2 Samiɛl 16 - NYANMIƐN NDƐ'N 1998

David nin Ziba

¹ Kɛ David fuli kpɔlɛ'n cɛ'n, kpɛkuun ɔ nin Ziba b'ɔ ti Mɛfibɔsɛt i gbanflɛn'n b'a yia. Aflunmun nnyɔn o i sa nun, yɛ trɔ sualɛ like o aflunmun'm bé sin. Aflunmun'm bé sin kpaun ya nnyɔn, nin vinyi mma kee sɔsɔwa ya, nin wawa nun waka mma ya, ɔ nin nzan kplo kun.

² Famiɛn'n usɛli i kɛ: «?A wa yo nga sɛ?» Ziba waan: «Aflunmun'm be ti a nin ɔ osufuɛ mun amun liɛ, amun `fu be su. Kpaun nin wawa nun waka mma'n be ti dilɛ liɛ, gbanflɛn'm be liɛ-ɔ. Nzan'n ti be nga aawlɛ flɛnnɛn'n nun nantilɛ'n ɔ man b'a fɛ'n be liɛ.»

³ Famiɛn'n waan: «?Yɛ ɔ min'n i wa'n wo nin?» Ziba tɛli famiɛn'n su kɛ: «Ɔ kali Zerizalɛm lɔ, afin i waan: ‹Ndɛ Izraɛlfuɛ'm be ´fa mín si i bia'n be ´man min.› »

⁴ Yɛ famiɛn'n seli Ziba kɛ: «N ´fa Mɛfibɔsɛt i ninnge'n kwlaa m man wɔ.» Yɛ Ziba waan: «N koto ɔ́ bo. Nannan, w'a nian min nyrun dan.»

Simɛi boli David sannzan

⁵ David juli Basirim lɛ, sran kun b'ɔ nin Sail i osufuɛ'm be awlobo ti kun'n wo lɛ. Be flɛ i kɛ Simɛi, Gera i wa-a. Ɔ fin lɛ fiteli, nan ɔ'a bo David sannzan.

⁶ Ɔ totoli famiɛn David nin i mantanfuɛ'm be yɛbuɛ. Kɛ ɔ ´yo sɔ wuun sran mun nin sonja wie'm be o famiɛn'n i fama su nin i bɛ su.

⁷ Simɛi kpɛli famiɛn'n i nzowa, ɔ boli i sannzan, ɔ seli kɛ: «Jaso wa kɔ! Jaso wa kɔ! Sran kunfuɛ, finfinfuɛ!

⁸ Sail i osufuɛ nga a kunnin be'n, be ti Anannganman ɔ'a bu wɔ fɔ. A deli bia'n i sa nun, yɛ Anannganman kusu ɔ'a fa bia sɔ'n ɔ'a man ɔ́ wa Absalɔm, yɛ a su wun nyrɛnnɛn yɛ, a nin i sɔ'n fata, nja b'ɔ ti sran kunfuɛ!»

⁹ Zɛriza i wa Abisai seli famiɛn'n kɛ: «?Alua fuɛn nga yɛ ɔ bo wɔ sannzan sa-a? Jran man n ko kpɛ i ti'n ke.»

¹⁰ Yɛ famiɛn'n waan: «?Zɛriza mma mun, amun li amun ndɛ o nun sɛ? Sɛ Anannganman ɔ'a se-mɛn i kɛ: ‹Ko bo David sannzan'n,› wuun ɔ kwla bo-man. ?Kɛ ɔ o lɛ'n, sran kun kwla se i kɛ: ‹?Ɔ yo sɛ ti yɛ a yo sɔ-ɔ?› »

¹¹ David kan kleli Abisai nin i mantanfuɛ'm be kɛ: «Kɛ m bɔbɔ n klun ba'n kunndɛ kɛ ɔ ´kun min'n, yɛ a ´se kɛ Bɛnzamɛnfuɛ. Amun `yaci i nun man ɔ bo min sannzan. Anannganman yɛ ɔ mɛnnin i i wun atin-ɔn.

¹² Sɛ nja, Anannganman ´wun min awlaboɛ'n nan ɔ ´fa min su sannzan'n kaci muae ´man min o.»

¹³ David nin i sran'm be ´kɔ'n, wuun Simɛi kusu ´sin oka'n i bue kun, ɔ nin David be afiɛn nun-man mmua. Ɔ ´kɔ wuun ɔ ´bo sannzan'n, wuun ɔ ´to famiɛn'n i yɛbuɛ'n, wuun ɔ ´tru ndutre'n.

¹⁴ Famiɛn'n nin i sran'm be kwlaa be ko juli Zurdɛn'n nuan , nan b'a de wunmiɛn lɛ.

Isai nin Absalɔm

¹⁵ Absalɔm nin Izraɛlfuɛ'm be juli Zerizalɛm. Asitɔfɛl su Absalɔm su wie.

¹⁶ Kɛ Isai b'ɔ ti Arkfuɛ, b'ɔ ti David i janvuɛ'n ko toli Absalɔm'n, ɔ seli i kɛ: «Nannan, man wie wla fi wɔ su o! Nannan, man wie wla fi wɔ su o!»

¹⁷ Yɛ Absalɔm usɛli i kɛ: «A si ɔ janvuɛ'n i wun ye klanman nja! ?Ɔ yo sɛ ti yɛ a nin ɔ janvuɛ'n b'a san-man nun kun-ɔn?»

¹⁸ Yɛ Isai tɛli Absalɔm su kɛ: «?Sran nga Anannganman nin sran nga be o yɛ'n, ɔ nin Izraɛlfuɛ'm be kwlaa be kpɛli i'n, nán i yɛ e nin i e san nun-ɔn? N ti sran sɔ'n i liɛ.

¹⁹ Kusu nán sran ngbɛn junman yɛ n ´di-ɔ. I wa'n yɛ n ´su i-ɔ. Sulɛ kunngba nga n fa suli ɔ si'n, yɛ n ´fa su wɔ-ɔ.»

Absalɔm nin i si David i soman mun be lali

²⁰ Absalɔm seli Asitɔfɛl kɛ: «Amun `wun amun wun nan amun `bu nga e ko yo'n i akunndan.»

²¹ Asitɔfɛl seli Absalɔm kɛ: «A nin ɔ́ si i soman ng'ɔ yacili be wa kɛ be nian sua'n su'n be `ko la. Kɛ a wɔ ɔ́ si i safle sɔ'n, bɔ Izraɛlfuɛ'm be ti'n, ɔ ´wla ɔ sinfuɛ'm be fanngan.»

²² Yɛ be siesieli tannin sua kun sua'n i ti su nglo lɔ-ɔ, nan Absalɔm nin i si i soman mun b'a la Izraɛlfuɛ'm be kwlaa be nyrun.

²³ I blɛ sɔ nun'n, afɔtuɛ kwlaa nga Asitɔfɛl man'n, be nian su be yo i kɛ Nyanmiɛn yɛ ɔ'a kan sa. I David o, i Absalɔm o, kɛ be nian Asitɔfɛl i afɔtuɛ'n be su sɔ-ɔ.