2 Samiɛl 23 - NYANMIƐN NDƐ'N 1998

David i ndɛ kasiɛn'n

¹ Izai i wa David ɔ ti sran b'ɔ nyannin nyrun, ɔ ti sran bɔ Zakɔb i Nyanmiɛn'n kpɛli i kɛ ɔ yo famiɛn, yɛ ɔ ti sran b'ɔ ti Izraɛl jue fɛfɛ'm be kpɛfuɛ. I nuan ndɛ kasiɛn'n yɛ:

² «Anannganman i Wawɛ'n su mín bo kɛ n `kan ndɛ. Ɔ fɛ i ndɛ'n wla mín nuan.

³ Izraɛl Nyanmiɛn'n ijɔli. Nyanmiɛn b'ɔ ti kɛ Izraɛl i yɛbuɛ'n sa'n b'ɔ talo i'n, ɔ seli min kɛ: ‹Sran ng'ɔ sie sran mun'n, sɛ ɔ ti nanwlɛfuɛ'n yɛ sɛ i nyin yi min'n,

⁴ ɔ ti kɛ nglɛmun wia b'ɔ ´fite'n, wuun nyanmiɛn ble'n nun-man lɛ'n sa'n. Ɔ kpaja weiin. Kɛ nzue'n ɔ'a tɔ ɔ'a kpɛ'n, i sɔ wia liɛ'n yɛ man ijre nga be o asiɛ'n bo'n be fu-ɔ.›

⁵ Kɛ Nyanmiɛn nin min awlo'n be nanti sɔ-ɔ. Ɔ tali min nda kun b'ɔ lɛ-man awieliɛ. Nda sɔ'n ti weiin, i bɔbɔ ɔ nian su. Ɔ de min, like kwlaa nga n kunndɛ'n, ɔ yo man min.

⁶ Klunwifuɛ'm be liɛ'n, be kwlaa be ti kɛ owie bɔ be kpɛ to yi i blo'n sa, be fa-man bé sa be trɛ-mɛn i.

⁷ Kɛ be ´kɛn i'n, be fa blalɛ annzɛ cua waka. Be fa yi i sin nun, yɛ i kwlaa'n yra.»

David i sonja kpakpa mun

⁸ David i sonja kpakpa'm be dunman be yɛ. Zɔsɛb-Basebɛt b'ɔ ti Takɛmɔnfuɛ'n, ɔ ti safunyrɛn nsan'n bé su kpɛn. Kɛ ɔ cuɛnnin i cua'n kpɛ kunngba sa'n, ɔ kunnin sran ya mɔcuɛ.

⁹ Zɔsɛb-Basebɛt i sin liɛ'n yɛlɛ Asosi i anunman'n bɔ be flɛ i kɛ Eleazar'n, Dɔdo i wa-a. Safunyrɛn nsan nga be ukali David be nin Filistifuɛ'm be kunnin'n, be nun kun-ɔn. Kɛ ɔ ´yo sɔ'n, wuun Izraɛl alɛ kunfuɛ'm b'a cuɛn bé wun b'a ɔ kpɔlɛ'm bé su lɔ.

¹⁰ Yɛ Eleazar jasoli-ɔ, ɔ kunnin Filistifuɛ mun lele i sa'n nyɛnnin i wun ɔ man ɔ kwla yaci-man tokofi'n nun kun. Le kun sɔ'n, Anannganman deli Izraɛlfuɛ mun dan. Sran'm be sa bé sin Eleazar wun lɛ, be nga be wuli'n bé bo ninnge i falɛ ngunmin ti.

¹¹ Eleazar i sin liɛ'n yɛlɛ Agie b'ɔ fin Arar'n i wa Sama. Filistifuɛ'm be yiali Lesi kan lanti fie kun o lɛ'n. Izraɛlfuɛ'm be wanndili be nyrun,

¹² sanngɛ Sama jrannin fie'n i afiɛn lɛ, ɔ nin Filistifuɛ'm be kunnin, nan ɔ'a fuan be fie nun. Anannganman deli Izraɛlfuɛ mun dan.

¹³ Ble kpɛlɛ blɛ'n nun'n, kpɛnngbɛn ablasan be nun nsan be wa toli David Adilam yɛbuɛ buɛ'n nun lɛ. Kɛ ɔ ´yo sɔ'n, wuun Filistifuɛ'm be sonja akpasua wunmuan kun b'a kpɛ be ngblaliɛ Rɛfafuɛ'm be kongo'n nun lɛ.

¹⁴ I blɛ sɔ nun'n, wuun David o i fiawlɛ bɔ be sili i wun'n nun, yɛ kusu wuun Filistifuɛ'm be akpasua wunmuan kun b'a fa Bɛtleɛm'n.

¹⁵ Kpɛkuun David nyin a tran like kun su, yɛ i waan: «?Wan yɛ ɔ ´ko sa nzue gbo ng'ɔ o Bɛtleɛm anuan'n nun lɔ'n i nun nzue'n wie man n nɔn-ɔn?»

