2 Samiɛl 6 - NYANMIƐN NDƐ'N 1998

David fali Nyanmiɛn i alaka'n ɔli Zerizalɛm

¹ David yiali Izraɛlfuɛ'm be nun sonja kpakpa mun ekun. Be ti sran akpi-akpi ablasan (30.000).

² David nin sran sɔ'm be ɔli Baale-Zida , Nyanmiɛn i alaka'n i falɛ. Alaka sɔ'n dunman ng'ɔ o su'n yɛlɛ Anannganman b'ɔ sie mɛn wunmuan'n i dunman'n. Anz nga be o alaka'n su'n, Anannganman o be afiɛn lɛ.

³ Be fali Anannganman i alaka'n Abinadab i sua ng'ɔ o kpɔlɛ'n su lɔ'n nun. Be fɛli i kakaklolo uflɛ kun nun yɛ be ɔli-ɔ. Abinadab i mma mun, Iza nin Akzo yɛ be nian kakaklolo'n su yɛ ɔ kɔ-ɔ.

⁴ Kɛ be fali Nyanmiɛn i alaka'n Abinadab i sua lɔ kpɔlɛ'n su lɔ bɔ be ´fa kɔ'n, Iza o i bue kun su, yɛ Akzo dun mmua.

⁵ Be ´kɔ'n, wuun David nin Izraɛlfuɛ'm be kwlaa be ´kan ngowa Anannganman nyrun. Ngowa kanlɛ ninnge nga be fa siprɛs waka be yo'n, nin jru mun, nin aluku mun, nin klɛn mun, nin sɛkɛsɛkɛ mun, nin aaba ndɛ mun, i kwlaa o bé sa nun.

⁶ Kɛ be juli Nakɔn asiɛ'n su'n, nannin'm be boli tanngan, ɔ man Nyanmiɛn i alaka'n ciali, wuun ɔ wa tɔ. Iza toli i sa trali nun.

⁷ Yɛ Anannganman fɛli i wun ya-a. Nan ɔ'a bu i fɔ i osu kunngba'n nun lɛ, afin ɔ fata-man kɛ ɔ kan Anannganman i alaka'n, kpɛkuun ɔ kɛnnin i. Iza wuli lɛ, alaka'n wun lɛ.

⁸ Kunlɛ bɔ Anannganman kunnin Iza'n ɔ'a yo-man David i fɛ. Ɔ tɔnnin lika sɔ'n i dunman kɛ Iza i Fɔ Bulɛ. Lele ndɛ be tɛ flɛ i sɔ.

⁹ David sroli Anannganman le kun sɔ'n nun. I waan: «?N fa Anannganman i alaka'n n kɔ min wun lɔ sɛ yɛ ɔ yo ye-ɔ?»

¹⁰ Ɔ man ɔ'a fa-man Anannganman i alaka'n ɔ'a ɔ-man David Klɔ lɔ kun. Ɔ fa ko sieli i Gat bian nga be flɛ i Obɛd-Edɔm'n i sua'n nun lɔ.

¹¹ Anannganman i alaka'n kali Obɛd-Edɔm i sua'n nun lɔ anglo nsan, Anannganman yoli Obɛd-Edɔm nin i awlofuɛ'm be kwlaa be ye.

Anannganman i alaka'n i Zerizalɛm lɔ julɛ

¹² David tili i kɛ Anannganman ɔ'a yo Obɛd-Edɔm i awlo'n i ye, nan i sa nun ninnge'n kwlaa ɔ'a yo kpa Anannganman i alaka b'ɔ o lɔ'n ti. Yɛ David ɔli ko fali Anannganman i alaka'n Obɛd-Edɔm i sua'n nun lɔ bali David Klɔ-ɔ. Be ´ba'n, wuun be ´si able.

¹³ Kɛ sran nga be sua Anannganman i alaka'n be tuli bé ja koko nsiɛn'n, David fali nannin yasua b'ɔ b'a kpɛ cro'n kun, bɔ ɔ'a lo kpa'n yili tɛ.

¹⁴ Kpɛkuun David wlɛli i wun ase sili able Anannganman nyrun. Nyanmiɛn nyrun jranfuɛ'm bé tannin kan'n yɛ ɔ ci i bo-ɔ.

¹⁵ Kɛ David nin Izraɛlfuɛ'm be kwlaa be ´fa Anannganman i alaka'n be ´ba'n, wuun be ´kpan be klun b'ɔ ti jɔwa'n ti'n, wuun awɛ'n ´tɛ.

¹⁶ Kɛ be ´fa Anannganman i alaka'n ´ju David Klɔ lɛ'n, wuun Sail i wa bla Mikal jin fenɛtri'n nun lɔ, i nyin ta be. Ɔ ´nian-an, famiɛn David yɛ ɔ su si able ´tu kpɛn Anannganman nyrun yɛ, ɔ yoli i tɛ nan ɔ'a yo i finfin.

¹⁷ Be fali Anannganman i alaka'n be sieli i siewlɛ'n nun, yɛlɛ tannin sua nga David kplɛnnin i kɛ be fa `sie nun'n. I sin David yili tɛ nga be yra be nnɛn'n kɔlikɔli'n, ɔ nin bo kun yolɛ i su tɛ mun Anannganman nyrun.

¹⁸ Kɛ David wieli tɛ sɔ'm be yi'n, ɔ yrɛli i nuan klanman mannin nzrafuɛ mun Anannganman b'ɔ sie Izraɛl mɛn'n i dunman nun.

¹⁹ Yɛ ɔ mannin Izraɛlfuɛ'm be kwlaa nga be yiali'n be like kɛ be di, i bla o, i yasua o. Sran kun kpaun kun, nin nglesia gato kun, nin vinyi mma kee gato kun. I sin be ɔli be tranwlɛ'm be nun.

²⁰ David kusu ɔli i lika, i waan ɔ ´ko yrɛ i nuan man i awlofuɛ mun. Kpɛkuun Sail i wa Mikal fiteli, ɔ ko kpɛli i atin yɛ ɔ seli i kɛ: «Izraɛl famiɛn'n i wun kpalɛ ng'ɔ kpɛli i i sufuɛ bla nin yasua'm be nyrun lɛ'n man ɔ nyannin nyrun ndɛkɛn dan o! Ɔ kpɛli i wun kɛ sran ngbɛn wie sa!»

²¹ David tɛli Mikal su kɛ: «Anannganman b'ɔ buli min sran trali ɔ́ si nin i awlofuɛ'm be kwlaa'n, bɔ i ti yɛ ɔ fali min kɛ n sie i nvle Izraɛl'n, Anannganman i nyrun yɛ n sili able sɔ nin-ɔn.

²² N ´yo ngbɛn tra ng'ɔ o lɛ'n su nan n yo mín wun kɛ finfinfuɛ sa bɔbɔ'n, ɔ nin i sɔ'n ngba'n, afanniɛn bla nga a kan be ndɛ lɛ'n, be su yaci-man min ayɛ yilɛ le.»

²³ Sail i wa Mikal sɔ'n ɔ'a wu-man ba le nan ɔ'a wu.