2 Samiɛl 19 - NYANMIƐN NDƐ'N 1998

David sunnin Absalɔm

¹ Famiɛn'n i wun usuli i, kpɛkuun ɔ fuli klɔ'n wun talɛ'n su nglo sua'n su lɔ. Ɔ sunnin, ɔ ´nanti'n, wuun ɔ ´yi ngwlɛ se kɛ: «Mín wa Absalɔm ee, ɔ o mín wa, mín wa Absalɔm ee! ?Ɔ yo sɛ ti yɛ m bɔbɔ m'an wu-man nan w'a ka-man lɛ-ɔ? Cuekee, Absalɔm mín wa, mín wa.»

² Be wa kan kleli Zoab kɛ: «Famiɛn'n wo lɔ ´sun'n, wuun ɔ ´yi ngwlɛ Absalɔm ti.»

³ Ɔ man le kun sɔ'n, kwlalɛ bɔ be kwlali be kpɔfuɛ mun'n, ɔ kacili sɛ mannin sran'm be kwlaa. Afin be tili i kɛ famiɛn'n i wa'n i wie'n ti awlaboɛ'n ɔ'a kun i kpo.

⁴ Be ´sa be sin be ´ba klɔ'n, be fia kɛ sran wie bɔ b'a wanndi alɛ i bo nan nyannzuɛn kun be sa.

⁵ Famiɛn'n kusu, tannin kɛtɛ i nyrun'n, wuun ɔ ´kpan kpa: «Mín wa Absalɔm ee, Absalɔm mín wa, ɔo mín wa.»

⁶ Yɛ Zoab ko toli famiɛn'n i sua'n nun lɔ-ɔ. I waan: «Sran nga be deli wɔ, nin ɔ mma yasua mun, nin ɔ mma mmla mun, nin ɔ́ yi mun, ɔ nin ɔ soman mun'n, nian kɛ a gua bé nyin ase sa!

⁷ Afin a klo ɔ kpɔfuɛ mun, kpɛkuun a kpɔ ɔ klofuɛ mun. Ndɛkɛn w'a kle e kɛ wɔ alɛ kpɛn mun, ɔ nin ɔ sran'm be ti-man like fi ɔ nyrun. N wun i wlɛ kɛ sɛ e kwlaa'n e wuli yɛ Absalɔm kunngba kali lɛ'n, wuun i li yoli ɔ fɛ.

⁸ Nan yoo, jaso, fite nan ko gua ɔ sran'm be anwlɛn su nzue. Sɛ a ka sua'n nun wa'n, n kan Nyanmiɛn, sran fi su ka-man ɔ́ wun wa ndɛ kɔnguɛ nga. Ɔ man nyrɛnnɛn nga ɔ'a tɔ ɔ́ su'n kɛ ɔ fɛ i ɔ bakan nun lele b'ɔ ´fa ju ndɛ'n, sɛ be kɛn i kwlakwla sɔ'n bo nun'n, ɔ nin nyrɛnnɛn nga a wun i'n be su sɛ-man.»

⁹ Yɛ famiɛn'n wɔli ko trannin klɔ'n i anuan'n nun lɔ-ɔ. Sonja'm be tili i kɛ famiɛn'n ɔ'a ko tran klɔ'n i anuan'n nun lɔ. Yɛ be kwlaa be ko yiɛli i nyrun lɛ-ɔ. Kɛ ɔ ´yo sɔ'n, wuun Izraɛlfuɛ'm b'a wanndi b'a ɔ be tranwlɛ kunngun'm be nun.

Zidafuɛ'm be waan David wɔ Zerizalɛm

¹⁰ Izraɛl akpasua'n kwlaa su sran'm be ndɛ bɔ be kan'n yɛ, be waan: «Famiɛn David deli ye e kpɔfuɛ'm bé sa nun, ɔ deli ye Filistifuɛ'm bé sa nun. Yɛ Absalɔm ti yɛ ɔ wanndili-ɔ.

¹¹ Absalɔm kusu bɔ e fa sieli e famiɛn'n, ɔ'a ko wu alɛ'n nun. ?Yɛ nzu yɛ e su minndɛ nan y'a fa famiɛn David y'a sie i osu laa'n nun-ɔn?»

¹² David kusu toli Nyanmiɛn nyrun jranfuɛ Zadɔk nin Abiatar be ngaliɛ kɛ be usa Zida kpɛnngbɛn'm be kɛ: «?Ɔ yo sɛ ti yɛ amun ka siɛn m bɔ n ti amun famiɛn'n min sin salɛ ndɛ'n i kanlɛ'n nun-ɔn? Nga Izraɛlfuɛ kun nga'm be kwlaa be kan'n, famiɛn'n nin i awlofuɛ'm be tili.

¹³ ?Amun bɔ amun ti min niaan bɔ e nin amun kpaci-man'n, ɔ yo sɛ ti yɛ amun ka siɛn m bɔ n ti amun famiɛn'n min sin salɛ ndɛ'n i kanlɛ'n nun-ɔn?»