¹⁶ Sonja kpakpa nsan sɔ'm be wluli Filistifuɛ'm be ngblaliɛ nun lɔ. Be ko sali Bɛtleɛm lɔ anuan'n nun lɔ nzue gbo'n i nun nzue'n wie, be fa blɛli David. Sanngɛ David waan ɔ nɔn-man. Ɔ guɛli i ase mannin Anannganman.

¹⁷ I waan: «Anannganman, n lɛ-man atin n nɔn-man, afin nzue nga ti kɛ be nga be klɛnnin bé wun mannin wie'n be ɔli i salɛ'n be mmoja sa.» Ɔ'a nɔn-man nzue sɔ'n. Yakpa like nga sonja kpakpa nsan sɔ'm be yoli'n yɛ ɔ o lɛ-ɔ.

¹⁸ Zɛriza i wa Zoab i niaan Abisai'n ti sran ablasan'm be akpasua kun sɔ'n bé su kpɛn. Le kun ɔ fɛli i cua'n wɔwɔli be kpɔfuɛ'm be nun sran ya nsan nan ɔ'a kun be. Be nsan'n be nun'n, ɔ nyannin dunman kpa.

¹⁹ Ɔ nyannin nyrun trali be kwlakwla. Ɔ yoli bé kpɛn sanngɛ ɔ'a ju-man sran nsan klikli'm be nun.

²⁰ Zɛozada i wa Bɛnaza b'ɔ fin Kabzeɛl bɔ i nannan ti sonja kpa kun'n, laa i kusu yoli yakpa like sunman. I yɛ ɔ kunnin Moab sonja'm be nun kpakpa nnyɔn nga be lɛ wunmiɛn kɛ asɔmɔli sa mun nin-ɔn. Le kun'n ayrɛ blɛ nun'n, kɛ like wie b'ɔ fin nyanmiɛn su lɔ gua minndi-minndi fuaii kɛ nyanmiɛn ufue fitafita'n sa ɔ ´gua'n, ɔ jrali nzue gbo kun nun nan ɔ'a kun asɔmɔli kun.

²¹ Ɔ kunnin Eziptfuɛ sroesroe kun ekun. Cua o Eziptfuɛ sɔ'n i sa nun, Bɛnaza kusu'n, waka ɔ o i sa nun yɛ ɔ nin i ɔli kunlɛ nin-ɔn. Ɔ deli Eziptfuɛ sɔ'n i cua'n i sa nun, nan ɔ'a fɛ i bɔbɔ i cua sɔ'n ɔ'a kun i.

²² Zɛozada i wa Bɛnaza i yakpa like b'ɔ yoli'n yɛ ɔ o lɛ-ɔ. Ɔ nyannin dunman sonja kpakpa nsan'm be nun.

²³ Ɔ nyannin nyrun trali sran ablasan mun, sanngɛ ɔ'a ju-man sonja nsan klikli'm be nun. David fɛ i sieli i sonja nga be niɛn i su'n be nun.

²⁴ Be nga be o yɛ'n, be o sran ablasan'm be nun: Zoab i niaan bian Azaɛl, nin Dɔdo i wa Ɛlkanan, ɔ fin Bɛtleɛm,

²⁵ nin Sama, ɔ fin Arɔd, nin Elika, ɔ fin Arɔd,

²⁶ nin Elɛz, ɔ fin Pelɛt, nin Ikɛs i wa Ira, ɔ fin Tekoa,

²⁷ nin Abiezɛr, ɔ fin Anatɔt, nin Mɛbinai, ɔ fin Isa,

²⁸ nin Zalmɔn, ɔ fin Asɔak, nin Maarai, ɔ fin Nɛtofa,

²⁹ nin Baana i wa Elɛb, ɔ fin Nɛtofa, nin Ribai i wa Itai, ɔ fin Gibea, ɔ ti Bɛnzamɛn osu nunfuɛ,

³⁰ nin Bɛnaza, ɔ fin Piratɔn, nin Idai, ɔ fin Gaas-Naale,

³¹ nin Abi-Albɔn, ɔ fin Bɛt-Araba, nin Azmavɛt, ɔ fin Barsɔm,

³² nin Eliasba, ɔ fin Saalbɔn, Bɛne-Zasɛn i mma'm be nun kun-ɔn, nin Zonatan,

³³ nin Sama, ɔ fin Arar, nin Sarar i wa Asiam, ɔ fin Arar,

³⁴ nin Asasbai i wa Elifelɛt, ɔ ti Maaka bian kun i anunman, nin Asitɔfɛl i wa Eliam, ɔ fin Gilo,

³⁵ nin Ɛzrai, ɔ fin Karmɛl, Parai, ɔ fin Arab,

³⁶ nin Natan i wa Zigeal, ɔ fin Sɔba, nin Bani, ɔ ti Gad akpasua sufuɛ,

³⁷ nin Zelɛk, ɔ ti Amɔnfuɛ, nin Naarai, ɔ fin Beerɔt, ɔ ti Zɛriza i wa Zoab i alɛ ninnge nun trafuɛ,

³⁸ nin Ira, ɔ ti Zetɛr osu nunfuɛ, nin Garɛb, ɔ ti Zetɛr osu nunfuɛ,

³⁹ nin Iri, ɔ ti Ɛtfuɛ. Be kwlaa'm be ti ablasan-nin-nso.