2 Samiɛl 15 - NYANMIƐN NDƐ'N 1998

Absalɔm waan ɔ ´de bia'n i si sa nun

¹ I sin b'ɔ la nun kan'n, Absalɔm kunndɛli i bɔbɔ i kakaklolo nin i nnɛn kpanngɔ mun. Yɛ ɔ fali sran ablenun kɛ be wanndi dun mmua i nyrun.

² Nglɛmun'n Absalɔm jaso ndɛ kpa'n. Ɔ ko jran atin nga be fa wlu klɔ'n nun'n i nuan lɛ. Sran kwlaa ng'ɔ lɛ ndɛ bɔ i waan ɔ ´ba nan famiɛn'n di mɛn i'n, Absalɔm flɛ i usɛ i kɛ: «?A fin é sɛ?» Sɛ sran'n tɛ i su kɛ Izraɛl akpasua nga sa su yɛ n fin'n,

³ kpɛkuun Absalɔm se i kɛ: «Ɔ ndɛ'n yo fɛ, sanngɛ sɛ a fa kɔ famiɛn'n i ja su lɔ'n, sran fi su jran-man ɔ́ sin.»

⁴ Absalɔm waan: «Nanwlɛ, sɛ be sie min mɛn'n su jɔlɛ difuɛ'n, sran kwlaa ng'ɔ lɛ ndɛ b'ɔ fata kɛ be di'n, sɛ ɔ ba mín ja su'n, n ´nian nun n ´kɛn i ndɛ'n kpa.»

⁵ Sɛ sran'n wunnge i wun lɛ nan ɔ koto i bo'n, ɔ trɛ i sa'n, kpɛkuun ɔ tɔ i nun.

⁶ Izraɛlfuɛ nga be ba kɛ famiɛn'n wa di be ndɛ man be'n, kɛ Absalɔm yo be kwlaa be sɔ-ɔ. Ɔ kacili Izraɛlfuɛ'm be anwlɛn'n.

⁷ I afuɛ nnan su'n, Absalɔm seli famiɛn'n kɛ: «Man min atin man n wɔ Ebrɔn n ko yia like nga n kan kleli Anannganman'n kɛ n ´yo n mɛn i'n i nuan.

⁸ Kɛ n wo Gesir b'ɔ o Siri mɛn'n nun lɔ'n, n seli Anannganman kɛ: ‹Sɛ wɔ man n sa n sin Zerizalɛm'n, n ´yi tɛ m man wɔ.› »

⁹ Famiɛn'n waan: «Kɔ, atin la nun.» Yɛ Absalɔm ɔli Ebrɔn-ɔn.

¹⁰ Yɛ Absalɔm sunmannin i sran mun nvialiɛ nun Izraɛl akpasua'm be kwlaa be su-ɔ. Ɔ seli be kɛ: «Sɛ amun ti awɛ'n i bolɛ'n, amun `se kɛ: ‹Absalɔm ɔ'a yo famiɛn Ebrɔn lɔ.› »

¹¹ Absalɔm flɛli Zerizalɛm sran ya nnyɔn nan b'a ko sunmɛn i, sanngɛ be su i su sa ngbɛn, be si-man ndɛ'n nun.

¹² Kɛ Absalɔm ´yi tɛ'n, ɔ sunmannin sran Gilo kɛ ɔ ko flɛ Asitɔfɛl b'ɔ ti David i afɔtuɛ manfuɛ'n. Sran nga be jin Absalɔm sin'n be su sɔn, kpɛkuun cicilɛ nga be cicili'n, ɔ yoli dan ɔli i nyrun tititi.

David fin Zerizalɛm lɛ wanndili

¹³ Sran kun ɔ'a seli David kɛ: «Izraɛlfuɛ'm b'a sin Absalɔm sin.»

¹⁴ Yɛ David seli i mantanfuɛ nga be nin i o Zerizalɛm lɛ'n be kɛ: «Amun man e wanndi, afin sɛ Absalɔm nyan ye'n, e su fite-man nun. Amun `kan amun wun ɔ'a yo-man sɔ-ɔ, ɔ cɛ-man nan ɔ'a to e wa icra'n nan ɔ'a kle e nyrɛnnɛn, ɔ ´fa tokofi ´kun klɔ'n nun sran'm be kwlaa.»

¹⁵ Famiɛn'n i mantanfuɛ'm be tɛli i su kɛ: «E ti ɔ sufuɛ mun, kwlaa nga ɔ waan a yo'n e nin wɔ-ɔ.»

¹⁶ Yɛ famiɛn'n nin i awlofuɛ'm be kwlaa be nantili be ɔli-ɔ. Famiɛn'n yacili i soman blu lɛ kɛ be nian sua'n su.

¹⁷ Kɛ famiɛn'n nin sran'm be kwlaa be ´fite kɔ'n, be jrannin sua kasiɛn'n i wun lɛ.

¹⁸ I sufuɛ'm be kwlaa be nantili be sinnin i nyrun lɛ. Keretfuɛ mun, nin Pelɛtfuɛ nga be di famiɛn'n i gladi mun, ɔ nin Gatfuɛ mun, yɛ sonja ya nsiɛn nga be fin Gat bali'n, be kwlaa'm be nantili famiɛn'n i nyrun lɛ be sinnin.