¹⁴ I sin David seli Zadɔk nin Abiatar be kɛ be `ko se Amaza kɛ: «E nin wɔ e kpaci-man. Sɛ m'an fa-man wɔ m'an sie-mɛn i alɛ su kpɛn Zoab i osu'n, nan w'a ka-man lɛ titi'n, man Nyanmiɛn wun min.»

¹⁵ David i ndɛ'm be jɔli Zidafuɛ'm be kwlaa be klun. Be kwlaa bé nuan yoli kun. Be toli famiɛn'n i ngaliɛ kɛ: «A nin ɔ sufuɛ'm be kwlaa amun `bla.»

¹⁶ Yɛ famiɛn'n fali atin nin-ɔn. Ɔ ko toli Zurdɛn'n. Zidafuɛ'm be bali Gilgal famiɛn'n i atin kpalɛ nan be ´fɛ i kpɛ nzue'n.

David man b'a kun-man Simɛi

¹⁷ Gera i wa Simɛi b'ɔ ti Bɛnzamɛn osu nunfuɛ'n, b'ɔ fin Basirim'n, ɔ kɛnnin i wun bali nan ɔ nin Zidafuɛ'm b'a ɔ David i atin kpalɛ.

¹⁸ Ɔ ´kɔ'n, ɔ nin Bɛnzamɛnfuɛ akpi, ɔ nin Ziba b'ɔ ti Sail i awlo'n nun gbanflɛn'n, ɔ nin Ziba i mma blu-nin-nnun, ɔ nin i sufuɛ ablaɔn mun yɛ be ɔli-ɔ. Be wanndi be kpɛli Zurdɛn'n be toli famiɛn'n lɔ.

¹⁹ Alie'n fali famiɛn'n i awlofuɛ mun kpɛli nzue'n. Kɛ famiɛn'n ɔ wa kpɛ i liɛ'n cɛ'n, kpɛkuun Simɛi bali wa kotoli i bo.

²⁰ Ɔ seli i kɛ: «Nannan, yaci, nán bu sa nga n yoli wɔ'n i akunndan kun. Fɔnlɛ nga n fɔnnin ɔ wun le kun nga a ´fin Zerizalɛm fite'n, nán bo su di jɔlɛ kun, nán fa sie ɔ klun.

²¹ Nannan, n si kɛ n yoli sa tɛ. Nannan, i ti kusu yɛ Zozɛf i awlo nunfuɛ'm be nun min yɛ m'an dun mmua m'an ba wɔ atin kpalɛ yɛ nin-ɔn.»

²² Yɛ Zɛriza i wa Abisai waan: «?Nan wuun, kɛ bɔ Simɛi boli sran nga Anannganman fɛ i sieli famiɛn i sannzan'n, be su kun-mɛn i?»

²³ Yɛ David waan: «?Zɛriza mma mun, amun li amun ndɛ o nun sɛ? ?Ɔ yo sɛ ti yɛ le nnyɔn nun amun nin mín bo sɛ-man nin-ɔn? ?Ndɛ cɛn nga nun be wa kun Izraɛlfuɛ kun? ?Nán ndɛkɛn yɛ m'an wun i sakpa kɛ n ti Izraɛl famiɛn-ɔn?»

²⁴ Yɛ famiɛn'n seli Simɛi kɛ: «A su wu-man.» Yɛ famiɛn'n tali nda-a .

David nin Mɛfibɔsɛt be nuan ɔ'a sɛ

²⁵ Sail i anunman Mɛfibɔsɛt kusu bali famiɛn'n i atin kpalɛ'n wie. Kɛ ɔ fin cɛn bɔ famiɛn'n wɔli'n lele b'ɔ ´fa sɛ i sin aunjuɛ nun'n, Mɛfibɔsɛt ɔ'a wunnzin-mɛn i ja, ɔ'a kpɛkpɛ-mɛn i akanza'n, yɛ ɔ'a kpu-mɛn i tralɛ mun.

²⁶ Kɛ ɔ juli Zerizalɛm famiɛn'n i nyrun lɛ'n, famiɛn'n usɛli i kɛ: «?Mɛfibɔsɛt, ɔ yo sɛ ti yɛ n ´kɔ bɔ w'a ɔ-man wie-ɔ?»

²⁷ Mɛfibɔsɛt waan: «Nannan, min sufuɛ'n yɛ ɔ lakali min-ɔn. Kɛ mín ja'n ti-man kpa'n ti'n, n waan n ´fa min aflunmun'n i wun ninnge mun n ´wlɛwlɛ i wun nan n ´fu su nan e nin wɔ e ´kɔ.

²⁸ Kpɛkuun ɔ ko kpɛli mín wun gblɛ kleli wɔ. Yɛ sanngɛ Nannan, a ti kɛ Nyanmiɛn i anz sa. Ɔ man nga a wun i'n, yo.

