2 Samiɛl 22 - NYANMIƐN NDƐ'N 1998

David lali Nyanmiɛn ase

¹ Kɛ Anannganman deli David i kpɔfuɛ'm be kwlaa, ɔ nin Sail be sa nun'n, kpɛkuun David toli jue mɛnmɛnnin i.

² I waan: «Anannganman ti kɛ yɛbuɛ sa, yɛ n talo i-ɔ, ɔ ti min sasafuɛ, yɛ ɔ ti min defuɛ.

³ Min Nyanmiɛn'n ti kɛ yɛbuɛ sa, yɛ n talo i-ɔ, i nun yɛ n fia-a. Ɔ ti kɛ nyrɛn sa, i nun yɛ n nyan wunmiɛn-ɔn, i yɛ man n fite nun-ɔn. Ɔ ti min fiawlɛ dan ɔ man sa nyan-man min. Ee min Defuɛ! A de min sran wlɛfuɛ'm bé sa nun.

⁴ N kpan n se kɛ: ‹Manmanlɛ'n ti Anannganman liɛ,› kpɛkuun m'an nyan mín ti min kpɔfuɛ'm bé sa nun.

⁵ Wie'n sin yia min kɛ nzue b'ɔ bo'n sa. Ɔ wlanwlan min. Ɔ ti kɛ nzue ba b'ɔ su kpalo like'n sa, kɛ ɔ ´ba'n, wuun ɔ ´saci ninnge mun.

⁶ Blɔlɔ'n i nyanman'n ɔ sin yiali min, wie'n ɔ fuli min nun, ɔ toli i tɛ'n guali min su.

⁷ I nun bɔ n wo nyrɛnnɛn nun'n, n kpan flɛli Anannganman, n kpan flɛli min Nyanmiɛn'n. I kusu kɛ ɔ o i famiɛn sua'n nun lɔ'n, ɔ tili min aniɛn'n. Min kpanlɛ'n guɛli i su nun.

⁸ Kpɛkuun asiɛ wunmuan'n nin nyanmiɛn'n b'ɔ la nglo lɔ plaii'n be su keje, afin Anannganman fali ya dan.

⁹ Wɛnsrɛn fin Anannganman i bue nun fiteli. Sin b'ɔ di ninnge mun kɔlikɔli'n fin i nuan nun fiteli. Sɛnmlɛn ba nyannyannyan o sin sɔ nun.

¹⁰ Yɛ Anannganman kannin nyanmiɛn su lɔ'n i ase-ɔ, yɛ ɔ jrali-ɔ. I ja bo'n ti ble tritritri kɛ nzue ɔ'a mlan sa.

¹¹ Ɔ fuli anz'm be nun kun su nan ɔ'a tu. Be ´wun i-ɔ, ɔ yo kɛ aunngban'n lɛ ndɛwa nan ɔ ti su ɔ su ba sa.

¹² Ɔ fali aosin kɛtɛli i wun kɛ tannin sua yɛ ɔ'a kplan sa. Like'n ti kɛ nyanmiɛn ble'n sa, ɔ ti kɛ nzue bɔ ɔ'a mlan tritritri'n sa, ɔ fa kɛtɛli i su.

¹³ Like kun kpaja weiin kpa dun mmua i nyrun, sɛnmlɛn mma nyannyannyan fin nun fite.

¹⁴ Anannganman man nyanmiɛn'n kplali. Nyanmiɛn'n i nɛn'n tɛli kekle kpa nglo mmua lɔ.

¹⁵ Kɛ ɔ toli ta mma'n sa'n, min kpɔfuɛ'm be bo sanndili. Kɛ ɔ man nyanmiɛn'n kpa sin sa'n, be wanndi sa.

¹⁶ Kɛ Anannganman ´wlanwlan be'n, kɛ ɔ ´fitɛ i bue nun bɔ i nun aunngban'n ´fite'n, kpɛkuun jenvie'n nzue'n ɔ'a wie nun, be nyin tɛ i bo lɔ ninnge mun, kpɛkuun asiɛ'n i ase wlawlɛ'n ɔ'a fite su.

¹⁷ Ɔ jrannin nglo lɔ toli i sa'n blali min wa, nan ɔ'a yi min nzue dan b'ɔ mɛnnin min'n i nun ɔ'a fite.

¹⁸ Ɔ deli min min kpɔfuɛ sroesroe'm bé sa nun. Ɔ deli min min kpɔfuɛ bɔ be fanngan'n tra min liɛ'n bé sa nun.

¹⁹ I nun bɔ n wo nyrɛnnɛn nun'n, n kpɔfuɛ'm be wa fuli min nun, sanngɛ Anannganman suannin mín bo.

²⁰ Ɔ yili min mianlɛ nun fiteli. Klolɛ b'ɔ klo min'n ti, ɔ deli min.

²¹ Sa ti bɔ Anannganman yoli min kpa'n yɛlɛ kɛ n kpɔci-mɛn i, sa tɛ bɔ n yo-man'n i ti yɛ ɔ nian min nyrun nin-ɔn.

²² Afin n fa Anannganman i atin'n su seiin, m'an fɔn-man min Nyanmiɛn'n i wun.

²³ N fɛ i ndɛ'm be kwlaa n sie. I mmla'm be kpɔci-man min.

