2 Timote 2 - NYANMIƐN NDƐ'N 1998

Krist i sonja kpa

¹ I sɔ'n ti ɔ liɛ'n, ń wa, ye nga kɛ e nin Krist-Jésus e kacili sran wunmuan'n ɔ yoli ye'n ti, jran kekle.

² Ndɛ nga a tili i kɛ n kɛnnin i sran kpanngban be nyrun'n, kan ndɛ sɔ'n, fa yaci i be nga a lafi bé su bɔ be kusu be kwla kan kle sran uflɛ'n, bé sa nun.

³ Nyrɛnnɛn nga e wun i'n, Krist-Jésus i sonja kpa bɔ a ti'n ti man ɔ sɔn ɔ nun.

⁴ Sonja ng'ɔ ti sonja kpa bɔ i waan ɔ ´yo sa ng'ɔ ti i su kpɛn'n i klun su'n, ɔ fɛ-mɛn i wun wla-man like nga sran kun'm be yo'n nun.

⁵ Sran ng'ɔ wanndi'n, sɛ ɔ'a wanndi-man kɛ be kleli i'n sa'n, ɔ nyan-man wanndilɛ sɔ'n nun like.

⁶ Fie difuɛ'n ng'ɔ di junman bɔ fɛ'n yɛ ɔ fata kɛ ɔ dun mmua nyan i fie nun like-ɔ.

⁷ Ndɛ nga n kan'n, bu i akunndan, afin e Min'n man a ´wun sa'n kwlaa wlɛ.

⁸ Bu Jésus-Krist, David i anunman b'ɔ cɛnnin'n i akunndan. Kɛ n fa kɛn i jasin fɛ bɔ n bo'n i nun sa.

⁹ Jasin fɛ sɔ'n ti yɛ n wun nyrɛnnɛn bɔ be ci min kɛ sa tɛ yofuɛ sa nin-ɔn. Sanngɛ Nyanmiɛn Ndɛ fuɛ'n, be kwla tannin-mɛn i.

¹⁰ I sɔ'n ti yɛ sa sɔ'n kwlaa nun be nga Nyanmiɛn kpali be'n be ti n tra min anwlɛn nin-ɔn. N tra min anwlɛn kɛ ɔ ´yo nan Krist-Jésus ti be kusu be nyan bé ti yɛ be nyan nyrun b'ɔ wie-man'n.

¹¹ Ndɛ nga n wa kɛn i yɛ'n ti nanwlɛ weiin: Sɛ e nin i yɛ e wuli'n, e nin i yɛ e ´cɛn-ɔn.

¹² Sɛ e jran kekle'n, e nin i yɛ e ´di famiɛn nin-ɔn. Sɛ e se kɛ e si-mɛn i'n, i kusu wa se kɛ ɔ si-man ye.

¹³ Sɛ e di-man nanwlɛ'n, i liɛ'n ɔ di nanwlɛ, afin ndɛ ng'ɔ kan'n, ɔ kaci-mɛn i.

Junman difuɛ bɔ Nyanmiɛn yo i mo'n

¹⁴ Kan ndɛ nga mun kle be kwlaa, kan flan nun. Nyanmiɛn ti ɔ lalofuɛ, srɛ be kpa kɛ be `yaci ndɛ'm be su utre dilɛ'n b'ɔ yo-man like fi ye'n, b'ɔ saci be bɔ be ti'n.

¹⁵ Mian ɔ́ nyin di junman kpa man Nyanmiɛn yo wɔ mo, yo junman difuɛ bɔ nyannzuɛn kun-mɛn i i junman'n ti'n, b'ɔ kan ndɛ nanwlɛ-ɔ ɔ kpɛ-mɛn i wun'n.

¹⁶ Nán fa ɔ wun wla ndɛ ngbɛn-ngbɛn bɔ be nin Nyanmiɛn ndɛ'n be ti-man kun'n be nun, afin be nga be yo sɔ'n be fa-man bé wun mantan-man Nyanmiɛn lele be nin i bu.

¹⁷ Bé nuan nun ndɛ'n ɔ ´yo kɛ kannin sa, ɔ ´trɛ. Be nun wie yɛlɛ Imene nin Filɛt

¹⁸ bɔ b'a yaci ndɛ nanwlɛ'n. Be se sran'm be kɛ be nga be wuli'n b'a cɛn, ɔ man be wie'm be lafi-man Nyanmiɛn su kpa kun.

¹⁹ Sanngɛ Nyanmiɛn i sua'n i bo ase b'ɔ wlali'n ɔ jran kekle, be klɛli su kɛ: «E Min'n si be nga be ti i liɛ'n,» yɛ be klɛli su ekun kɛ: «Sran kwlaa nga i waan ɔ ti e Min'n i liɛ'n, man ɔ yaci sa tɛ yolɛ'n .»

²⁰ Awlo dan kun nun'n nán sika ɔkwlɛ sɛ nin jɛtɛ ufue sɛ ngunmin yɛ be o nun-ɔn, sanngɛ like nga be fa waka be sɛli'n, ɔ nin nga be fa ufa wuli'n be wie o lɔ. Be sie wie fa di cɛn, yɛ be fa wie yo like kwlaa nga be klo'n.

²¹ Ɔ man sran ng'ɔ yi i wun sa tɛ'm be yolɛ nun'n, ɔ ´yo kɛ talie klanman bɔ be fa di cɛn'n sa, ɔ ´kaci i Min'n liɛ, ɔ ´fa yo i wun sa ye, yɛ ɔ ´kwla fa yo like kwlaa ng'ɔ ti kpa'n.

²² Nán bu like nga gbanflɛn konvi sɔ i'n i akunndan, sanngɛ be kwlaa nga sa tɛ nun-man be anwlɛn'n nun bɔ be bo flɛ e Min'n, a nin be an `mian amún nyin an `yo sa ng'ɔ ti kpa'n, an `lafi Nyanmiɛn su, an `klo Nyanmiɛn nin sran, yɛ man amun nuan sɛ amun wun.

²³ Sanngɛ nán fa ɔ wun wla sinnzin akplowa silɛ b'ɔ yo-man sa fi ye'n nun, afin a si kɛ akplowa'n i bo agualiɛ yɛlɛ utre.

²⁴ Afin e Min'n i sran'n nin utre'n fata-man. Sanngɛ ɔ yo sran'm be kwlaa be kpa, ɔ si like kle, sa nga be yo i'n sɔn i nun,

²⁵ yɛ ɔ tu be nga be kpalo i nuan'n be fɔ amanniɛn su, wienun-ɔn cɛn wie lele Nyanmiɛn man be ´kaci be nzuɛn'n nan be ´si sa ng'ɔ ti nanwlɛ'n.

²⁶ Ɔ man bé nyin ´ti, yɛ be ´flo aya nga mmusu'm bé si Satan suali b'ɔ trali be b'ɔ man be yo i klun sa'n nun.