Akunndanfuɛ'n 11 - NYANMIƐN NDƐ'N 1998

Klun-ufue nin junman dilɛ'n be su ndɛ

¹ Fa ɔ kpaun'n to yi i nzue'n i nyin su, afin cɛn wie lele a ´nyɛn i ekun .

² Fa wie cɛ sran kpanngban, afin a si-man nyrɛnnɛn ng'ɔ wa tɔ ɔ́ su nyanmiɛn'n bo wa cɛn wie-ɔ.

³ Kɛ nzue'n ko mlan'n, wuun ɔ su tɔ asiɛ'n su. Sɛ waka kun tɔli mɛn'n i ngua lɔ annzɛ nglo lɔ'n, kan ɔ tɔli lɛ'n, ɔ kɛ i osu'n nun lɛ.

⁴ Sɛ sran kun waan ɔ ´nian aunngban'n i fitalɛ'n ti'n, ɔ su lua-man like. Sɛ sran kun waan ɔ ´nian nzue'n i mlanlɛ'n ti'n, ɔ su kpɛ-mɛn i fie'n su ble'n.

⁵ Kɛ bɔ a si-man wafa nga aunngban'n fa fita'n, nin wafa nga ba kan kun ɔ fa trɛn i nin klun lɔ'n b'ɔ nyin'n, i kunngba nin-ɔn, a si-man wafa nga Nyanmiɛn b'ɔ yo sa kwlaa'n ɔ fa di i junman'n.

⁶ I sɔ'n ti'n, lua ɔ ninnge mun nglɛmun nun lele fa ju nnɔsua nun, nán de wunmiɛn. Afin a si-man ng'ɔ wa yo kpa-a, sɛ nglɛmun nun liɛ'n nin o, sɛ nnɔsua nun liɛ'n nin o, sɛ kusu nglɛmun nun liɛ'n nin nnɔsua nun liɛ'm be nnyɔn yɛ be ´yo kpa o.

⁷ Lika weiin'n ɔ ti like kpa. Wia'n kusu yo nyɛnmɛn.

⁸ Sɛ sran kun cɛ nyanmiɛn'n bo wa lele nan ɔ di afuɛ kpanngban kpa bɔbɔ'n, ɔ fata kɛ i klun jɔ i sɔ'n ti, sanngɛ kusu nán man i wla fi kɛ aosin tuun'n i blɛ'n ɔ wa yo tɛnndɛn. Sa'm be kwlaa be tra sran i akunndan'n su. Like nga be yo be'n, i kwlaa ti afɛ ngbɛn.

Gbanflɛn yolɛ nin oke yolɛ'n be su ndɛ

⁹ Gbanflɛn kan, yo like nga b'ɔ man sran klun jɔ sakpa'n. Kɛ a tɛ yo gbanflɛn kan'n, man ɔ klun jɔ kpa. Like nga wɔ anwlɛn'n wo su'n, yo i sɔ like'n. Like nga wɔ akunndan'n wo su'n, yo. Sanngɛ ng'ɔ fata kɛ a si'n yɛlɛ kɛ ɔ́ sa kwlaa nga a yoli'n be ti, Nyanmiɛn ɔ wa flɛ wɔ ɔ ´di wɔ jɔlɛ.

¹⁰ Man klunngbɔ'n tu ɔ klun, nán yo sa nga ɔ ´fa nyrɛnnɛn yi ɔ wunnɛn su'n. Afin gbanflɛn nzue'n nin wunmiɛn'n be sin ndɛndɛ .