Akunndanfuɛ'n 1 - NYANMIƐN NDƐ'N 1998

Nguan nun tranlɛ'n ɔ ti like ngbɛn

¹ David i wa akunndanfuɛ b'ɔ ti Zerizalɛm famiɛn'n i nuan su ndɛ'n yɛ ɔ o yɛ.

² Akunndanfuɛ'n i waan: «Sa'm be kwlaa be tra sran i akunndan'n su. Be trɛ i kpɛn sakpa. Like nga be yo be'n, i kwlaa ti afɛ ngbɛn .»

³ ?Nguɛ mmlusuɛ yɛ sran kun kwla nyɛn i junman kekle b'ɔ di i nyanmiɛn'n bo wa'n i nun-ɔn?

⁴ Kɛ sran'm be ´wu be kɔ'n, wuun uflɛ'm be kaci be, kɛ ɔ ´yo sɔ tititi-ɔ. Sanngɛ asiɛ'n wo i osu'n nun titi.

⁵ Wia'n tu i bo, kpɛkuun ɔ ko tɔ. I sin ɔ kpli ɔ sɛ i sin kan ɔ tuli i bo lɔ'n.

⁶ Aunngban'n fita kɔ mɛn'n i ngua lɔ, ɔ fita kɔ nglo lɔ. Ɔ fita, ɔ fita, kpɛkuun ɔ kpɛ i wun, ɔ wa sin i osu kunngba'n nun ekun .

⁷ Nzue ba'm be kwlaa be sonji sa luuu be ko gua jenvie'n nun, sanngɛ a nian ti-mɛn i kɛ jenvie'n ɔ'a yi le. Kɛ nzue ba'm be jin sonjilɛ'n su sa'n yɛ be jin-ɔn. Lika kunngba'n nun yɛ be sonji gua-a.

⁸ Kannzɛ be ´ijɔ lele sɛ, sanngɛ nán ndɛ i kwlaa yɛ be ´wie i kan-an. Be nyinma'n ɔ fɛ-man ninnge'm be nianlɛ'n nun. Be su'n kusu ɔ fɛ-man sa tilɛ'n nun.

⁹ Sa ng'ɔ yoli laa'n i yɛ ɔ wa yo ekun-ɔn. Like nga be juli laa'n, be yɛ be wa ju ekun-ɔn. Nyanmiɛn i bo wa ninnge nga be yo be'n, be wun-man like fi bɔ be kwla se kɛ ɔ ti uflɛ-uflɛ-ɔ.

¹⁰ Be kwla wun like kun bɔ be ´se kɛ: «Nian like nga, ɔ ti uflɛ-uflɛ.» Sanngɛ i sɔ like liɛ'n i wunsu ɔ'a yo laa blɛ liɛ'n nun le kwlaa nan b'a wu ye.

¹¹ E wla fi sa nga be juli e nannan'm be blɛ su'n be su. Sran nga be wa ba é sin'n, be sinfuɛ liɛ'm be su wun-man be osu.

Akunndanfuɛ'n ɔ'a wun wie

¹² M bɔbɔ min akunndanfuɛ, n yoli Izraɛl famiɛn, n trannin Zerizalɛm lɔ.

¹³ M buli like nga be ju mɛn'n nun'n be kwlaa be akunndan nan n ´si bé bo. I sɔ yolɛ'n ɔ ti junman kekleke kun yɛ Nyanmiɛn fa mannin sran'm be kɛ be di-ɔ.

¹⁴ N niannin junman nga be di be nyanmiɛn'n bo wa'n be kwlaa, n wunnin kɛ sa'm be kwlaa be tra sran i akunndan'n su. Like nga be yo be'n, i kwlaa ti afɛ ngbɛn. Ɔ ti kɛ sran kun waan ɔ ´fuan aunngban'n nan ɔ ko trɛ i sa.

¹⁵ Afin like bɔ ɔ'a bli'n, be kwla tinngɛ-mɛn i kun, yɛ like ng'ɔ nun-man lɛ'n, be kwla ka-man.

¹⁶ N seli n klun lɔ kɛ ngwlɛlɛ nga n ko si i'n, m'an si i. N seli kɛ be nga be dunnin mmua trannin famiɛn Zerizalɛm wa nan m'an yo famiɛn'n, min ngwlɛlɛ'n ɔ'a tra be kwlaa be liɛ'n. M'an wun wie, yɛ m'an si mɛn'n nun sa kpanngban kpa.

¹⁷ N kunndɛli ngwlɛlɛ nin sinnzin'n be afiɛn ngbaciɛ'n. Ɔ ti kɛ sran kun waan ɔ ´fuan aunngban'n nan ɔ ko trɛ i sa.

¹⁸ Afin ɔ sran nga a ti akunndanfuɛ dan'n, wɔ awlaboɛ'n yo dan, yɛ ɔ sran nga ɔ́ silɛ'n cɛnnin'n, ɔ́ nyrun yɛ a wun i-ɔ.