2 Timote 3 - NYANMIƐN NDƐ'N 1998

Mɛn'n i bue nuan

¹ Ndɛ nga m ma kan kle wɔ yɛ'n, fa sie ɔ klun kpa: «Cɛn wie lele'n, kɛ mɛn'n ɔ ´kɔ i bue nuan'n, lika'n ɔ ´yo kekle.»

² Afin sran'm be ´bu be bɔbɔ be wun akunndan, be ´yo sika klofuɛ, be ´di bé nuan, be ´tu bé wun, be ´saci Nyanmiɛn wun, bé nyin su yi-man bé si nin be nin mun, be su si-man ye, bé nyin su yi-man Nyanmiɛn,

³ be su klo-man sran, be yo be sa-a be su yaci cɛ-man, be ´di abla, be su si-man bé wun su nian, be ´yo wlɛ, be ´kpɔ sran kpa mun,

⁴ be ´yi be janvuɛ mun man, be ´yo like-ɔ be su bu-mɛn i akunndan, be ´di tutre, be ´klo mɛn dilɛ'n tra Nyanmiɛn,

⁵ be ´yo bé wun kɛ be sro Nyanmiɛn sa, sanngɛ be su lafi-mɛn i su kɛ ɔ kwla sa yo. Nán fa ɔ́ wun mantan sran sɔ mun.

⁶ Be wie'm be wlu awlo'm be nun blɛlɛlɛ be fa bla nga be wun-man sa wlɛ kpa'n bɔ bé wun sa sɔnnin, bɔ like fanunfanun bɔ bé nyin blo be su'n ti be yaci atin kpafuɛ'n.

⁷ Bla sɔ mun be klo kɛ be `kle be like titi, be kle be sanngɛ be kwla wun-man ndɛ b'ɔ ti nanwlɛ'n i wlɛ mlɔnmlɔn.

⁸ Sran sɔ'm be si ndɛ nanwlɛ bɔ e kan'n i akplowa kɛ Zannɛs nin Zambrɛs be nin Moiz be sili akplowa'n sa. Sran sɔ'm b'a saci, be akunndan'n ti-man kpa kun, kɛ a nian be wafa nga be fa lafi Nyanmiɛn su'n, a wun kɛ be lafi-mɛn i su kpa .

⁹ Sanngɛ be su kwla yo-mɛn i sɔ ju-man mmua, afin be sinnzin'n ɔ wa fite nglo sran'm be kwlaa be nyrun kɛ sran nnyɔn sɔ'm be liɛ'n sa.

Timote i afɔtuɛ manlɛ

¹⁰ Ɔ liɛ'n, a si like nga n kle'n kpa, nin min nzuɛn'n, nin min akunndan'n, nin min Nyanmiɛn su bɔ n lafi'n, nin min anwlɛn bɔ n trɛ i'n, nin min Nyanmiɛn nin sran'm be klolɛ'n, nin min kekle bɔ n jran'n,

¹¹ nin yalɛ nga be kle min'n, ɔ nin nyrɛnnɛn nga n wunnin i Antiɔs nin Ikoni nin Listri lɔ'n. ?Nyrɛnnɛn'n i nyrun nin i sin onin yɛ m'an wun-mɛn i-ɔ? Sanngɛ e Min'n deli min i kwlaa sɔ'n nun.

¹² Sran kwlaa nga i waan ɔ nin Krist-Jésus be ´kaci sran wunmuan nan ɔ ´yo Nyanmiɛn klun sa'n, san be ´kle i yalɛ.

¹³ Sanngɛ sran nga be klun yo wi bɔ be ti gblɛfuɛ'n, bé sa tɛ nga be yo'n i tɛ'n ɔ ´tra laa liɛ'n, be ´laka sran mun yɛ be ´laka be bɔbɔ bé wun.

¹⁴ Sanngɛ ɔ liɛ'n, like nga be kleli wɔ bɔ a lafi su'n, nian su kpa. A si sran nga be kleli wɔ like sɔ'n.

¹⁵ Kɛ ɔ fin ɔ ba kaan nun'n, a si Nyanmiɛn Ndɛ nga be klɛli'n yɛ man a si ngwlɛlɛ b'ɔ man sɛ be lafi Krist su-ɔ be nyan bé ti nin-ɔn.

¹⁶ Nyanmiɛn Ndɛ nga be klɛli'n, i bɔbɔ yɛ ɔ fɛ i kwlaa mannin sran mun yɛ be klɛli-ɔ. Be fa kle like, be fa kle sran mun lele be wun nanwlɛ'n, be fa tu be fɔ, be fa kle be sa nga be yo-ɔ ɔ ti kpa'n

¹⁷ nan Nyanmiɛn sran'n ɔ nyan like b'ɔ kwla fa di junman kwlaa ng'ɔ ti kpa'n.