2 Samiɛl 2 - NYANMIƐN NDƐ'N 1998

B'a fa David b'a sie Zida famiɛn Ebrɔn lɔ

¹ Kɛ ɔ yoli sɔ'n, David usali Anannganman kɛ: «?N wɔ Zida klɔ'm be nun kun su?» Anannganman waan: «Ɛɛn, kɔ.» David usali kɛ: «?Ninfan yɛ n wɔ-ɔ?» Anannganman tɛli su kɛ: «Kɔ Ebrɔn.»

² Yɛ David nin i yi nnyɔn'm be ɔli-ɔ. Kun yɛlɛ Asinɔam ng'ɔ fin Zizreɛl'n, yɛ kun ekun yɛlɛ Abigail b'ɔ ti Nabal ng'ɔ fin Karmɛl'n i angboti'n.

³ Ɔ ´kɔ'n, ɔ nin i sin sran mun nin be awlofuɛ mun yɛ be ɔli-ɔ. Be ko trannin Ebrɔn asa'n su.

⁴ Yɛ Zidafuɛ'm be wa fali David sieli i Zida akpasua'n su famiɛn-ɔn . Kɛ David tili i kɛ Galaad-Zabɛsfuɛ'm be sieli Sail'n,

⁵ ɔ sunmannin sran kɛ be ko la be ase. I waan be `se be kɛ: «Nɛnnɛn nga amun dili amun min Sail'n, i sielɛ bɔ amun sieli i'n ti'n, man Anannganman yo amun ye.

⁶ Man Anannganman yo amun wun sa ye. Yɛ n bɔbɔ kusu n ´yo amun kpa sa sɔ'n bɔ amun yoli'n ti.

⁷ Nan kusu, amun `jran kekle, amun `yo yasua sran mun. Amun min Sail wuli, yɛ Zida akpasua'n sufuɛ'm b'a kpa min kɛ n yo be famiɛn.»

Is-bosɛt yɛ be kpɛli i kɛ ɔ yo Izraɛl famiɛn nin-ɔn

⁸ Nɛr i wa Abnɛr b'ɔ ti Sail i sonja'm bé su kpɛnngbɛn'n, ɔ fali Sail i wa Is-Bosɛt ɔli Maanaim.

⁹ Ɔ ko sieli i Galaad akpasua'n, nin Asɛr akpasua'n, nin Zizreɛl akpasua'n, nin Efraim akpasua'n, ɔ nin Bɛnzamɛn akpasua'n, be su famiɛn. Sɛ be ´kwla se'n, ɔ ti Izraɛl wunmuan'n su famiɛn.

¹⁰ Kɛ Sail i wa Is-Bosɛt ´tran Izraɛl famiɛn bia'n su'n, wuun ɔ lɛ afuɛ ablanan. Ɔ trannin bia'n su afuɛ nnyɔn, sanngɛ i blɛ sɔ nun'n, Zida akpasua'n wo David sin.

¹¹ David yoli Zida famiɛn afuɛ nso anglo nsiɛn. Ebrɔn lɔ yɛ ɔ trannin-ɔn.

Zidafuɛ'm be nin Izraɛlfuɛ'm be alɛ bɔ be kunnin i Gabaɔn lɔ'n

¹² Nɛr i wa Abnɛr nin Sail i wa Is-Bosɛt i sonja mun, alɛ kunlɛ ti be fɛ i Maanaim lɔ be ɔli Gabaɔn.

¹³ Zɛriza i wa Zoab nin David i sran'm be kusu be tuli bé bo be bue liɛ'n su lɔ. Be akpasua nnyɔn'm be ko yiali Gabaɔn fɛtɛ'n nuan lɔ. Bue kun wo fɛtɛ'n i bue kun su. Bue kun'n kusu o bue kun lɔ.

¹⁴ Yɛ Abnɛr seli Zoab kɛ: «Man gbanflɛn'm be kun man e nian.» Zoab waan: «M'an ti, man be yo.»

¹⁵ Yɛ be jasoli-ɔ. Bɛnzamɛnfuɛ'm be nin Sail i wa Is-Bosɛt be sran'm be ti blu-nin-nnyɔn, yɛ David kusu i sran liɛ'm be ti blu-nin-nnyɔn wie.

¹⁶ Nga sɔ i wiengu'n i ti'n, i wiengu'n kusu sɔ i liɛ'n, kpɛkuun b'a fa tokofi b'a wɔ be wiengu ku nvɛn'n nun. Ɔ man be kwlaa be tɔli likawlɛ. Be flɛli Gabaɔn lika sɔ'n kɛ: Yɛbuɛ Yɛbuɛ lika.

