2 Samiɛl 3 - NYANMIƐN NDƐ'N 1998

¹ Sail i sran mun nin David i sran'm be kunnin alɛ'n cɛli. Kɛ David ´nyan wunmiɛn kɔ'n, wuun Sail i sran'm be kusu be fanngan'n ´kpɛ su.

David i wa klikli mun

² David wuli ba mun Ebrɔn lɔ. I wa klikli'n yɛlɛ Amnɔn, ɔ nin Asinɔam b'ɔ fin Zizreɛl'n yɛ be wuli i-ɔ.

³ I nnyɔn su'n yɛlɛ Kileab, ɔ nin Nabal i angboti Abigail b'ɔ fin Karmɛl'n yɛ be wuli i-ɔ. I nsan su'n yɛlɛ Absalɔm, ɔ nin Talmai b'ɔ ti Gesir famiɛn'n i wa Maaka yɛ be wuli i-ɔ.

⁴ I nnan su'n yɛlɛ Adɔniza, ɔ nin Agit yɛ be wuli i-ɔ, i nnun su'n yɛlɛ Sɛfatia, ɔ nin Abital yɛ be wuli i-ɔ.

⁵ I nsiɛn su'n yɛlɛ Zitream, ɔ nin i yi Egla yɛ be wuli i-ɔ. Ba nga David wuli be Ebrɔn lɔ'n be yɛ be o lɛ-ɔ.

Abnɛr nin Is-Bosɛt be afiɛn fɔnlɛ

⁶ Kɛ Sail i sran'm nin David i sran'm be ´kun alɛ'n ´kɔ'n, wuun Abnɛr ´nyan nyrun Sail i awlo'n nun.

⁷ Sail i soman kun o lɛ, be flɛ i Rizpa, i si'n suan Aza. Is-Bosɛt usali Abnɛr kɛ: «?Ɔ yo sɛ ti yɛ a nin n si i yi'n be lali-ɔ?»

⁸ Kɛ Abnɛr tili ndɛ sɔ'n, ɔ fali ya dan kpa. Yɛ i waan: «Be waan n ti Zidafuɛ'm be alua? N yoli Sail osufuɛ mun, nin i niaan mun, ɔ nin i janvuɛ'm be ye. Lele ndɛ bɔbɔ n tɛ yo. I sin, m'an yi-man wɔ m'an wla-man David sa nun. ?Yɛ wɔ yɛ ndɛkɛn a jaso kan ndɛ tɛ kle min bla nga ti nin-ɔn?

⁹ Sɛ m'an yia-man sa nga Anannganman kan kleli David kɛ ɔ ´yo mɛn i'n i nuan'n, man Nyanmiɛn wun min.

¹⁰ Anannganman kannin kɛ Sail i osufuɛ'm be bia su tranlɛ'n ɔ ´wie nan David ´sie Izraɛl nin Zida kɛ ɔ fɛ i Dan b'ɔ ju Beɛr-Seba'n.»

¹¹ Is-Bosɛt ɔ'a kwla-man i nuan uke afin ɔ sro Abnɛr srolɛ kpa.

Abnɛr ɔ'a su David su

¹² Yɛ Abnɛr sunmannin sran David sin kɛ be usɛ i kɛ: «?Wan liɛ yɛlɛ mɛn'n?» I waan be `se i ekun kɛ ɔ klo kɛ ɔ nin i bé bo'n `yo kun nan ɔ ´ukɛ i man Izraɛl wunmuan'n ɔ yo i liɛ.

¹³ David tɛli su kɛ: «N tili, e nin wɔ é bo'n ɔ wa yo kun. Sa kunngba yɛ n ´usa wɔ kɛ a yo-ɔ, sɛ a nian fa-man Sail i wa Mikal nian blɛ-man min'n, nán min nyinma wun wɔ.»

¹⁴ David sunmannin sran Sail i wa Is-Bosɛt sin kɛ be se i kɛ ɔ fa David i yi Mikal blɛ i, afin ɔ fali Filistifuɛ'm be yasua lika'n i ti kplo ya yɛ ɔ fa jɛli i-ɔ.

¹⁵ Yɛ Is-Bosɛt man be ko fɛli i i wun Paltiɛl sa nun bali-ɔ. Paltiɛl ti Lais i wa.

¹⁶ Ɔ ´ba'n, i wun su i su. Bian'n sun lele juli Basirim. Yɛ Abnɛr seli i kɛ: «Sa ɔ́ sin kɔ.» Nan ɔ'a sɛ i sin.

¹⁷ Abnɛr kannin ndɛ kleli Izraɛl kpɛnngbɛn mun. Ɔ seli be kɛ: «Amun waan David sie amun nán ndɛ-ɔ.

¹⁸ Amun `fɛ i sie famiɛn siɛn'n, afin Anannganman seli kɛ: ‹Min sufuɛ David yɛ n yo man ɔ ´de Izraɛl b'ɔ ti min nvle'n Filistifuɛ mun nin be kpɔfuɛ'm be kwlaa bé sa nun-ɔn.› »

¹⁹ Abnɛr kannin ndɛ kunngba'n kleli Bɛnzamɛnfuɛ'm be wie. I sin ɔ ɔli Ebrɔn nan ɔ'a ko se David kɛ ɔ nin Izraɛlfuɛ mun, nin Bɛnzamɛnfuɛ'm be kokoli yalɛ be nuan sɛli bé wun.

²⁰ Kɛ Abnɛr ´ko wun David wun Ebrɔn lɔ'n, ɔ nin sran ablaɔn yɛ be ɔli-ɔ. David siesieli cɛn dilɛ kun, ɔ man be tɔnnin like kpanngban nan ɔ nin Abnɛr nin i sran'm b'a di.

