3 Jean 1 - NYANMIƐN NDƐ'N 1998

Sran ng'ɔ klɛ fluwa'n ko mɛnnin i'n

¹ Gaiis bɔ a ti n sran kpa, bɔ n klo wɔ sa kpa'n, m bɔ n ti kpɛnngbɛn'n min yɛ n klɛ fluwa nga blɛ wɔ-ɔ .

² N sran kpa, Nyanmiɛn man like kwlaa nga a yo'n ɔ yo kpa, yɛ a yo juejue kɛ ɔ́ wla'n b'ɔ wo Nyanmiɛn su kpa'n sa.

³ Ndɛ nanwlɛ'n i su falɛ wafa nga a fa'n, ɔ nin nanwlɛ nga a di i titi'n, kɛ e niaan wie'm be bali bɔ be kɛnnin i ndɛ kleli min'n, n klun jɔli kpa.

⁴ Sa fi jɔ-man n klun kɛ kɛ n ti i kɛ m mma'm be di nanwlɛ titi'n sa.

Gaiis mo yolɛ

⁵ N sran kpa, e niaan nga be to wɔ lɔ'n, sɛ be ti aofuɛ o, sɛ be ti-man aofuɛ o, a nian be lika kpa.

⁶ Be kan ye nga a yoli be'n i ndɛ kle asɔnunfuɛ mun. N ´srɛ wɔ kɛ a gua be atin klanman i wafa nga a yo-ɔ ɔ ´jɔ Nyanmiɛn klun'n.

⁷ Krist junman'n ti yɛ be ɔli-ɔ, kɛ be ´kɔ'n, b'a fa-man like fi be bɔ be lafi-man Krist su'n bé sa nun.

⁸ I sɔ'n ti, man e ukɛ i sɔ sran mun nan kɛ be ´kan ndɛ nanwlɛ'n be sin'n, e dunman'n `tɛ nun wie.

Diotrɛf wun ndɛ

⁹ N klɛ ndɛ kaan m blɛli asɔnun'n i nunfuɛ mun, sanngɛ Diotrɛf b'ɔ klo kɛ ɔ ´yo bé su kpɛn'n, ɔ fa-man e ndɛ'n su.

¹⁰ Ɔ man sɛ n ju lɔ'n, n ´kan sa ng'ɔ yo'n nin é wun ndɛ tɛtɛ ng'ɔ kan'n. Sa ng'ɔ yo'n nin é wun ndɛ tɛtɛ ng'ɔ kan'n, ng'ɔ ´yo i lɛ'n, ɔ ju-mɛn i. E niaan nga be kɔ lɔ'n, ɔ sike-man be. Be nga be klo kɛ be ´sike be'n, ɔ kplin-man be su, yɛ ɔ kan be bo asɔnun'n nun.

Demetriis i dunman kpa bolɛ

¹¹ N sran kpa, nán nian sa tɛ nga be yo'n su, sanngɛ nian sa kpa nga be yo'n su. Sran ng'ɔ yo sa kpa'n, ɔ ti Nyanmiɛn liɛ, sran ng'ɔ yo sa tɛ'n, ɔ si-man Nyanmiɛn.

¹² Sran'm be kwlaa be bo Demetriis dunman kpa, kannzɛ sran a kan-man bɔbɔ'n, be wun kɛ ɔ ti nanwlɛfuɛ. E kusu e bo i dunman kpa, yɛ a si kɛ i ndɛ nga e kan'n ti nanwlɛ.

I ndɛ'n i atabo

¹³ Ndɛ kpanngban o n klun, n klo kɛ n ´kan kle wɔ, sanngɛ n klo-man kɛ n klɛ.

¹⁴ M bu kɛ ɔ cɛ kaan n ´wun wɔ nan min nin wɔ e ´koko yalɛ.

¹⁵ N yra mín nuan kɛ ɔ́ wun jɔ wɔ fɔuun! Ɔ janvuɛ'm be ´yo wɔ like. N ´yo e janvuɛ'm be kwlakwla be like.