Abakik 1 - NYANMIƐN NDƐ'N 1998

¹ Sa nga Anannganman'n yili i nglo kleli Abakik b'ɔ ti i nuan ijɔfuɛ yɛ ɔ o yɛ:

?Anannganman, cɛn onin ko?

² ?Anannganman, nan flɛlɛ nga m'an flɛ wɔ lele kɛ a wa de ye'n, a su tɛ-man min su le? ?Sa tɛtɛ nga be yo bɔ n kpan n kan n kle wɔ'n, cɛn onin ko yɛ a ´de ye be nun-ɔn?

³ ?Nguɛ ti yɛ a yo man n wun sa tɛ nga mun-ɔn? ?Nguɛ ti yɛ i sɔ sa nyrɛnnɛn-nyrɛnnɛn liɛ mun a tran lɛ nian be sɔ-ɔ? Mianmianlɛ nin sa kekleekle'n sin yia min pɛ! Lika'n kwlaa, jɔlɛ dilɛ nin ndɛ kpɛlɛ'n yɛ ɔ o nun-ɔn.

⁴ Sran'm be bu-man mmla'n i like fi kun, be di-man ndɛ nanwlɛ kun. Klunwifuɛ'n ɔ tɔ nanwlɛfuɛ'n su. Ɔ man ɔ jɔlɛ nga sran'm be di'n, wie fi ti-man su.

Anannganman yili sa nglo kleli Abakik

⁵ Anannganman waan: «An `nian mɛn'm be nun kpa. Man amun nuan bo amun wun yɛ man srɛ kun amun dan kpa. Afin amun blɛ su yɛ'n, sran kun su wa yo sa kun bɔ sɛ sran wie yɛ ɔ kɛn i wun ndɛ kle amun'n, amun su ko fa-man su le .

⁶ Babilɔnifuɛ bɔ be si-man aunnvuɛ'n, bɔ be ti aeliɛ tɛfuɛ'n, bɔ be su wa wlu mɛn'm be nun asiɛ wunmuan su'n, m'an fa be, be o balɛ. Be ´ba be wiengu'm be lika'm bé sa nun delɛ .

⁷ Be yo sro tɛ kpa, be tu-man bé wun ngowa, be lɛ be tiaun mmla yɛ be nanti su-ɔ.

⁸ Be nnɛn kpanngɔ'm be kwla wanndi be tra kangale. Be wun yo mmlɛ tra blo alua'm bɔ be di kɔnguɛ koniɛn'n. Kɛ be nnɛn kpanngɔ fufuɛ'm be fin mmua lɔ be ´ba'n, be tu sa bɛiin, kpɛkuun be jra lɔ kli! Be nnɛn kpanngɔ'm be fin mmua lɔ be tu kɛ anunman nyin b'ɔ su fuan i nnɛn'n sa.

⁹ Like fɛnlɛ ti yɛ be kwlaa'n be ba-a. Be ´ba'n, be nian-man bɛ nin fama, be nyrun ndɛnman su yɛ bé nyin ta-a. Be nga be tra be lomuɛn'n, be tian bé nuan zɔ kɛ aunnyan sa, be si-man bé nuan.

¹⁰ Be bu-man famiɛn'm be like fi. Be to siefuɛ'm be mma. Klɔ nga be si bé wun'n, be fata-man be like fi. A ´nian-an, b'a gua fa, b'a fu su b'a fa klɔ sɔ mun.

¹¹ Kpɛkuun be sin kɛ aunngban dan kun b'ɔ su sin'n sa. Be sin kɔ lika uflɛ be ko yo sa tɛ ekun, yɛlɛ kɛ be like liɛ bɔ be lafi su'n yɛlɛ be wunmiɛn'n.»

Abakik flɛli Nyanmiɛn ekun

¹² Anannganman, kɛ ɔ fin adudua'n, wɔ yɛ a ti Nyanmiɛn titi-ɔ. A ti min Nyanmiɛn, ɔ nzuɛn nin klɔ sran liɛ'n ti-man kun, a wu-man le. Anannganman, a kpali e kpɔfuɛ sɔ mun kɛ be di e jɔlɛ. Wɔ bɔ a ti kɛ yɛbuɛ sa'n, a tinnin be kɛ be tu e fɔ ɔ dunman nun.

¹³ Kusu wɔ bɔ a ti saun'n, a kwla nian-man sa tɛ'n. Sɛ be yo sran wie tɛtɛ'n, a kwla tran-man lɛ a fa-man ɔ nyinma a niɛn-mɛn i sa ngbɛn. ?Yɛ wuun nguɛ ti yɛ a nian sa tɛ yofuɛ sɔ'm be aeliɛ'n, bɔ a tɛ-man be su nin-ɔn? ?Kɛ klunwifuɛ'm be ´tra be bɔ be ti nanwlɛfuɛ mun bɔ be ´nunkun be'n, nguɛ ti yɛ a kan-man ndɛ nin-ɔn?

¹⁴ ?Nguɛ ti yɛ a yo klɔ sran'm be kɛ jue mun nin blo nnɛn mun bɔ be lɛ-man min'n be sa nin-ɔn?

¹⁵ Babilɔnifuɛ'm be tra sran'm be kɛ be fa kowa be san jue mun'n sa. Be cuɛn be guɛ i be lala nun, kpɛkuun be klun ɔ'a jɔ lele ɔ'a tratra su.

¹⁶ Be kun nnɛn be fa sɔ be lala mun. Be yra ansans be man be afin sɛ be ´di aliɛ kpa-a, ɔ fin be.

¹⁷ ?Nan be ko yaci-man be tokofi'm be cuɛnlɛ nvlefuɛ'm be wun? ?Be ko yaci-man sran'm be nyrɛnnɛn kunlɛ'n sa mlɔnmlɔn?