2 Timote 4 - NYANMIƐN NDƐ'N 1998

¹ Ndɛ nga n wa kan kle wɔ yɛ'n, Nyanmiɛn nin Krist-Jésus b'ɔ wa di be nga be wuli'n nin be nga bé nyin o su'n be ndɛ'n, be ti n lalofuɛ. I balɛ b'ɔ wa ba'n nin i famiɛn b'ɔ wa di'n ti, n ´srɛ wɔ kpa,

² sɛ a nyan ɔ́ ti o, sɛ a nyan-man ɔ́ ti o, kan Nyanmiɛn ndɛ'n jran su kpa kle sran mun man be wun i wlɛ. Sran ng'ɔ yo sa'n ijɔ i, wla be fanngan, tra wɔ anwlɛn kpa kle be.

³ Afin cɛn wie lele'n, sran'm be su fa-man ndɛ nanwlɛ'n su kun, be ´yo sa ng'ɔ yo be bɔbɔ be fɛ'n, yɛ be ´kunndɛ sran kpanngban kpa kɛ be `kle be like ng'ɔ yo be fɛ'n.

⁴ Be su sie-man bé su nanwlɛ'n su kun, be ´sie bé su ndɛ nga be ti kɛ ngua sa'm be su.

⁵ Sanngɛ ɔ liɛ'n, nian ɔ wun su sa'n kwlaa nun, yalɛ nga be kle wɔ'n, man ɔ sɔn ɔ nun, jasin fɛ i kanlɛ b'ɔ ti ɔ junman'n, di. Junman nga Nyanmiɛn fa wlali ɔ́ sa nun'n, guɛguɛ i bo.

⁶ N liɛ'n, m'an kaci kɛ nzan bɔ be fa gua man Nyanmiɛn'n sa, n kɔlɛ'n ɔ'a ju.

⁷ M'an mian mín nyin m'an wanndi wanndilɛ dan kpa, m'an ju n juwlɛ, n jran kekle lafili Nyanmiɛn su.

⁸ Siɛn'n, like nga be fa yo sran ng'ɔ yo kpa'n i mo'n, b'a sie i lɔ a sie min. E Min'n b'ɔ di jɔlɛ nanwlɛ nun'n yɛ ɔ ´fa man min jɔlɛ dilɛ cɛn sɔ'n nun-ɔn. Nán min ngunmin yɛ ɔ ´fa man min-ɔn, sanngɛ ɔ ´fa man be kwlaa nga bé nyin tɛ o balɛ i sin'n.

Pɔl yiali Timote

⁹ Bo manndrɛn to min wa icra'n,

¹⁰ afin mɛn'n nun ninnge bɔ Demas klo be'n be ti ɔ'a wanndi min a ɔ Tɛsalonik. Krɛsɛn kusu ɔ'a ɔ Galasi, Tit a ɔ Dalmasi .

¹¹ Lik ngunmin yɛ ɔ nin min o wa-a. A nin Mark an bla, afin ɔ uka min kpa n junman'n nun.

¹² N sunmannin Tisik Efɛz lɔ.

¹³ Sɛ a ´ba'n, n tralɛ dan'n bɔ n yacili i Karpis sa nun Troas lɔ'n, nin fluwa mun, ɔ nin kplo nga be klɛ su b'ɔ ti n cinnjin kpa'n, fa be blɛ min.

¹⁴ Alɛksandri b'ɔ ti blalɛ bofuɛ'n ɔ yoli n tɛ dan kpa. Sa ng'ɔ yoli min'n, Nyanmiɛn ko tuɛ i kalɛ.

¹⁵ Ɔ kusu nian ɔ wun kpa i lika, afin ɔ sili ndɛ nga e kannin'n i akplowa tɛtɛ kpa.

¹⁶ Kɛ be fa min ɔli jɔlɛ difuɛ'm bé ja su klikli'n, sran fi a jran-man ń sin, be kwlaa be wanndili min. Nán man Nyanmiɛn fa bé wun ndɛ sie i klun!

¹⁷ Sanngɛ e Min'n yɛ ɔ jran min sin, yɛ ɔ wlali n fanngan yɛ man n kwla kɛnnin i ndɛ'n kwlaa yɛ man be kwlaa nga be ti-man Zuif'n be tili-ɔ. Ɔ deli min asɔmɔli'n i nuan nun.

¹⁸ E Min'n ´de min sa tɛtɛ'n kwlaa nun, ɔ ´nian n su, ɔ ´fa min kɔ i mɛn'n nun nyanmiɛn su lɔ. Man e yi i ayɛ tititi, nán e yaci i le! Man ɔ yo sɔ!

Be like yolɛ

¹⁹ N ´yo Priska nin Akilas, ɔ nin Onezifɔr awlofuɛ'm be like.

²⁰ Erast kali Korɛnt lɔ, yɛ n yacili Trofim b'ɔ tɔli tukpacɛ'n Milɛt lɔ.

²¹ Bo manndrɛn bla nan ayrɛ'n ɔ'a ba. Eibilis, nin Pidɛn, nin Linis, nin Klodia, ɔ nin e niaan'm be kwlaa be ´yo wɔ like.

²² Man e Min'n nin wɔ tran! N ´yra mín nuan kɛ an nyan ye!