tra sran i akunndan'n su, yɛ i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ´ko trɛ i sa.

⁵ Sinnglinfuɛ ng'ɔ bubu i ja tran su'n, ɔ yo i bɔbɔ wun tɛ.

⁶ Sɛ sran kun nyɛn i like liɛ kan nan ndɛ nun-man su'n, ɔ flunman tra kɛ ɔ'a nyan like kpanngban sanngɛ ndɛnngan wo su'n. Afin junman dilɛ nga lɛ'n kwlaa ti afɛ ngbɛn.

⁷ N wunnin sa uflɛ ekun nyanmiɛn'n i bo wa b'ɔ tra sran i akunndan'n su, yɛ i kwlaa ti afɛ ngbɛn.

⁸ Sa sɔ'n yɛlɛ sran kun bɔ i kunngba cɛ yɛ ɔ wo-ɔ, ɔ lɛ-man sran, ɔ lɛ-man ba, ɔ lɛ-man niaan, sanngɛ kɛ ɔ di junman sa'n, ɔ de-man wunmiɛn. Ɔ kunndɛ kɛ ɔ ´nyɛn i wun ´tra su. Ɔ se kɛ: «?Wan li yɛ n di junman wla sɔ'n m mɛn i bɔ i ti yɛ mín wla kwla gua-man ase mlɔnmlɔn nin-ɔn?» I sɔ sa'n ɔ ti sa ya. Sa sɔ'n tra sran i akunndan'n su, yɛ i kwlaa ti afɛ ngbɛn .

⁹ Sɛ sran nnyɔn bé bo yo kun'n, ɔ ti kpa tra sran kunngba bɔ i ngunmin wo'n. Afin kɛ be ti nnyɔn'n, be nyan be junman'n i su mmlusuɛ dan.

¹⁰ Yɛ sɛ kun tɔ-ɔ, i wiengu kun'n mɛn i su. Sran nga i kunngba'n yɛ ɔ wo'n, i yako, afin sɛ ɔ tɔ'n, ɔ su nyan-man sran b'ɔ ´mɛn i su-ɔ.

¹¹ I kunngba'n, blɛ bɔ sran nnyɔn be la likawlɛ'n, ayrɛ kun-man be. ?Sanngɛ sran nga i ba kunngba yɛ ɔ la'n, ɔ ´yo sɛ nan ayrɛ ɔ'a kun-mɛn i?

¹² Sɛ sran kun fa utre wla be sin'n, be nnyɔn'n be kwla jrɛn i nyrun. Nyanman nga be fali nyanman nsan yɛ be fa wɔli'n i nun kpɛlɛ ti kekle.

¹³ Gbanflɛn yalɛfuɛ b'ɔ si ngwlɛlɛ'n, ɔ flunman tra famiɛn bɔ ɔ'a yo kpɛnngbɛn b'ɔ fa-man afɔtuɛ'm be su kun'n.

¹⁴ Kannzɛ i sɔ gbanflɛn liɛ'n fin bisua nun fiteli yɛ ɔ wa yoli famiɛn'n, annzɛ kusu sɛ be ´wu i-ɔ, ɔ ti yalɛfuɛ'n, ɔ flunman.

¹⁵ N wunnin i nyanmiɛn'n bo wa kɛ sɛ gbanflɛn kun sin famiɛn kun osu'n, sran'm be kwlaa be su i su.

¹⁶ Ɔ o sran kpanngban kpa bé ti su. Sanngɛ sran nga be wa ba kasiɛn'n be su klo-mɛn i sa kun. Sa sɔ'n tra sran i akunndan'n su, yɛ i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ´ko trɛ i sa.

Fiaii ijɔlɛ'n i kpa b'ɔ ti-man Nyanmiɛn'n i nyrun'n i ndɛ

¹⁷ Kɛ a ´wlu Nyanmiɛn i sua'n nun lɔ'n, bu i akunndan. Kɔlɛ nga a ´kɔ'n, kɔ ndɛ tilɛ. I sɔ'n ti kpa tra sinnglinfuɛ bɔ be waan be su yi sraka sanngɛ be si-man kɛ be yo sa tɛ'n.