2 Samiɛl 8 - NYANMIƐN NDƐ'N 1998

Nvle nga David kwlali be'n

¹ I sin David kwlali Filistifuɛ'm bɔ be yɛ be sie lika'n laa'n. Ɔ guali bé nyin ase. Ɔ deli sielɛ sɔ'n bé sa nun.

² David kwlali Moabfuɛ mun. Ɔ man be lali asiɛ wun. Ɔ man be lali be ngbinngbin nun. Yɛ ɔ fali nyanman kun sie i kpalɛ kun, yɛ kpalɛ nnyɔn. Be kwlaa nga be la lɛ'n, ɔ kunnin be. I sin ɔ sie i kpɛ nsan su, be kwlaa nga be la lɛ ɔ yacili be lɛ. Moabfuɛ'm be suli David, be tua lapo be mɛn i.

³ David kwlali Rɛɔb i wa Adadezɛr b'ɔ ti Sɔba famiɛn'n nin i sonja mun. Kɛ ɔ ´yo sɔ'n, wuun Adadezɛr waan ɔ ko fa lika bɔ Efrat nzue ba'n wo nun'n ekun.

⁴ David trɛli i nnɛn kpanngɔ fufuɛ akpi-kun-nin-ya nso (1.700), ɔ trɛli i alɛ kunfuɛ nga be nanti be ja nun'n akpi-akpi ablaɔn (20.000) ekun. Ɔ kpɛli nnɛn kpanngɔ nga be cuɛn kakaklolo'm be kwlaa be jasin ndin'n nun, san kakaklolo ya be nnɛn kpanngɔ liɛ nga be cuɛn be'n yɛ ɔ yacili be lɛ nan ɔ'a fa be.

⁵ Damas lɔ Sirifuɛ'm be bali Adadezɛr b'ɔ ti Sɔba famiɛn'n i ukalɛ, nan David ɔ'a kun be nun sran akpi-akpi ablaɔn-nin-nnyɔn (22.000).

⁶ David sieli siefuɛ mun Damas lɔ Sirifuɛ'm be su. Sirifuɛ'm be suli David, be tua lapo be mɛn i. Kan kwlaa nga David kɔ lɛ'n, Anannganman man ɔ nyan jranwlɛ kpan.

⁷ David fali Adadezɛr i gladi difuɛ'm be sika ɔkwlɛ nyrɛn mun bali Zerizalɛm.

⁸ David fali aaba kpanngban kpa Adadezɛr i klɔ nga be flɛ be Betak nin Berɔta'n bé su bali.

⁹ Tɔi b'ɔ ti Amat famiɛn'n tili i kɛ David ɔ'a kwla Adadezɛr i alɛ kunfuɛ'm be ngba.

¹⁰ Yɛ ɔ sunmannin i wa Zɔram kɛ ɔ wa yo famiɛn David like nan ɔ yo i mmo kwlalɛ b'ɔ kwlali Adadezɛr nin i sonja mun ti. Afin alɛ o Adadezɛr nin Tɔi be afiɛn. Kɛ Zɔram ´ba'n, ɔ fali jɛtɛ ufue ninnge mun, sika ɔkwlɛ ninnge mun, nin aaba ninnge mun.

¹¹ Famiɛn David fali be mannin Anannganman kɛ nvle ng'ɔ kwlali be'n, b'ɔ fali be jɛtɛ ufue mun, ɔ nin be sika ɔkwlɛ mun mannin Anannganman'n sa.

¹² Nvle sɔ be yɛ: Siri, nin Moab, nin Amɔn osu'n, nin Filisti, yɛ Amalɛk. Ɔ fali ninnge ng'ɔ deli be Adadezɛr sa nun'n kusu fa mannin Anannganman.

¹³ David nin Sirifuɛ'm be ko kunnin, ɔ kwlali be. Kɛ ɔ ´sɛ sin ba'n, ɔ nin Edɔmfuɛ'm be wa kunnin nan ɔ'a kwla be ekun. Ɔ kunnin Edɔmfuɛ akpi-akpi blu-nin-mɔcuɛ (18.000) Njin Kongo'n nun. Ɔ nyannin dunman.

¹⁴ Ɔ fali siefuɛ mun sieli i Edɔm lɔ, ɔ sieli be Edɔm mɛn wunmuan'n nun. Edɔmfuɛ'm be suli David. Kan kwlaa nga David kɔ'n, Anannganman man ɔ nyan jranwlɛ.

Be nga be di junman man David'n

¹⁵ David yoli Izraɛl nvle wunmuan'n su famiɛn. Ɔ di nanwlɛ Izraɛlfuɛ'm be kwlaa be jɔlɛ dilɛ'n nun.

¹⁶ Zɛriza i wa Zoab ti sonja'm be kpɛnngbɛn. Asilid i wa Zozafat ti famiɛn'n i nuan ijɔfuɛ.

¹⁷ Asitib i wa Zadɔk, ɔ nin Abiatar i wa Asimelɛk be ti Nyanmiɛn nyrun jranfuɛ. Sɛraza ti fluwa klɛfuɛ.

¹⁸ Zɛozada i wa Bɛnaza ti Keretfuɛ mun nin Pelɛtfuɛ'm bɔ be ti famiɛn David i gladi difuɛ'm bé su kpɛn. David i wa yasua'm be ti Nyanmiɛn nyrun jranfuɛ wie .