2 Samiɛl 5 - NYANMIƐN NDƐ'N 1998

B'a fa David b'a sie i Izraɛl mɛn'n i su famiɛn

¹ Izraɛl akpasua'm be kwlaa bé su sran'm be wa toli David Ebrɔn lɛ, be seli i kɛ: «Nian, e nin wɔ e ti kun, e kpaci-man.

² Laa bɔbɔ nga Sail ti famiɛn'n, wɔ yɛ a dun mmua Izraɛl sonja'm be nyrun-ɔn. Anannganman seli wɔ kɛ: ‹Wɔ yɛ a ´sie Izraɛlfuɛ'm bɔ be ti min nvlefuɛ mun nin-ɔn. Wɔ yɛ a ´yo be su kpɛn nin-ɔn.› »

³ Kɛ Izraɛl kpɛnngbɛn'm be wa wunnin famiɛn David i wun Ebrɔn lɛ kɛ ng'ɔ o lɛ'n sa. Ɔ nin be nuan sɛli bé wun Anannganman i nyrun. Yɛ be fɛ i sieli Izraɛlfuɛ'm bé su famiɛn-ɔn.

⁴ Kɛ David ´yo famiɛn'n, wuun ɔ lɛ afuɛ ablasan. Ɔ trannin bia'n su afuɛ ablanan.

⁵ Ɔ yoli Zida mɛn'n i su famiɛn Ebrɔn lɔ afuɛ nso anglo nsiɛn. I sin ɔ yoli Izraɛl nin Zida mɛn'n be su famiɛn Zerizalɛm lɔ afuɛ ablasan-nin-nsan.

David ɔ'a fa Zerizalɛm klɔ'n

⁶ Famiɛn'n nin i sran'm be ɔli Zerizalɛm kɛ be nin Zɛbisfuɛ mun bɔ be tran lɔ akpasua'n su'n be ´ko kun. Zɛbisfuɛ'm be seli David kɛ: «A su kwla wlu-man wa. Sɛ a wlu wa bɔbɔ'n, anyansifuɛ nin cɛcɛwafuɛ mun be yɛ be ´fuan wɔ-ɔ .» Kɛ be kan sɔ'n ɔ kle kɛ: «David su kwla fa-man klɔ'n.»

⁷ Sanngɛ David fali Siɔn fiawlɛ lika sɔ'n, be tɔnnin i dunman ekun kɛ David Klɔ.

⁸ Le kun sɔ'n nun'n David seli kɛ: «Sɛ sran kun waan ɔ ´kwla Zɛbisfuɛ mun'n, man ɔ fa atin ng'ɔ o asiɛ'n bo lɔ'n, nan ɔ `to be lɔ. N kpɔ cɛcɛwafuɛ nin anyansifuɛ sɔ mun!» I sɔ'n ti yɛ be ´kan ndɛ-ɔ, be se kɛ: «Anyansifuɛ nin cɛcɛwafuɛ'm be su wlu-man Anannganman i sua'n nun nin-ɔn.»

⁹ David trannin fiawlɛ lika'n nun lɛ. Ɔ tɔnnin i dunman kɛ David Klɔ. Ɔ kplannin sua mun Milo b'ɔ ti fiawlɛ'n i klun lɔ. Ɔ kplannin wie kusu sin yiɛli i.

¹⁰ David yo dan kɔ i nyrun titi, afin Anannganman b'ɔ sie mɛn wunmuan'n nin i be o nun.

¹¹ Iram b'ɔ ti Tir famiɛn'n ɔ sunmannin sran David sin, kɛ be ´kɔ'n, be fali sɛdri waka, ɔ nin waka sɛfuɛ mun, ɔ nin yɛbuɛ nga be fa kplan sua'n i sɛfuɛ mun ɔli. Be ko kplannin sua mannin David.

¹² David wunnin i sakpa kɛ Anannganman kpɛli i kɛ ɔ yo Izraɛl famiɛn, afin Anannganman yoli man David i sielɛ i nyin fiteli kpa, Izraɛl b'ɔ ti i nvle'n ti.

David i mma ng'ɔ wuli be Zerizalɛm lɔ'n

¹³ Kɛ David fɛli i Ebrɔn lɔ bali'n, ɔ wa boli Zerizalɛm bla wie'm be soman, yɛ ɔ jali wie mun ekun. Yɛ ɔ wuli ba yasua nin ba bla mun ekun.

¹⁴ Ba nga ɔ wuli be Zerizalɛm lɔ'm be yɛ: Samia, Sɔbab, Natan, Salomɔn,

¹⁵ Zibar, Elisia, Nefɛg, Zafia,

¹⁶ Elisama, Eliada, ɔ nin Elifelɛt.

David kwlali Filistifuɛ mun

¹⁷ Filistifuɛ'm be tili i kɛ b'a fa David b'a sie i Izraɛl mɛn'n i su famiɛn, yɛ be kwlaa be ɔli kɛ be nin i be ´ko kun. Kɛ David tili'n, ɔ ko fiali fiawlɛ'n nun lɔ.

¹⁸ Filistifuɛ'm be bali, be wa guali Rɛfafuɛ'm be kongo'n nun lɛ.

¹⁹ Yɛ David usali Anannganman kɛ: «?E nin Filistifuɛ mun e ko kun? ?A ´yi be wla mín sa nun?» Anannganman seli i kɛ: «Kɔ, n ´yi be m ´man wɔ.»

²⁰ Yɛ David ɔli Baal-Pɛrazim nan ɔ'a kwla be lɛ. Yɛ David waan: «Anannganman ɔ'a sanndi min kpɔfuɛ'm be nun, be nun-man min nyrun lɛ kun, b'a ɔ kɛ nzue b'ɔ sonji kɔ'n sa.» I ti yɛ be tɔnnin lika sɔ'n i dunman kɛ Baal-Pɛrazim nin-ɔn. I bo yɛlɛ kɛ: «Lika bɔ be bo sanndili'n.»

²¹ Filistifuɛ'm be yacili be amuɛn'm be lɛ nan David nin i sran'm b'a isa be b'a wɔ.

²² Filistifuɛ'm be wa guali Rɛfafuɛ'm be kongo'n nun lɛ ekun.

²³ David usali Anannganman, nan ɔ'a tɛ i su kɛ: «Nán sin be nyrun ndɛnman su. Bu be kɔmin sin lɔ nan a nin be `yia mirie bo'n i ndɛnman lɛ.

²⁴ Sɛ a ti like b'ɔ tɛ mirie waka'm be ti su lɔ kɛ sran su nanti sa'n, kan ɔ́ wun kɔ, afin n dun mmua ɔ nyrun n ko fuan Filistifuɛ mun.»

²⁵ David niannin ndɛ nga Anannganman kannin'n su yoli. Ɔ kwlali Filistifuɛ mun Gɛba lele fa juli Gezɛr.