²⁴ Ɔ nyan-man min wun ndɛ fi kan-man, n nian mín wun su kɛ ɔ yo nan m'an yo-man sa tɛ'n ti.

²⁵ Kɛ n kpɔci-man Anannganman'n, kɛ bɔ n ti saun i nyrun'n ti'n, ɔ nian min nyrun.

²⁶ Sran ng'ɔ ti sran ndɛnman su'n, a nin i be nanti ye. Sran ng'ɔ ti kpa'n, a yo i kpa.

²⁷ Sran ng'ɔ yo-man sa tɛ'n, a yo-mɛn i tɛ, sanngɛ sran nga i waan sa tɛ'n yɛ ɔ ´yo'n, a nin i be lɛ i.

²⁸ Sran nga be kan bé wun ase'n, a de be nvle'n. Yɛ be nga be tu bé wun'n, a kan be ase.

²⁹ Anannganman, a ti kɛ kannin sa, a kpaja min nyrun aosin'n nun.

³⁰ Wɔ yɛ man min nin min kpɔfuɛ mun e kwla kun-ɔn. Min Nyanmiɛn, wɔ yɛ man n tu tra klɔ kun b'ɔ o sa'n i wun talɛ nin-ɔn.

³¹ Nyanmiɛn'n i atin'n ti kpa ngboko. I nuan nun ndɛ mun'n, fiɛn nun-man bé wun. Be nga be fa be wla guɛ i su'n ɔ ti kɛ be nyrɛn sa.

³² Anannganman kunngba cɛ yɛ ɔ ti Nyanmiɛn-ɔn. E Nyanmiɛn'n i kunngba cɛ yɛ ɔ ti kɛ yɛbuɛ sa, yɛ e talo i-ɔ.

³³ Nyanmiɛn ti min sasafuɛ dan. Ɔ dun mmua min nyrun atin'n seiin'n su.

³⁴ Anannganman man min wun yo mmlɛ kɛ flete sa. Ɔ fa min sie oka'm be ti su.

³⁵ I yɛ ɔ kle min alɛ kunlɛ-ɔ. Ɔ man n cuɛn ta'm be nun kekleke-ɔ, ɔ yo ye.

³⁶ Anannganman, a ti kɛ nyrɛn sa, a sasa min, yɛ a de min. Ɔ klun-ufue'n ti man min dunman'n fu.

³⁷ Wɔ man min wun yo mmlɛ. I ti man n ja'n kpɛnkpɛn-man cucu.

³⁸ N su n kpɔfuɛ'm bé su, n fuan be, n nunnun be. Sɛ n nian nunkun-man be'n, n nian sa-man n sin.

³⁹ N nunkun be, n kpɛkpɛ be nun. Be kwla jaso-man kun. Be tɔ, yɛ n tiatia bé su.

⁴⁰ Wɔ man min alɛ kunlɛ'n i wun fanngan. Be nga be kunndɛ kɛ be ´kun min'n, a yo man be tɔ mín bo lɛ.

⁴¹ A man min kpɔfuɛ'm be wanndi min bo. Yɛ n kun be nga be klo-man min sa'n mun.

⁴² Be nian-nian, be wun-man sran fi b'ɔ ´de be-ɔ. Be kpan flɛ Anannganman, ɔ tɛ-man bé su.

⁴³ N nunkun be man be yo kɛ asiɛ wun ndutre sa. N tiatia bé su kɛ atin nun nnɔtiɛ'n sa.

⁴⁴ A de min min nvlefuɛ'm bɔ b'a jaso mín wun'n bé sa nun. Wɔ man n tɛ sie nvle mun. Sran nga n si-man be'n, be su min.

⁴⁵ Aofuɛ'm be manman min, kɛ n ´uke mín nuan'n cɛ'n, wuun be su yo like nga min waan be yo'n.

⁴⁶ Aofuɛ'm b'a wie kpɔnzɔ. Kɛ be fin bé fiawlɛ'm be nun ´fite'n, bé usu sa tututu.

⁴⁷ Man Nyanmiɛn'n tran lɛ tititi o. N la Anannganman b'ɔ ti kɛ yɛbuɛ sa'n bɔ i yɛ n talo i i ase! Man Nyanmiɛn b'ɔ ti kɛ yɛbuɛ sa'n b'ɔ de mín'n, i dunman'n yo dan.

⁴⁸ Nyanmiɛn'n yɛ ɔ tu min klunngbɔ nin-ɔn. I yɛ ɔ kwla nvle mun man min-ɔn.

⁴⁹ Anannganman, wɔ yɛ man min kpɔfuɛ'm be nyan-man min-ɔn, wɔ yɛ man n kwla be-ɔ. A de min sran wlɛfuɛ'm bé sa nun.

⁵⁰ I sɔ'n ti, wɔ Anannganman, m ´manman wɔ mɛnmɛn'm be nunfuɛ'm be nyrun. N ´to jue m ´manman wɔ dunman'n .

⁵¹ Anannganman de famiɛn ng'ɔ sieli'n. Ɔ yo sran ng'ɔ sieli i famiɛn'n i ye titi. Ɔ yo David nin i osu nunfuɛ'm be ye tititi.»