Akunndanfuɛ'n 2 - NYANMIƐN NDƐ'N 1998

¹ N seli n klun lɔ kɛ like nga be flɛ i aklunjuɛ'n n ´wun i bo nan n ´nian kɛ ɔ fa ti'n. Kpɛkuun n ´wun like kpakpa nga bɔ man sran klun jɔ'n i bo. Sanngɛ n wunnin kɛ sa sɔ'n tra sran i akunndan'n su, yɛ i kwlaa ti afɛ ngbɛn .

² Srilɛ ngboko'n ti sinnzin, be nyan-man aklunjuɛ'n nun like fi.

³ N seli n klun lɔ kɛ n ´fa mín wun n ´wlɛ i nzan nɔnlɛ nun nan n ´yo sinnzin ninnge'm be kwlaa, sanngɛ min waan n ´yo i akunndan su. Min waan n ´yo sɔ nan n ´wun like ng'ɔ nin klɔ sran i yolɛ fata blɛ'n kwlaa'n ng'ɔ ´di i nyanmiɛn'n bo wa'n.

⁴ N dili n klun klo junman dandan mun. N kplannin n klun klo sua mun yɛ n dili n klun klo vinyi fie mun.

⁵ N dili n klun klo waka fie mun, n fali waka fanunfanun nga be su mma'n n fa n tali fie sɔ'm be nun.

⁶ M boli n klun klo nzue bla dandan kpa mun, yɛ n sali be nun nzue'n n fa guaguali min waka nga n tali be'n bé su.

⁷ N toli afanniɛn bla nin kanga yasua mun, kpɛkuun be wuli ba min awlo'n nun be mannin min. N nyannin nannin kpanngban, nin bua kpanngban, ɔ nin boli kpanngban. N nyɛnnin i n trali be kwlaa nga be dun mmua min nyrun Zerizalɛm wa'n.

⁸ Like nga be flɛ i sika ɔkwlɛ nin jɛtɛ ufue'n, n suali wie. N fali famiɛn mun nin mɛn'n su kpɛnngbɛn nga n sie be'n be kwlaa be anwlɛn su ninnge kpakpa'm be wie. N nyannin n klun klo jue tofuɛ bla nin yasua mun. Bla kaka jalɛ b'ɔ ti klɔ sran'm be aklunjuɛ like'n, n jali wie kpa liɛ su.

⁹ N nyannin nyrun dan kpa, min nyrun nga n nyɛnnin i'n yoli dan trali be kwlaa nga be dun mmua trannin min nyrun Zerizalɛm wa'n. Yɛ min ngwlɛlɛ'n i su ɔ'a kpɛ-man le.

¹⁰ Like kwlaa nga n klo kɛ n ´nian'n, n niannin. Like nga be nyan nun aklunjuɛ'n i wafa wie fi ɔ'a san-man mín wun. Min junman kwlaa nga n dili'n, n nyɛnnin i nuan aklunjuɛ. Junman nga n dili'n i nuan like liɛ nga n ko nyɛn i mɛn'n nun'n, yɛ ɔ o lɛ-ɔ.

¹¹ I sin n niannin m bɔbɔ mín sa ti junman nga n dili'n, ɔ nin i su afɛ nga n fa fɛli'n, i kwlaa. N wunnin kɛ sa'm be kwlaa be tra sran i akunndan'n su. Like nga be yo be'n, i kwlaa ti afɛ ngbɛn. Ɔ ti kɛ sran kun waan ɔ fuan aunngban'n nan ɔ ko trɛ i sa. Nyanmiɛn'n bo wa'n, junman kekle kwlaa bɔ sran di'n, mmlusuɛ nun-man wie fi nun .

¹² Kɛ ɔ yoli sɔ'n, nan m'an bu ngwlɛlɛ'n i akunndan m'an gua, nan m'an bu sinnzin'n kusu i akunndan m'an gua. Yɛ n usali mín wun kɛ: «?Famiɛn ng'ɔ wa tran min osu'n, nzu yɛ ɔ ´yo bɔ m'an yo-man-an?»

¹³ N wunnin kɛ ngwlɛlɛ silɛ'n ti kpa tra sinnzin yolɛ'n, kɛ lika ng'ɔ kpaja ti kpa tra aosin'n sa.

¹⁴ Ngwlɛlɛfuɛ'n ɔ wun ase yɛ sinnglinfuɛ'n nanti i liɛ ble'n nun. Sanngɛ n si kɛ awieliɛ kunngba'n yɛ ɔ wa wie be nnyɔn nin-ɔn.

