Akunndanfuɛ'n 12 - NYANMIƐN NDƐ'N 1998

¹ Blɛ bɔ a tɛ yo gbanflɛn'n, man ɔ́ wla kpɛn ɔ yifuɛ'n i su kwlaa nan nyrɛnnɛn blɛ'n ɔ'a ju. Man ɔ wla kpɛn i su nan w'a yo kpɛnngbɛn, afin ɔ kpɛnngbɛn blɛ sɔ'n nun'n, ɔ nyin wa tu nguan'n su .

² Blɛ sɔ nun'n, wia'n nin lika b'ɔ kpaja, nin anglo'n, nin nzraama'm be ´yaci kpajalɛ, kpɛkuun kɛ nzue'n ko tɔ b'ɔ ko kpɛ'n, ɔ ´mlan ekun.

³ Be sa'm bɔ be ti kɛ sua'n i sasafuɛ'm be sa'n be ´usu. Be ja'm bɔ be ti kɛ yasua waka-waka wie mun sa'n, be ´glɔglɔ. Be je bɔ be ti kɛ bla nga be si like sa'n, be ´jran. Be nyinma'n bɔ be ti kɛ be nga be nian fenɛtri nun sa'n, be su wun-man ase kpa kun.

⁴ Be su bɔ be ti kɛ sua'n i anuan'n i bue nnyɔn'm be sa'n, be ´tannin. Kpokpo'm be tɛlɛ'n ɔ ´kan ase, anunman'm bɔ kɛ be ko kpan cɛ'n, wuun be su jaso'n, be su kpan-man kun yɛ talua nga be to jue'n be lɛ-man wunmiɛn kun.

⁵ Blɛ sɔ'n nun'n be ´sro kpɔlɛ kaan sa'n i su fulɛ, kɛ be ´nanti'n srɛ ´kun be. Bé ti'n ɔ ´fɛn fuaii kɛ amandie i nyrɛ'n sa. Be ´nanti sa yɛklɛyɛklɛ kɛ lalo'n bɔ kpɛnngbɛn'n ɔ'a ti i'n sa. Afin kɛ blɛ sɔ'n ko ju'n, wuun sran kwlaa su kɔ i tranwlɛ b'ɔ ti anannganman'n i nun lɔ. Yɛ ngwlɛ yifuɛ'm be wlan-wlan atin'n nun be sin .

⁶ Kɛ ɔ ko yo sɔ'n, nguan nyanman b'ɔ ti kɛ jɛtɛ ufue nyanman sa'n i nun ´kpɛ. Kannin sɛ nga be fali sika ɔkwlɛ yɛ be fa yoli'n, ɔ ´bo, nyanman nga be fa cuɛn nzue'n i nun ´kpɛ, so nga be fa sa nzue'n, ɔ ´bo.

⁷ Kɛ ɔ ko yo sɔ'n, wuun sran i wunnɛn'n ɔ su sɛ i sin ndutre bɔ be fa yili i'n i nun, yɛ nguan ng'ɔ o i nun'n kusu ɔ sɛ i sin kɔ Nyanmiɛn b'ɔ fa mɛnnin i'n i wun lɔ.

⁸ Akunndanfuɛ'n i waan: «Sa'm be kwlaa be tra sran i akunndan'n su. Be trɛ i kpɛn sakpa. Like nga be yo be'n, i kwlaa ti afɛ ngbɛn.»

Ndɛ'n i atabo'n

⁹ Ng'ɔ o su ekun'n yɛlɛ kɛ akunndanfuɛ'n ɔ kleli nvle'n nunfuɛ'm be ninnge silɛ. Ɔ sieli i su ndɛ'm bé bo, ɔ siesieli nyanndra kpanngban kpa.

¹⁰ Akunndanfuɛ'n ɔ niannin nun kpa kunndɛli fɔnvɔlɛ ndɛ kpakpa mun. Ndɛ ng'ɔ klɛli be'n kusu, kɛ sa'n fa ti'n yɛ ɔ niannin su klɛli-ɔ.

¹¹ Ngwlɛlɛfuɛ'm be ndɛ'm be ti kɛ like ti piembie nga be fa kankan nnɛn mun'n sa. Nyanndra'm be ti kɛ kpɛngbɛ bɔ b'a fa bobo like wie nun kpa'n sa. Be kwlaa be fin Nyanmiɛn .

¹² Mín wa, nian ɔ́ wun kpa nán kpɛ wie gua su. Sɛ be waan be klɛ mɛn'n nun ndɛ'm bé wun fluwa kpanngban kpa bɔbɔ-ɔ, be su wie-man be klɛ le. Yɛ kusu like suanlɛ ngboko'n, ɔ man be wunnɛn'n i afɛ.

¹³ E `sie é su e tie ndɛ'n kwlaa ng'ɔ o lɛ'm be atabo'n: man ɔ́ nyin yi Nyanmiɛn, yɛ nanti i mmla'm be su. Like ng'ɔ fata kɛ klɔ sran kwlakwla yo'n yɛ ɔ o lɛ-ɔ.

¹⁴ Afin Nyanmiɛn wa usa é like nga e yoli'n i kwlaa i su ndɛ. Sa kwlaa ng'ɔ ti fiawa o, ng'ɔ ti kpa o, ng'ɔ ti tɛ o, ɔ ´di be jɔlɛ .