¹⁹ Yɛ famiɛn'n seli Itai b'ɔ fin Gat'n kɛ: «Ɔ liɛ nán a nin e wɔ wie. Sa ɔ́ sin, kɔ famiɛn uflɛ'n i sin, afin a ti aofuɛ, nán ɔ mɛn yɛlɛ wa.

²⁰ A juli wa'n ɔ nian cɛ-man, kpɛkuun n `fa wɔ n `wlan daan sa, kusu wuun n si-man kan n kɔ'n. Sa ɔ́ sin a nin ɔ niaan'm be wɔ. Man Anannganman yo wɔ ye, man ɔ nin wɔ tran titi.»

²¹ Itai tɛli famiɛn'n su kɛ: «N kan Nyanmiɛn ɔ nin wɔ be ti, Nannan, kan kwlaa nga a ´kɔ'n, n ´kɔ wie. Sɛ a ´tran nguan nun o, sɛ a ´wu o, min nin wɔ-ɔ.»

²² Yɛ famiɛn'n seli i kɛ: «Yoo, sin dun mmua.» Nan Itai b'ɔ ti Gatfuɛ'n ɔ nin i sran mun, ɔ nin ba kanngan nga be o i sa nun'n b'a sin.

²³ Kɛ sran'm be ´sin be ´kɔ'n, be sunnin kekle kpa. Famiɛn'n kpɛli Sedrɔn nzue'n. Ɔ nin Izraɛlfuɛ'm be fali aawlɛ flɛnnɛn'n i atin'n.

²⁴ Nyanmiɛn nyrun jranfuɛ Zadɔk nin Levifuɛ'm be kwlaa be o lɛ wie, Nyanmiɛn i alaka'n wo bé sa nun. Be takali i lɛ, kɛ sran'm be ´fin klɔ'n nun lɔ fite'n, wuun Abiatar ´yi tɛ'n.

²⁵ Famiɛn'n seli Zadɔk kɛ: «Fa Nyanmiɛn i alaka'n sa ɔ sin klɔ lɔ. Sɛ Anannganman si min aunnvuɛ'n, ɔ ´fa min sa n sin, ɔ man n ´wun i alaka'n nin i sua'n ekun.

²⁶ Sɛ kusu ɔ se kɛ E nin wɔ e liɛ'n wieli'n, min yɛ n wo yɛ'n, nga ɔ nian siin ɔ fata kɛ ɔ fa yo min'n, ɔ `yo min.»

²⁷ Famiɛn'n seli Zadɔk ekun kɛ: «Nian, sa ɔ́ sin klɔ lɔ wɛtɛɛ, a nin ɔ́ wa Asimaaz, ɔ nin Abiatar nin i wa Zonatan, amun nin amun mma nnyɔn mun amun `sa amun sin.

²⁸ N ´tran aawlɛ flɛnnɛn'n nun kan be kpɛ Zurdɛn'n bé ja nun lɔ'n m ´minndɛ, san amun wa jasin ɔ ´to min lɔ nan m'an tu min bo.»

²⁹ Yɛ Zadɔk nin Abiatar be fali Nyanmiɛn i alaka'n be ɔli Zerizalɛm-ɔ, nan b'a ka lɔ.

David sunmannin Isai kɛ ɔ ko sasa Absalɔm nian

³⁰ David ´fu Olivie Oka'n kɔ'n, wuun ɔ ´sun. Tannin kɛtɛ i ti, ɔ nanti i ja ngbɛn. Tannin kata be kwlaa nga be nin i fu kɔ'n bé ti. Be ´kɔ'n, wuun be ´sun.

³¹ Be wa seli David kɛ: «Asitɔfɛl o Absalɔm sin, ɔ o be nga be jaso ɔ wun be nun.» Yɛ David waan: «Anannganman n ´srɛ wɔ, nán man Asitɔfɛl i afɔtuɛ'n ng'ɔ ´man be'n be yo ye.»

³² Kpɛkuun kɛ ɔ wa ju kpɔlɛ nga be sɔ Nyanmiɛn lɛ'n i ti su nglo lɔ'n, ɔ ´nian-an, Isai b'ɔ ti Arkfuɛ'n yɛ ɔ ba yɛ. Ɔ'a titi i wun tralɛ'n nun, yɛ ndutre o i ti su.

³³ David seli i kɛ: «Sɛ a nin min tran wa'n, a wa uka n trɔ'n su.

³⁴ Sanngɛ sɛ a sa ɔ sin klɔ lɔ'n, a kwla se Absalɔm kɛ: ‹Nannan, n klo kɛ n ´yo ɔ sufuɛ wie, laa n suli ɔ́ si, siɛn'n n klo kɛ n ´su wɔ.› I liɛ'n, Asitɔfɛl i afɔtuɛ ng'ɔ ´man'n, wuun a ´yo man ɔ ´to fuan.

³⁵ Kpɛkuun a nin Nyanmiɛn nyrun jranfuɛ Zadɔk nin Abiatar amun o lɔ. Ndɛ nga a ti i famiɛn'n i awlo lɔ'n, wuun a wa kan kle be.

³⁶ Zadɔk i wa Asimaaz nin Abiatar i wa Zonatan be o lɔ. Ndɛ kwlaa nga amun ti i lɔ'n, amun `sunman be man be wa kan kle min.»

³⁷ Yɛ David janvuɛ Isai ɔli Zerizalɛm-ɔ. Kɛ ɔ ´yo sɔ'n, wuun Absalɔm kusu ɔ'a ju lɛ wie.