¹⁷ Le kunngba sɔ'n nun be kunnin alɛ'n kekle kpa. David i sonja'm be kwlali Abnɛr nin Izraɛlfuɛ mun.

¹⁸ Zɛriza i wa nsan mun, Zoab nin Abisai nin Azaɛl be o lɛ wie. Azaɛl kwla wanndi kpa kɛ wannzannin sa.

¹⁹ Ɔ suli Abnɛr su seiin ɔ'a nian-man bɛ su, ɔ'a nian-man fama su.

²⁰ Abnɛr kpɛli i nyin, ɔ usɛli i kɛ: «?Azaɛl, wɔ-ɔ?» I waan: «Ɛɛn, min-ɔn.»

²¹ Abnɛr seli i kɛ ɔ kpaci wɔ bɛ su annzɛ fama su, nan ɔ kun gbanflɛn'm be nun kun nan ɔ fɛ i sa nun ninnge mun. Azaɛl waan nán i yɛ ɔ ko kpaci-ɔ.

²² Abnɛr seli Azaɛl ekun kɛ: «Yaci mín su sulɛ'n, nán yo man n kun wɔ ngbɛn. Sɛ ɔ yo sɔ-ɔ, n su kwla-man ɔ niaan bian Zoab nyrun nian.»

²³ Azaɛl waan ɔ kɔ-man lika uflɛ. Yɛ Abnɛr kacili i cua'n i bue nuan'n i su nan ɔ'a fa wɔ i klun. Cua'n fiteli i wia sin lɔ. Azaɛl tɔli, ɔ kali i osu kunngba'n nun lɛ wuli. Be kwlaa nga be juli kan Azaɛl tɔli lɛ'n, be jrannin.

²⁴ Sanngɛ Zoab nin Abisai be suli Abnɛr su. Kɛ sɛnzɛ'n wa tɔ'n, be juli Gibea-Ama b'ɔ o Giak ndɛnman Gabaɔn aawlɛ flɛnnɛn'n i atin'n su'n.

²⁵ Bɛnzamɛnfuɛ'm be ko yiali Abnɛr wun lɛ, be kan bo nun akpasua kunngba. Be ko jrannin kpɔlɛ kun ti afiɛn.

²⁶ Yɛ Abnɛr flɛli Zoab-ɔ, nan ɔ'a se kɛ: «?Kɛ be fa tokofi'n kun sran sa'n, be de-man wunmiɛn mlɔnmlɔn? ?B'a de-man wunmiɛn-ɔn, awlaboɛ'n su yo-man dan? ?A su se-man ɔ sran'm be kɛ be jran, nan kɛ amun ´su amun niaan'm bé su cɔcɔcɔ sa?»

²⁷ Zoab tɛli i su kɛ: «N kan Nyanmiɛn! Sɛ a kan-man sɔ'n, wuun san lele ainman nglɛmun yɛ sonja'm be ´yaci be niaan'm be su sulɛ-ɔ.»

²⁸ Yɛ Zoab fitali awɛ'n nun nan i sonja'm b'a jran. Be yacili Izraɛlfuɛ'm be su sulɛ, yɛ alɛ'n wieli-ɔ.

²⁹ Kɔnguɛ sɔ'n Abnɛr nin i sran'm be sinnin lika kpɛtɛkplɛɛ'n nun, be kpɛli Zurdɛn'n nin Bitrɔn wunmuan'n nan b'a ɔ Maanaim.

³⁰ Zoab kusu, kɛ ɔ yacili Abnɛr su sulɛ'n, ɔ ko yiɛli i sonja mun. Sɛ b'a ka-man Azaɛl b'a wla-man David i sran'm be nun'n, sran blu-nin-ngwlan yɛ be nun-man lɛ-ɔ.

³¹ Sanngɛ David i sonja'm be kunnin Bɛnzamɛnfuɛ nin Abnɛr i sran'm be nun sran ya nsan sran ablesiɛn.

³² David i fuɛ'm be ko fali Azaɛl be ko sieli i i si i asieliɛ'n nun Bɛtleɛm lɔ. I sin Zoab nin i sran'm be nantili kɔnguɛ wunmuan'n, kɛ be ´ju Ebrɔn'n, wuun aliɛ'n ɔ'a cɛn.