Abdias 1 - NYANMIƐN NDƐ'N 1998

¹ Edɔm mɛn'n i wun ndɛ nga bɔ Anannganman Nyanmiɛn yili nglo kleli Abdias bɔ i waan ɔ kan'n yɛ ɔ o yɛ: Anannganman sunmannin sran kun kɛ ɔ ko kan ndɛ kle mɛn uflɛ wie mun. Kɛ ɔ ´bo jasin nga Anannganman fa wlɛli i nuan'n e tili, i waan: «Amun `jaso man e nin Edɔm e `ko kun alɛ .»

Anannganman'n kannin Edɔm i nunnunlɛ ndɛ

² Anannganman'n kan ndɛ kleli Edɔm. Ɔ seli kɛ: «N ´yo wɔ kaan nvle-nvle'm be nun. Mɛn wunmuan'n su bu-man wɔ like fi kun .

³ Ɔ wun tulɛ dan'n ti w'a mlin yɛ a o lɛ-ɔ. A o yɛbuɛ-yɛbuɛ'm be afiɛn lɔ, ɔ klɔ'n wo nglo lɔ fleiin'n, i ti a se ɔ wun kɛ yoo: ‹?Kɛ wan sa cɛ yɛ ɔ kwla tu mín bo wa-a?›

⁴ Kannzɛ i li man a tu sin nglo mmua kɛ anunman nyin sa'n, man a ko yo ɔ́ sua'n nzraama'm be afiɛn lɔ'n, sanngɛ san n ´ti wɔ n ´yi wɔ ase. Min Anannganman yɛ n kɛn i sɔ n kle wɔ-ɔ.

⁵ Sɛ awiefuɛ mun, wie kusu-ɔ sɛ be nga be fɛn sran'm bé wun ninnge'n be wa fu wɔ nun kɔnguɛ'n, ninnge nga be kwla fa kɔ'n yɛ be ´fa-a. Kɛ be ko fɛ i sɔ'n, wuun b'a di wɔ yalɛ mlɔnmlɔnmlɔn. Nzan yifuɛ'm be kusu, sɛ be kɔ ɔ vinyi fie nun'n, san vinyi mma kpatrɛ wie mun sa yɛ be ´yaci be lɛ-ɔ.

⁶ Be `nian kɛ b'a trutru Ezau i osu nun mma'm bé bo ninnge'm be nun sa! Amun ninnge kpakpa nga amun fa fiali'n, b'a wun be ngba.

⁷ Be nga amun nin bé bo ti kun laa bɔ amun kun alɛ'n, b'a kankan amún bo mɛn'n nun b'a fite. Amun janvuɛ'm b'a laka amun b'a kwla amun. Be nga amun nin be wla asa'n, b'a sua amún wun aya. Kpɛkuun nga be kɛn i siɛn'n yɛlɛ kɛ: ‹Nga'm be wun-man sa wlɛ kun.›

⁸ Min Anannganman n wan yoo: Nanwlɛ, cɛn nga min ya'n ɔ ´kpɛn ase'n, n ´nunnun Edɔm mɛn'n nun ngwlɛlɛfuɛ mun. N su yaci-man ngwlɛlɛfuɛ ba kun sa Ezau oka'm be su lɔ.» Anannganman'n yɛ ɔ kan sɔ-ɔ.

⁹ Anannganman kan ndɛ kleli Teman klɔ'n. Ɔ seli kɛ: «Ɔ sonja'm be su wun-man sa fi yowlɛ. Ezau mɛn'n nun sonja'm be kwlaa be ´wie wu, be nun kun sa su ka-man lɛ.»

Izraɛlfuɛ'm be nyrɛnnɛn bɔ be wunnin i'n ɔ yoli Edɔmfuɛ'm be fɛ

¹⁰ «Kɛ bɔ yɛ amun fɛnnin amun niaan Zakɔb i anunman'm bé bo ninnge'n, bɔ amun yoli be tɛtɛ'n, i ti amun kusu nyannzuɛn ´kun amun lele san amun ´wie nunnun weiin.