²¹ Abnɛr seli David kɛ: «Nannan, man min atin man n wɔ n ko yia Izraɛlfuɛ'm be kwlaa nan be su wɔ su. Man be nin wɔ be nuan yo kun, nan sie be kɛ a klo'n sa.» Yɛ David mannin Abnɛr atin man ɔ ɔli klanman.

Zoab kunnin Abnɛr

²² I sin b'ɔ ´cɛ kan'n, Zoab nin David i sonja'm be fin alɛ wie kunlɛ be bali. Be nyannin be kpɔfuɛ'm bé bo ninnge kpanngban kpa. Kɛ ɔ ´yo sɔ'n, wuun Abnɛr nun-man Ebrɔn lɛ kun, afin David mɛnnin i atin man ɔ ɔli klanman.

²³ Kɛ Zoab nin i sonja'm be juli lɛ'n, Zoab tili i kɛ Nɛr i wa Abnɛr ɔ wa wunnin famiɛn'n i wun, nan famiɛn'n yacili i nun ɔ ɔli klanman.

²⁴ Yɛ Zoab ko toli famiɛn nin-ɔn. Ɔ seli i kɛ: «?Nga a yoli i lɛ'n, i bo yɛlɛ onin? ?Kɛ Abnɛr wa toli wɔ'n, ɔ yo sɛ ti yɛ a yacili i nun ɔ ɔli sa-a?

²⁵ A si Nɛr i wa Abnɛr. Ɔ lakalɛ yɛ ɔ bali-ɔ. Ɔ bali kɛ ɔ ´si lika nga a kɔ'n ɔ nin like nga a yo'n.»

²⁶ Kɛ Zoab fin famiɛn'n sin fiteli'n, ɔ sunmannin sran Abnɛr sin. Be ko toli i Sira nzue gbo'n wun lɔ. Be man ɔ sɛli i sin. David si-man nun.

²⁷ Kɛ Abnɛr juli Ebrɔn lɛ'n, Zoab flɛli i klɛ nun klɔ'n i anuan'n nun lɔ. Ɔ yo kɛ wuun ɔ ´kan ndɛ kle i sa. Yɛ bi! Yɛ ɔ wɔli i klun tokofi-ɔ. Ɔ kunnin i sieli i niaan bian Azaɛl osu.

²⁸ Kɛ David tili'n, i waan: «Anannganman kwla bu-man min nin min nvlefuɛ mun e fɔ le Nɛr i wa Abnɛr i wie'n ti.

²⁹ Zoab nin i si awlo'n yɛ ɔ bu be fɔ-ɔ. Man loliɛfuɛ, annzɛ kokowefuɛ, annzɛ kpɔnman nun trafuɛ, annzɛ sran b'ɔ ´wu alɛ nun, annzɛ sran bɔ awe kun i'n, ɔ tran Zoab i osu'n nun tititi.»

³⁰ Sa ti bɔ Zoab nin Abisai be kunnin Abnɛr'n, yɛlɛ be niaan Azaɛl b'ɔ kunnin i Gabaɔn alɛ'n nun'n.

³¹ David seli Zoab nin sran nga be o i wun lɛ'n be kɛ: «Amun `titi amun wun tralɛ'm be nun, amun `wla bajɛ tralɛ. Amun `sun Abnɛr.» Famiɛn David suli fuɛn'n su.

³² Be sieli Abnɛr Ebrɔn lɔ. Famiɛn'n tikeli i ti sunnin Abnɛr i asieliɛ'n su. Sran'm be kwlaa be sunnin wie.

³³ Famiɛn'n kpɛli Abnɛr i wie'n su jue. I waan: «Ee! ?Ɔ yo sɛ ti yɛ Abnɛr wuli kɛ sran kunfuɛ wie sa-a?

³⁴ B'a ci-man ɔ́ sa'n, b'a wla-man ɔ́ ja jrɔkɔ, kpɛkuun a wuli kɛ sran bɔ ɔ'a tɔ sa tɛ yofuɛ'm be afiɛn bɔ be fu i nun be kun i'n sa.»

³⁵ Yɛ sran'm be sunnin Abnɛr ekun-ɔn. I sin be ko mannin David aliɛ kɛ ɔ di. Kɛ ɔ ´yo sɔ'n, wuun wia'n tɛ o nun. Yɛ David tali nda seli kɛ: «Sɛ n di kpaun annzɛ sɛ like uflɛ kan min nuan nan sɛnzɛ'n ɔ'a tɔ'n, man Nyanmiɛn wun min.»

³⁶ Kɛ sran'm be wunnin sa sɔ'n, be klun jɔli su. I kpa'n bɔ sa nga famiɛn'n yoli'n, i kwlaa yoli sran'm be klanman.

³⁷ Le kun sɔ'n nun'n, sran sɔ'm be kwlaa, ɔ nin Izraɛlfuɛ'm be kwlaa be sili kɛ nán famiɛn'n yɛ i waan be kun Nɛr i wa Abnɛr-ɔ.

³⁸ David seli i mantanfuɛ'm be kɛ: «?Amun si-man kɛ Izraɛl mɛn'n nun kpɛnngbɛn kun b'ɔ ti sran dan yɛ ɔ'a wu ndɛkɛn lɛ-ɔ?

³⁹ B'a sie min famiɛn sɔ, sanngɛ mín sa'n nian tin-man. E nin Zɛriza i mma mun e sɛ-man. Man Anannganman bɔbɔ yɛ ɔ fa sran ng'ɔ yo sa tɛ'n i nuan akatua'n mɛn i-ɔ.»