¹⁵ Yɛ n seli n klun kɛ: «?Sɛ awieliɛ kunngba ng'ɔ ´wie sinnglinfuɛ'n yɛ ɔ ´wie min wie'n, wuun min ngwlɛlɛ dan nga n si trɛli i'n ɔ yo nzu yɛ ɔ man min-ɔn?» Yɛ n seli min klun lɔ kɛ: «Sa sɔ'n tra sran i akunndan'n su, yɛ i kwlaa ti afɛ ngbɛn.»

¹⁶ I ngwlɛlɛfuɛ o, i sinnglinfuɛ o, be kwlaa be wu, yɛ kɛ ɔ ´cɛ kɔ'n, sran'm be wla fi be su.

¹⁷ Kɛ n wunnin i sɔ'n, mín nyin tuli nguan'n nun tranlɛ'n su. Afin n wunnin i kɛ like nga sran'm be yo be nyanmiɛn'n bo wa'n, i kwlaa'n ti tɛtɛ ngunmin. N wunnin kɛ sa'm be kwlaa be tra sran i akunndan'n su. Like nga be yo be'n, i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ´ko trɛ i sa.

¹⁸ Nyanmiɛn'n bo wa'n, afɛ kwlaa nga n fɛli'n, ɔ nin junman nga n dili'n, mín nyin tuli i kwlaa su. Afin cɛn kun i kwlaa sɔ'n ɔ ´ka sran ng'ɔ ´tran n ja nun'n i sa nun.

¹⁹ ?Sɛ sran sɔ'n ɔ wa yo ngwlɛlɛfuɛ o, sɛ kusu ɔ wa yo sinnglinfuɛ o, wan yɛ ɔ kwla wun i wlɛ-ɔ? Sanngɛ like nga n fali min ngwlɛlɛ n nyɛnnin i mín sa ti junman'm be dilɛ nun'n, i kwlaa sɔ'n, ɔ wa fa yo i liɛ. Sa sɔ'n tra sran i akunndan'n su, yɛ i kwlaa ti afɛ ngbɛn.

²⁰ Ɔ man kɛ n nian junman nga n kplinnin min nyin n dili'n, ɔ yo min ya lele kpe nun.

²¹ Afin sran kun fa ngwlɛlɛ nin akpue fa di junman, yɛ i sa nun ninnge'm be kwlaa be yo ye, kpɛkuun ɔ'a yaci i ngba ɔ'a ɔ. I kwlaa sɔ'n ɔ ka sran uflɛ sa nun. I kwlaa nga ti anwlɛn su fitalɛ like. Sa sɔ'n tra sran i akunndan'n su, yɛ i kwlaa ti afɛ ngbɛn.

²² ?Nguɛ mmlusuɛ yɛ sran kun kwla nyɛn i nyin kplinlɛ b'ɔ kplin'n nin junman kekle b'ɔ di i nyanmiɛn'n bo wa nun-ɔn?

²³ Mɛn'n nun tranlɛ b'ɔ trannin'n i kwlaa'n ti nyrɛnnɛn ngbɛn. I junman b'ɔ dili'n, klunngbɔ yɛ ɔ nyɛnnin i nun-ɔn. Kɔnguɛ bɔbɔ sa'n, i wla kwla gua-man ase. Sa sɔ'n tra sran i akunndan'n su, yɛ i kwlaa ti afɛ ngbɛn .

²⁴ Like ng'ɔ ti kpa man sran'n, yɛlɛ aliɛ dilɛ nin nzan nɔnlɛ, ɔ nin junman bɔ be di'n i nuan like nyanlɛ. N wunnin kɛ like kpa sɔ'n kusu Nyanmiɛn yɛ ɔ man-an.

²⁵ Afin sɛ Nyanmiɛn ɔ'a man-man sran kun aliɛ'n, ɔ kwla nyɛn-mɛn i di-man, sɛ ɔ'a mɛn-mɛn i aklunjuɛ'n, ɔ kwla nyɛn-mɛn i.

²⁶ Afin Nyanmiɛn man sran nga i klun jɔ i wun'n i ngwlɛlɛ nin sa silɛ, ɔ nin aklunjuɛ. Ɔ yo man sran nga i klun jɔ-mɛn i wun'n, ɔ sua i bo ninnge mun fa man sran nga i klun jɔ i wun'n. N wunnin kɛ sa sɔ'n tra sran i akunndan'n su, yɛ i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ´ko trɛ i sa.