¹¹ Le kun nga bɔ Izraɛl i kpɔfuɛ'm be sonja'm be ´yo kɛ be kun-man alɛ kun sa bɔ be ´wlu klɔ'n nun, bɔ i sɔ aofuɛ liɛ'm be ´tu Izraɛlfuɛ'm be ninnge kpakpa'm be wun fɔtɔ be ´fa'n, wuun amun o lɛ. I sɔ like liɛ nga be ´yo'n, amun nin be yɛ be yoli-ɔ .

¹² ?Edɔmfuɛ mun, i nun bɔ amun niaan Zidafuɛ'm be ´wun be nyrun'n, ɔ fata kɛ amun ko jran nian be nan amun sri be? ?Edɔmfuɛ mun, kɛ Zidafuɛ'm be mɛn'n boli'n bɔ i nyin utuli ase'n, ɔ fata kɛ amun ko jran be sri? ?Kɛ be o awlaboɛ nun'n, ɔ fata kɛ amun jran kpɛ be nzowa?

¹³ ?I nun bɔ be kle min nvlefuɛ'm be nyrɛnnɛn'n, ɔ fata kɛ amun wlu be klɔ'n nun? ?Be nunnunlɛ nun'n, ɔ fata kɛ amun jran nian be nan amun sri be nan be ´fɛn be ninnge kpakpa mun-ɔn amun fɛn wie?

¹⁴ ?Ɔ fata kɛ be nga be ´wanndi'n, amun ko sa anngɔnda'm be su kun be? ?I sɔ nyrɛnnɛn blɛ liɛ'n be nga be fin nun fiteli'n, ɔ fata kɛ amun tra be fa man be kpɔfuɛ mun?

¹⁵ Anannganman'n i nvle'm be kwlaa bé jɔlɛ dilɛ cɛn'n ɔ'a mantan koko. Cɛn sɔ'n nun'n, sa kunngba nga amun fa yoli amun wiengu mun'n yɛ be ´fa yo amun-ɔn. Tɛ nga amun yoli'n, ɔ ´kaci tɔ amun bɔbɔ amun su .»

Izraɛl ɔ ´tu i klunngbɔ Edɔm su

¹⁶ «Izraɛlfuɛ mun, amun liɛ m'an dun mmua m'an kle amun nun min oka liɛ klonglo'n su lɔ. Nvle uflɛ'm be kusu n wa kle be nun tɛtɛ kpa, kpɛkuun be ´nunnun treketreke .

¹⁷ Kɛ ɔ yo sɔ'n, Siɔn oka'n ɔ wa sɛ i sin ɔ ´yo min liɛ klonglo. Be nga be nyannin bé ti'n be wa fia oka sɔ'n su lɔ. Zakɔb i osu nun ba'm be wa de be mɛn'n be nga be fali'n bé sa nun .

¹⁸ Ezau osu nun ba'm be ´yo kɛ ijre kee sa, Zakɔb nin Zozɛf be osu'n nun ba'm be kusu be ´yo kɛ sin nin i taaman sa yɛ be ´yra Ezau i osu nin-ɔn. Be ´nunnun be mlɔnmlɔn, be nun kun sa su tran-man nguan nun.» Afin Anannganman'n yɛ ɔ'a kan kle amun-ɔn .

Izraɛlfuɛ'm be ´fa be wun koko lɛ asiɛ mun

¹⁹ Zidafuɛ'm be ´fa Edɔm mɛn'n i ngua ngua lɔ'n, be ´fa lika kpɛtɛkplɛɛ'n b'ɔ ti Filistifuɛ'm be nvle'n, yɛ be ´fa Samari b'ɔ ti Efraimfuɛ'm be asiɛ'n. Bɛnzamɛnfuɛ'm be ´fa Galaad mɛn'n .

²⁰ Izraɛlfuɛ nga be o mɛn'n i nglo lɔ bɔ be trali be lomuɛn'n, bɔ be ti sonja kekle'n, be ´fa Kanaanfuɛ'm be lika'n lele ´ju Sarɛpta. Zerizalɛmfuɛ nga be trali be ɔli Sɛfarad'n be ´fa ngua lɔ klɔ mun.

²¹ Defuɛ sɔ'm be ´fu Siɔn oka'n su lɔ be ´tran, yɛ be ´sie Edɔm mɛn nin-ɔn. Yɛ sielɛ'n ɔ ´yo Anannganman liɛ. Anannganman'n ´yo famiɛn, i yɛ ɔ ´tran famiɛn bia'n su-ɔ .