Akunndanfuɛ'n 3 - NYANMIƐN NDƐ'N 1998

Like kwlakwla lɛ i blɛ

¹ Like kwlakwla lɛ i yolɛ blɛ. Nyanmiɛn'n bo wa'n, like kwlakwla lɛ i yolɛ nuan.

² Ɔ lɛ blɛ kun bɔ be fa wu ba-a, yɛ ɔ lɛ blɛ kun bɔ sran fa wu-ɔ. Ɔ lɛ blɛ kun bɔ be fa ta ninnge mun-ɔn, yɛ ɔ lɛ blɛ kun bɔ be fa tu ninnge nga be tali'n be bo-ɔ .

³ Ɔ lɛ blɛ kun bɔ be fa kun sran-an, yɛ ɔ lɛ blɛ kun bɔ be fa sran be sie bɔ be kun-mɛn i-ɔ. Ɔ lɛ blɛ kun bɔ be fa kplan like-ɔ, yɛ ɔ lɛ blɛ kun bɔ be fa bubu like sɔ nin-ɔn.

⁴ Ɔ lɛ blɛ kun bɔ be fa sun-ɔn, yɛ ɔ lɛ blɛ kun bɔ be fa sri-ɔ. Ɔ lɛ blɛ kun bɔ be fa yi ngwlɛ-ɔ, yɛ ɔ lɛ blɛ kun bɔ be fa si able-ɔ.

⁵ Ɔ lɛ blɛ kun bɔ be fa to yɛbuɛ be yi i blo-ɔ, yɛ ɔ lɛ blɛ kun bɔ be fa tiantian yɛbuɛ nuan-an. Ɔ lɛ blɛ kun bɔ be fa tɔ be wiengu nun-ɔn, yɛ ɔ lɛ blɛ kun bɔ be fa titi nun-ɔn .

⁶ Ɔ lɛ blɛ kun bɔ be fa kunndɛ like-ɔ, yɛ ɔ lɛ blɛ kun bɔ be fa saci like bɔ be nyɛnnin nin-ɔn. Ɔ lɛ blɛ kun bɔ be fa yia like su-ɔ, yɛ ɔ lɛ blɛ kun bɔ be fa yi like blo-ɔ.

⁷ Ɔ lɛ blɛ kun bɔ be fa titi be wun ninnge'm be nun-ɔn, yɛ ɔ lɛ blɛ kun bɔ be fa kpa be nun-ɔn. Ɔ lɛ blɛ kun bɔ be fa muan bé nuan-an, yɛ ɔ lɛ blɛ kun bɔ be fa ijɔ-ɔ .

⁸ Ɔ lɛ blɛ kun bɔ be fa klo like-ɔ, yɛ ɔ lɛ blɛ kun bɔ be fa yi be wla like su-ɔ. Ɔ lɛ blɛ kun bɔ be fa kun alɛ-ɔ, yɛ ɔ lɛ blɛ kun bɔ be fa tran diin-ɔn .

⁹ ?Nguɛ mmlusuɛ yɛ sran ng'ɔ di junman'n nyɛn i i afɛ'n nun-ɔn?

¹⁰ M buli junman nga Nyanmiɛn fa mannin klɔ sran'm be kɛ be di'n i akunndan n niannin.

¹¹ Sa kun ng'ɔ o sa'n, sɛ i blɛ ko ju'n, Nyanmiɛn nian su yo i sɛsɛsɛ. Nyanmiɛn bɔbɔ yɛ man e si like ng'ɔ lɛ-man bo bolɛ nin awieliɛ nin-ɔn. Sanngɛ sa nga Nyanmiɛn yo'n, kɛ ɔ fin i bo bolɛ'n nun lele b'ɔ ´fa ju i awieliɛ'n, sran si-mɛn i bo.

¹² Kpɛkuun yɛ n fa wunnin i wlɛ kɛ like ng'ɔ ti kpa man sran'n yɛlɛ aklunjuɛ dilɛ nin mɛn dilɛ blɛ b'ɔ tɛ o mɛn'n nun'n.

¹³ Yɛ n wunnin kɛ blɛ bɔ sran kun di like b'ɔ nɔn nzan'n b'ɔ di i sa ti junman'n i nuan like'n, Nyanmiɛn yɛ ɔ fɛ i sɔ'n mɛn i-ɔ.

¹⁴ N wunnin i wlɛ ekun kɛ Nyanmiɛn i sa ti like liɛ ng'ɔ yo'n, ɔ lɛ-man awieliɛ, ɔ ti anannganman. Be kwla uka-man su, be kwla kpɛ-man su. Sa ti bɔ Nyanmiɛn yo sɔ'n yɛlɛ kɛ ɔ klo kɛ sran'm bé nyin yi i .

¹⁵ Sa nga be ju kɛ e ´se yɛ'n, ɔ nin sa nga be wa ju cɛn wie'n, be wunsu sa'm be juli laa blɛ liɛ'n nun. Nyanmiɛn yo man sa nga be juli laa'n be ju ekun.

Wie'n yɛ ɔ ti like kwlakwla i awieliɛ nin-ɔn

¹⁶ N wunnin i wlɛ nyanmiɛn'n bo wa ekun kɛ kan be di jɔlɛ lɛ'n, klunwi o lɛ, yɛ be di ndɛ kwlɛ lɛ.

¹⁷ N seli min klun lɔ kɛ: «Nyanmiɛn wa di sran kpa nin sran tɛ'm be jɔlɛ. Afin like kwlaa lɛ blɛ. E nyoliɛ'm be ti Nyanmiɛn wa di e jɔlɛ.»

¹⁸ N seli n klun lɔ ekun kɛ Nyanmiɛn man sran'm be bu akunndan, yɛ be wun kɛ be kpa tra-man nnɛn mun.

¹⁹ Afin sran'm be agualiɛ'n nin nnɛn'm be liɛ'n, ngbaciɛ nun-man be afiɛn. Like kunngba nga bɔ man sran de wunmiɛn'n, i kunngba'n yɛ nnɛn'm be kusu be lɛ i-ɔ. I klɔ sran o, i nnɛn o, be kwlaa be wu. Sran'n i kpa tra-man nnɛn'n. Sa'm be kwlaa be tra sran i akunndan'n su. Like nga be yo be'n, i kwlaa ti afɛ ngbɛn.

²⁰ Ndutre yɛ be fa yili like kwlaa-a, yɛ ninnge kwlaa be sa bé sin asiɛ wun, afin ninnge kwlaa be kɔwlɛ'n ti kunngba.

²¹ ?Wan yɛ ɔ kwla se kɛ klɔ sran'n i kla liɛ'n ɔ fu kɔ nglo lɔ nan nnɛn'm be liɛ'n ɔ ka asiɛ wun wa-a?

²² I agualiɛ su'n, n wunnin i kɛ, like ng'ɔ ti kpa man sran'n, yɛlɛ i junman ng'ɔ dili'n i nun ninnge b'ɔ nyɛnnin i'n i wie dilɛ. ?Afin sɛ sran kun i blɛ liɛ'n ko ju'n, wan yɛ ɔ kwla fɛ i ba mɛn'n nun wa ekun bɔ sa nga be yo be i sin wa'n, ɔ ´kwla wun be nun ekun-ɔn?