2 Samiɛl 7 - NYANMIƐN NDƐ'N 1998

Nyanmiɛn kannin kɛ ɔ ´yo like man David nin i osu nunfuɛ mun

¹ Famiɛn'n trannin i sua'n nun lɛ. Anannganman deli i i kpɔfuɛ nga be mɛn'm be mɛntɛn i liɛ'n lɛ be kwlaa bé sa nun. Ɔ man i wla guali ase.

² Yɛ ɔ seli Nyanmiɛn nuan ijɔfuɛ Natan kɛ: «N la sɛdri waka sua nun, kpɛkuun Nyanmiɛn i alaka'n wo tannin sua nun.»

³ Natan seli famiɛn'n kɛ: «Like kwlaa ng'ɔ o ɔ klun kɛ a ´yo'n, yo. Afin Anannganman jin ɔ́ sin.»

⁴ Kɔnguɛ Anannganman kan ndɛ kleli Natan. I waan:

⁵ «Ko se min sufuɛ David kɛ: ‹Anannganman wan yoo: Nán wɔ yɛ a ´kplan sua nga n ko tran nun nin-ɔn.

⁶ Kɛ n fali Izraɛlfuɛ mun Ezipt m bali'n lele b'ɔ ´fa ju ndɛ'n, n nian tran-man sua nun le. Kan Izraɛlfuɛ'm be ´kɔ'n, e nin be yɛ e kɔ-ɔ, yɛ tannin sua kunngba nga n trannin nun'n, i nun yɛ n tɛ wo-ɔ.

⁷ Nantilɛ kwlaa nga e nin Izraɛlfuɛ mun e ´nanti lɛ'n, n nian se-man Izraɛlfuɛ nga be dun mmua min nvle'n nunfuɛ'm be nyrun'n be kɛ: Ɔ yo sɛ ti yɛ amun kplan-man sɛdri waka sua man-man min-ɔn.› »

⁸ «I ti kan kle min sufuɛ David kɛ: ‹Anannganman b'ɔ sie mɛn wunmuan'n i waan: N ko fali wɔ aawlɛ flɛnnɛn'n nun bua'm bé sin kɛ a `dun mmua min nvle'n bɔ yɛlɛ Izraɛl'n i nyrun.

⁹ Like kwlaa nga a ´yo'n, e nin wɔ-ɔ. N nunnunnin ɔ kpɔfuɛ'm be kwlaa ɔ nyrun. N yoli man ɔ dunman'n ɔ'a fu kɛ asiɛ'n su sran dandan'm be liɛ'n sa.

¹⁰ M'an man min nvle'n bɔ yɛlɛ Izraɛl'n i lika kun. M'an tɛkɛ i lɛ, be su tu-mɛn i bo, sa fi su kun-mɛn i srɛ kun. Sran tɛtɛ'm be su kle-mɛn i yalɛ kun

¹¹ kɛ klikli nun bɔ n waan jɔlɛ difuɛ'm be `sie min nvle sɔ'n sa. N yoli man w'a de wunmiɛn ɔ kpɔfuɛ'm bé sa nun. I sin kusu, min Anannganman, n ´kan kle wɔ kɛ n ´yo man a ´nyan sran ɔ osu'n nun.

¹² Sɛ ɔ́ wie cɛn'n ju'n, bɔ w'a wu'n, n ´yo man ɔ klun ba kun ɔ wa tran ɔ ja nun. N ´yo man i sielɛ ɔ ´taka.

¹³ I sɔfuɛ'n yɛ ɔ ´kplan sua man min-ɔn. N ´tɛkɛ i sielɛ'n tititi.

¹⁴ N ´yo i si, ɔ ´yo mín wa. Sɛ ɔ yo sa tɛ'n, n ´tu i fɔ, n ´fa ngble m ´bo i kɛ be fa bo sran'n sa,

¹⁵ sanngɛ n su yi-mɛn i ase kɛ n fa yili Sail ase bɔ a trannin i osu'n sa.

¹⁶ Wɔ awlo'n nin ɔ sielɛ'n be ´taka a nin wɔ osufuɛ mun amun sa nun tititi, a ´tran famiɛn bia'n su yɛ ɔ sielɛ'n su kan-man ase le .› »

¹⁷ Natan kannin ndɛ'n ng'ɔ tili i aolia nun sɔ'n i kwlaa kleli David.

David i Nyanmiɛn srɛlɛ

¹⁸ I sin, famiɛn David ɔli Anannganman nyrun, nan ɔ'a se i kɛ: «Anannganman min Nyanmiɛn, kɛ n nian wafa nga e nin min osufuɛ mun e fa ti laa'n, n wun kɛ w'a man é su dan.

¹⁹ Yɛ sanngɛ min Min Anannganman, kan w'a fa ye a ju lɛ'n, ɔ ti kaan ɔ nyrun. ?Sa nga a wa yo man min osu'n nunfuɛ mun cɛn wie'n yɛ a su kɛn i ndɛ ekun-ɔn? ?Yɛ m bɔ n ti klɔ sran'n, yɛ a bo ndɛ nga su kle min-ɔn?

²⁰ ?N ´se sɛ ekun, min Min Anannganman? Ɔ bɔbɔ a si min bɔ n ti ɔ sufuɛ'n.

²¹ Ɔ ndɛ'n bɔ a kannin'n ti, ɔ nin ɔ klun-ufue su yɛ a yoli sa dandan nga mun-ɔn, kpɛkuun a fa be kleli min.

²² Nanwlɛ Anannganman Nyanmiɛn, a ti dan. A lɛ-man wunsu. Nyanmiɛn fi nun-man lɛ, san wɔ. Be kan kleli ye sɔ.

²³ Nvle fi nun-man lɛ bɔ be kwla fa sunnzun Izraɛl nvle nin-ɔn. Izraɛl mɛn'n kunngba yɛ a ko kpɔli i Eziptfuɛ mun nin be amuɛn'm be sa nun-ɔn. A fɛ i yoli ɔ nvle. Yɛ wɔ man i dunman'n ɔ fuli, afin a yoli sa dandan mun, nin abonuan sa mun mɛnnin i mɛn nga nun wa.

²⁴ A yoli man Izraɛl nyannin wunmiɛn yɛ a fɛli i yoli ɔ nvle tititi, yɛ wɔ Anannganman a yoli i Nyanmiɛn.

²⁵ I ti'n, Anannganman Nyanmiɛn, e nin min osu'n e liɛ nga a kannin'n, yiɛ i nuan tititi.

²⁶ Man be manman ɔ dunman'n tititi. Man be se kɛ: ‹Anannganman b'ɔ sie mɛn wunmuan'n yɛ ɔ ti Izraɛl Nyanmiɛn nin-ɔn.› Yɛ man min osu'n nyan wunmiɛn titi.

²⁷ Anannganman wɔ bɔ a sie mɛn wunmuan'n, Izraɛl Nyanmiɛn, ɔ bɔbɔ a kan kleli min kɛ: ‹M ´man wɔ osu kun.› I ti kusu yɛ man n nyannin anwlɛn srɛli wɔ sa-a.

²⁸ Min Min Anannganman, ɔ liɛ'n a ti Nyanmiɛn, a kan ndɛ nanwlɛ. Yɛ w'a kan ndɛ fɛ nga a kle min.

²⁹ Ɔ man, yo min osufuɛ'm be ye, man be tran ɔ́ sa nun tititi, yɛ kɛ a fa kannin'n sa, min Min Anannganman, man ɔ́ sa kpa'n ɔ tran min awlo'n su tititi.»