Akunndanfuɛ'n 10 - NYANMIƐN NDƐ'N 1998

¹ Kɛ ngɔnsiɛn'n fa tɔ parfɛn yofuɛ'n i ngo'n nun bɔ parfɛn sɔ'n ɔ kplɔ b'ɔ saci i'n, i kunngba nin-ɔn, sinnzin kaan sa kwla saci sran ngwlɛlɛfuɛ'n i ngwlɛlɛ'n kpɛkuun ngwlɛlɛfuɛ sɔ'n i wun sa saci.

² Ngwlɛlɛfuɛ'n i anwlɛn ba'n ɔ fɛ i kɔ fama su, sinnglinfuɛ'n i anwlɛn ba'n kusu ɔ fɛ i kɔ bɛ su .

³ Sinnglinfuɛ'n i nantilɛ ng'ɔ fa nanti atin'n su'n yɛ be fa wun kɛ ɔ si-man ngwlɛlɛ-ɔ. Kɛ ɔ ´nanti'n, sran'm be kwlaa be wun kɛ sinnglinfuɛ yɛ ɔ ´kɔ lɛ-ɔ.

⁴ Sɛ sran ng'ɔ sie wɔ'n fa ya ɔ́ wun'n, nán jaso ɔ junman'n su, afin diin tranlɛ'n yo man sa tɛ kpanngban kpa to fuan sran.

⁵ Sa tɛ kun wo lɛ bɔ n wunnin i nyanmiɛn'n bo wa, yɛlɛ sran nga be sie mɛn'n bɔ sa tɛ'n fu be nun kpɛkuun b'a yo'n.

⁶ Sran nga be ti-man sran ndɛnmansu'n be nyan sa su dan, sanngɛ sran nanndoliɛfuɛ'm be liɛ'n, junman nga be lɛ-man nyrun'n yɛ be di i lele be fa wu-ɔ.

⁷ N wunnin kanga wie mun bɔ be fu nnɛn kpanngɔ su, kpɛkuun diewa wie'm be kusu be nanti bé ja nun kɛ kanga sa.

⁸ Sran ng'ɔ fu kunman'n, i bɔbɔ kwla tɔ nun. Sran ng'ɔ bubu awa'n, wuo kwla kɛ i.

⁹ Sran ng'ɔ yi yɛbuɛ'n, yɛbuɛ kwla yo i like. Sran ng'ɔ kpaci yie'n, like kwla yo i.

¹⁰ Sran nga ɔ'a si-man i kpɛliɛ ba'n, ɔ ´fa fanngan dan nan ɔ'a kwla fa di junman. Sɛ be fa ngwlɛlɛ'n yo like'n, ɔ fite muae su.

¹¹ ?Ɔ waan a si wuo nun ngowa kan, sanngɛ kpɛkuun ɔ'a dun mmua ɔ'a ka wɔ, kɛ ɔ o lɛ'n be kwla yi wɔ ayɛ ekun?

Ijɔlɛ ngboko'n i kpa b'ɔ ti-man'n i su ndɛ

¹² Akunndanfuɛ'n i nuan nun ndɛ'n yo man sran'm bé nyin yi i. Sanngɛ sinnglinfuɛ'n i nuan ndɛ'n mlin i bɔbɔ.

¹³ Kɛ sinnglinfuɛ'n ɔ ´kɛn i ndɛ wie'n, ɔ bo i bo nin ndɛ ngbɛn-ngbɛn mun. Kɛ ɔ ´gua'n, ɔ guɛ i bo nin fia ndɛ mun.

¹⁴ Sinnglinfuɛ'n ɔ ijɔ fiaii. Sran'n b'ɔ o sa'n, ɔ si-man sa ng'ɔ wa ju cɛn wie'n. ?Wan yɛ ɔ ´bo sa ng'ɔ wa ju'n i su'n i su kle i-ɔ?

¹⁵ Sinnglinfuɛ'n i junman'n ɔ mɛn i afɛ ngbɛn, yɛlɛ kɛ ɔ si-man be klɔ dan'n i su atin nan ɔ'a ɔ lɔ.

¹⁶ Mɛn nga i su famiɛn'n ɔ ti mantuan kan'n, i sɔ mɛn liɛ'n wo afɛ nun, afin famiɛn i awlo lɔ sran dandan sɔ mun'n, aliɛ ndɛ fuɛ'n yɛ ɔ ti be cinnjin-ɔn.

¹⁷ Mɛn nga bɔ i su famiɛn'n ɔ ti wlengbi ba'n, bɔ famiɛn i awlo lɔ sran dandan'm be ti-man aliɛ safuɛ nin nzanboɛfuɛ'n, mɛn sɔ'n i liɛ su ti ye. Be liɛ'n, like nga be ko di nan b'a nyan wunmiɛn'n yɛ be di-ɔ.

¹⁸ Sran ng'ɔ bubu i ja tran su'n, i sua'n su tu. Sran ng'ɔ ti fuɛnfuɛ'n, i sua'n gua.

¹⁹ Sran'm be tɔn like kaka be fa di cɛn su, kɛ be ´nɔn nzan'n, bé wun kpaja be. Sika'n kusu yɛ be fa yo be wun sa'n kwlakwla-a.

²⁰ Nán kan famiɛn'n i wun ndɛ tɛ, nán bu i wun akunndan tɛ mlɔnmlɔn. Kɛ a o ɔ sua ba'n nun lɔ'n, nán kan anyanbeunfuɛ'n i wun ndɛ tɛ. Afin anunman ng'ɔ tu sin'n, ɔ kwla ko kan ɔ ndɛ nga a kannin'n, yɛ ndɛ sɔ'n ɔ ´tru .