²⁹ Min nannan Sail i awlo'n nunfuɛ'm be nun kun nun-man lɛ bɔ ɔ'a yo-man kunlɛ like ɔ́ wun-ɔn. Sanngɛ a sɔli min nun yɛ ɔ waan min nin wɔ e `di like. ?Yɛ nguɛ like yɛ n usɛ ɔ́ sa nun ekun-ɔn?»

³⁰ Famiɛn'n waan: «Yaci ijɔlɛ beblebe'n, n waan a nin Ziba be `cɛ Sail i asiɛ'm be nun be `fa.»

³¹ Mɛfibɔsɛt waan: «Nannan, kɛ ɔli a sa ɔ́ sin a ba wɔ awlo aunjuɛ nun'n, sɛ bɔ Ziba fɛ i ngba'n, ngasi nun-man nun.»

David sili Barzilai wun ye

³² Barzilai b'ɔ ti Galaadfuɛ'n, ɔ fin Rɔgelim lele bali. Ɔ ko sunmannin famiɛn'n lele kpɛli Zurdɛn'n.

³³ Barzilai ti sran oke. Ɔ lɛ afuɛ ablaɔcuɛ, ɔ ti anyanbeunfuɛ kpa. Blɛ nga famiɛn'n dili Maanaim lɔ nun'n, i yɛ ɔ tɛli i-ɔ.

³⁴ Famiɛn'n seli i kɛ: «Bla e wɔ Zerizalɛm. N ´nian ɔ lika.»

³⁵ Barzilai waan: «?Nannan, n tɛ di le nnyɛ nguan nun bɔ man e nin wɔ e kɔ Zerizalɛm-ɔ?

³⁶ ?Min afuɛ ablaɔcuɛ yɛ ɔ o yɛ, n tɛ wun sa kpa nin sa tɛ'n be ngbaciɛ? ?Aliɛ nga n di'n, ɔ nin nzan nga n nɔn'n, n tɛ wun i fɛ? ?Jue tofuɛ bla annzɛ yasua'm be nɛn'n tɛ yo min fɛ? Nannan, nán n ko kle wɔ yalɛ ngbɛn.

³⁷ Zurdɛn'n cɛ yɛ e nin wɔ e ´kpɛ-ɔ. ?I kpa nin-ɔn, nguɛ li yɛ n yoli bɔ man a yo nga kwlaa man min-ɔn?

³⁸ Man min atin man n sa n sin n klɔ, man n wu n si nin n nin'm be asieliɛ'n wun lɔ. N wa Kimam yɛ. Nannan, man ɔ nin wɔ be wɔ. Like kwlaa nga a wun kɛ ɔ ti kpa'n, yo mɛn i.»

³⁹ Famiɛn'n waan: «Yoo, e nin Kimam e ´kɔ. Nga ɔ waan n yo mɛn i'n, n ´yo mɛn i. Like kwlaa nga a usa min'n, n ´fa man wɔ.»

⁴⁰ Sran'm be kwlaa be kpɛli Zurdɛn'n. Famiɛn'n kusu kpɛli Zurdɛn'n wie. Ɔ tɔli Barzilai nun nan ɔ'a yrɛ i nuan klanman ɔ'a mɛn i. Yɛ Barzilai sɛli i sin i tranwlɛ-ɔ.

⁴¹ Famiɛn'n wɔli Gilgal. Kimam ko sunmɛnnin i. Zidafuɛ'm be kwlaa, be nin Izraɛlfuɛ'm be bue nga o nglo lɔ'n be ukali famiɛn'n ɔ kpɛli Zurdɛn'n.

Zidafuɛ mun nin Izraɛlfuɛ'm be nuan kacilɛ

⁴² Yɛ Izraɛlfuɛ'm be wa toli famiɛn'n be usɛli i kɛ: «?Ɔ yo sɛ ti yɛ e niaan Zidafuɛ'm be fa wɔ yoli be liɛ nin-ɔn? ?Ɔ yo sɛ ti yɛ be nin wɔ, nin wɔ awlofuɛ mun, ɔ nin ɔ sran'm be kpɛli Zurdɛn nin-ɔn?»

⁴³ Yɛ Zidafuɛ'm be tɛli Izraɛlfuɛ'm bé su kɛ: «E nin i e mantan ti-ɔ. ?Ɔ yo sɛ ti yɛ ɔ yo amun ngasi-ɔ? ?I kpa'n, be waan famiɛn'n yɛ ɔ tali ye-ɔ, annzɛ kusu be waan ɔ cɛli e like?»

⁴⁴ Izraɛlfuɛ'm be tɛli be su kɛ: «Famiɛn'n ti e liɛ kpɛ blu tra amun, David ti e liɛ tra amun. ?Ɔ yo sɛ ti yɛ amun gua é nyin ase sɔ-ɔ? ?Nán e yɛ e dun mmua kannin e famiɛn'n i sin salɛ'n i wun ndɛ-ɔ?» Zidafuɛ'm be kɛnnin i kekle trali Izraɛlfuɛ mun.